Sarathi Baba: ପାଦୁକା ସତ୍‌ସଙ୍ଗ ନାଁରେ ବୁଲିଲା ସାରଥି ରଥ, ଘଣ୍ଟଘଣ୍ଟା ନାମ ସଂକୀର୍ତ୍ତନ ସହ ଚାଲିଲା ପୂଜାର୍ଚ୍ଚନା

ପୁଣି ମାତିଲେ ସାରଥିଙ୍କ ଅନୁଗାମୀ । ସନ୍ତୋଷ ରାଉଳଙ୍କୁ ସତସଙ୍ଗ କି ପ୍ରବଚନ ପାଇଁ ହାଇକୋର୍ଟ ମନା କରିଥିବା ବେଳେ, ତାଙ୍କ ଅନୁଗାମୀମାନେ ଭିନ୍ନ ଏକ ତରିକା ଆପଣାଇଛନ୍ତି ସାରଥିଙ୍କ ପ୍ରଚାର ପ୍ରସାର ପାଇଁ । ମୟୂରଭଞ୍ଜ ଜିଲ୍ଲା କପ୍ତିପଦା ଅଞ୍ଚଳରେ ଆୟୋଜିତ ହୋଇଛି ପାଦୁକା ସତସଙ୍ଗ । ମହାଆଡ଼ମ୍ବରରେ ଗଡ଼ିଛି ସାରଥି ରଥ । ତେବେ ଏହା ସାରଥିଙ୍କ ଅନୁଗାମୀମାନେ ନିଜ ଆଡ଼ୁ ଆୟୋଜନ କରିଥିଲେ, ନା ଇଏ ଖୋଦ୍ ସାରଥିଙ୍କ ପ୍ରାୟୋଜିତ ପ୍ଲାନ୍-ବି, ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି ।

ଅଧିକ ପଢ଼ନ୍ତୁ: ଏଥର ବିନା ପରିଚାଳନା କମିଟିରେ ଘୋଷଯାତ୍ରା ! ଶ୍ରୀମନ୍ଦିର ସୁପରିଚାଳନାକୁ ନେଇ କେତେ ଚିନ୍ତିତ ସରକାର ଉଠିଲା ପ୍ରଶ୍ନ

ପଡ଼ୁଛି ହୁଳହୁଳି... ଶୁଭୁଛି ହରିବୋଲ...। ଭକ୍ତଙ୍କ ଗହଣରେ ଆଗେଇ ଚାଲିଛି ସୁସଜ୍ଜିତ ରଥ। ସାଥେ ସାଥେ ତରାସ, ଆଲଟ ଓ ଛତ୍ର। ନାମ ସଂକୀର୍ତ୍ତନ, ପୂଜାର୍ଚ୍ଚନା, ଧୂପଦୀପ, ଭୋଗରାଗ। ହେଲେ ଜାଣିଛନ୍ତି କି- କିଏ ଏଠି ରଥାରୁଢ଼, କାହାର ଏ ଶୋଭାଯାତ୍ରା ? ହଁ...ଫଟୋ ଦେଖି ବୁଝି ସାରିବେଣି। ସାରଥି ଓରଫ୍ ସନ୍ତୋଷ ରାଉଳ। ଜେଲ୍ ଫେରନ୍ତା ମାନ୍ୟବର। ଚର୍ଚ୍ଚା ହେଉଛି- ଯେହେତୁ କୋର୍ଟଙ୍କ ସର୍ତ୍ତ ଶିକୁଳିରେ ବନ୍ଧା ପଡ଼ିଛନ୍ତି ସାରଥି ତେଣୁ ଅନୁଗାମୀ ଅନୁଗତଙ୍କ ଜରିଆରେ ଚଳାଇଛନ୍ତି 'ପ୍ଲାନ୍-ବି' ! ଯେହେତୁ ସନ୍ତୋଷ ରାଉଳଙ୍କୁ ସତସଙ୍ଗ ଓ ପ୍ରବଚନ ମନା । 'ପାଦୁକା ପୂଜା' ନାଁରେ ଚଳାଇଛନ୍ତି ଖୁଲ୍ଲମଖୁଲ୍ଲା ପ୍ରମୋସନ୍ !

ଏ ହେଉଛି ମୟୂରଭଞ୍ଜ ଜିଲ୍ଲା କପ୍ତିପଦା ବ୍ଲକ୍ ପଦ୍ମପୋଖରୀ ଗାଁରେ ଗତ ୧୨ ତାରିଖର ଦୃଶ୍ୟ। ମୟୂରଭଞ୍ଜ ଜିଲ୍ଲା ସାରଥି ପରିବାର ପକ୍ଷରୁ ଆୟୋଜିତ ହୋଇଥିଲା 'ଦିବ୍ୟ ସ୍ବ ଶ୍ରୀଚରଣ ପାଦୁକା ସତସଙ୍ଗ'। ପାଦୁକାକୁ ପୂଜାର୍ଚ୍ଚନା କରି, ରଥରେ ଫଟୋକୁ ବସାଇ, ୨ କିଲୋମିଟର ଶୋଭାଯାତ୍ରାରେ ଆଣିଥିଲେ ଅନୁଗାମୀ। ଆଦିବାସୀ ନୃତ୍ୟ ଓ ଘଣ୍ଟୁଆ ଦଳଙ୍କୁ ବି ଏଥିରେ ସାମିଲ କରାଯାଇଥିଲା। ସାରଥିଙ୍କ ଭଜନ, କଥାମୃତ ପରିବେଷଣ ପରେ ପ୍ରସାଦ ପାଇଥିଲେ ବିଭିନ୍ନ ଜିଲ୍ଲାରୁ ଆସିଥିବା ଚାରି ପାଞ୍ଚ ହଜାର ପୁରୁଷ ଓ ମହିଳା।

କେନ୍ଦ୍ରାପଡ଼ା ବାରିମୂଳ ଆଶ୍ରମରେ ମାଆ-ଝିଅଙ୍କୁ ଠକେଇ ଓ ଅସଦାଚରଣ ସମେତ ୩ଟି ମାମଲାରେ ଜେଲ୍ ଯାଇଥିଲେ ବହୁବିବାଦୀୟ ସାରଥି ଓରଫ୍ ସନ୍ତୋଷ ରାଉଳ । ୨୦୧୫ରେ ଗିରଫ ହୋଇ ୪ ବର୍ଷ ଜେଲରେ ରହିବା ପରେ, ୨୦୧୯ରେ ହାଇକୋର୍ଟରୁ ଜାମିନ ପାଇ ମୁକୁଳିଥିଲେ। ତେବେ ସେ ସଭାସମିତି ଓ ସତସଙ୍ଗ କରିପାରିବେନି, କି ପ୍ରବଚନ ଦେଇପାରିବେନି ବୋଲି କଡ଼ା ସର୍ତ୍ତ ରଖିଛନ୍ତି ହାଇକୋର୍ଟ। ତେଣୁ ସାରଥି ନିଜେ ଲୋକଙ୍କ ଗହଣକୁ ଯାଇପାରୁନଥିବାରୁ, ଲୋକଙ୍କ ଦ୍ବାରା ଏଭଳି କାର୍ଯ୍ୟକ୍ରମ କରାଉଛନ୍ତି କି ? ସତସଙ୍ଗରେ ଲୋକଙ୍କୁ କୁହାଯାଉଛି କେଉଁ ସତ ? ନିଜ ଭାବମୂର୍ତ୍ତି ସୁଧାରିବାକୁ ପୁଣି ଲୋକଙ୍କ ବିଶ୍ବାସ ସହ ଖେଳିବା ଆରମ୍ଭ କରିଛନ୍ତି କି ସାରଥି ? ଭିତରେ ଭିତରେ ନିଜ ସାମ୍ରାଜ୍ୟ ବିସ୍ତାର ଜାରି ରଖିଛନ୍ତି କି ଏହି ସ୍ବଘୋଷିତ ବାବା ? ଅନ୍ୟପକ୍ଷରେ, ଏକାଧିକ ସଂଗୀନ ଦଫା ଲାଗିଥିବା ଜଣେ ଜେଲ୍ ଫେରନ୍ତା ଅଭିଯୁକ୍ତର କଳା କାରନାମାକୁ ଆଖି ବୁଜି, ଲୋକମାନେ ଏଭଳି ପୂଜାର୍ଚ୍ଚନା କରିବା କେତେ ଯୁକ୍ତିଯୁକ୍ତ ? ଏହି ଘଟଣାକୁ ନେଇ ସନ୍ତୋଷ ରାଉଳଙ୍କ ପ୍ରତିକ୍ରିୟା ମିଳିପାରିନାହିଁ ।

ଅଧିକ ପଢ଼ନ୍ତୁ: ସହର ସହର ଗୋଡ଼େଇଲାଣି ଡାଇରିଆ ଡର; ସାମ୍ନାକୁ ଆସିଲା ବିପର୍ଯ୍ୟସ୍ତ ପରିମଳ ବ୍ୟବସ୍ଥାର ନଗ୍ନ ଚିତ୍ର...