Truck Swept Away While Crossing: ପାଣିରେ ବୁଡିଲା ପୋଲ; ବନ୍ୟା ପାଣିରେ ଭାସିଗଲା ଟ୍ରକ...

ପ୍ରବଳ ବର୍ଷା ଯୋଗୁ ପୋଲ ଉପରେ ପାଣି ପ୍ରବାହିତ ହେବାରୁ ଭାସିଗଲା ଟ୍ରକ । ଝାରସୁଗୁଡା ଜିଲ୍ଲା ବେଲପାହାଡରୁ ହେମଗିରକୁ ସଂଯୋଗ କରୁଥିବା ଚାଉଁରୀ ମହୁଲ ପୋଲ ଉପରେ ପାଣି ପ୍ରବାହିତ ହେଉଥିବା ବେଳେ ଏହାକୁ ଅତିକ୍ରମ କରୁଥିବା ଏକ ଟ୍ରକ ଭାସିଯାଇଛି । ପୋଲ ଉପରେ ଏବେ ବି ପାଣି ଚାଲିଥିବାରୁ ବେଲପାହାଡରୁ ସୁନ୍ଦରଗଡ଼ ହେମଗିରକୁ ଯାତାୟାତ ଠପ୍ ହୋଇଯାଇଛି ।

ଏପଟେ ଲଗାଣ ବର୍ଷାରେ ଧୋଇଗଲା ଅସ୍ଥାୟୀ ରାସ୍ତା । କେନ୍ଦୁଝର ଜିଲ୍ଲା ତେଲକୋଇ ବାଉଁଶଜୁରିଆ ନାଳର ଅସ୍ଥାୟୀ ରାସ୍ତା ଧୋଇଗଲା । ଜଗମୋହନପୁରରୁ ତେଲକୋଇ ଯୋଗାଯୋଗ ବିଚ୍ଛିନ୍ନ ହୋଇଯାଇଛି। 

ଅଧିକ ପଢ଼ନ୍ତୁ: ପୁରୀରେ ପ୍ରବଳ ଭିଡ଼: ସତର୍କ କଲା ପୋଲିସ...

ଅନ୍ୟପଟେ ବନ୍ୟା ପାଣିରେ ବୁଡିଲା ପୋଲ । ଗଜପତି ମୋହନା ବ୍ଲକ ପାପାଏଜୁ ଗାଁ ନିକଟରେ ଥିବା ପୋଲ ଉପରେ ଏବେ ଫୁଟେ ଉଚ୍ଚର ବନ୍ୟାଜଳ ପ୍ରବାହିତ ହେଉଛି । ଲଗାଣ ବର୍ଷା ଯୋଗୁଁ ଗଦାପୁର ନଦୀର ଜଳସ୍ତର ବୃଦ୍ଧି ପାଇଛି । ପାପାଏଜୁ ଗାଁ ପାଖରେ ଥିବା ପୋଲ ଉପରେ ଏବେ ଫୁଟେ ଉଚ୍ଚର ବର୍ଷା ଜଳ ପ୍ରବାହିତ ହେଉଛି । ଫଳରେ ପାଣିଗଣ୍ଡା ଠାରୁ ଗଡରମାକୁ ଯୋଡୁଥିବା ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି ।

ଅପରପକ୍ଷେ ଲଗାଣ ବର୍ଷାରେ ଦବିଗଲା ପୋଲ । ଝାରସୁଗୁଡା ଲଇକେରା ବ୍ଲକ ଅଇତାପାଲି-ମୁଦାଯୋର ରାସ୍ତାର ତେଲେନ ନଦୀ ଉପରେ ନିର୍ମିତ ପୋଲଟି ଲଗାଣ ବର୍ଷାରେ ଦବିଯାଇଛି । ସକାଳୁ ସକାଳୁ ପୋଲଉପରେ ବନ୍ୟାଜଳ ପ୍ରବାହିତ ହେଉଥିବା ବେଳେ ପାଣି କମିବା ପରେ ପୋଲଟି ଦବି ଯାଇଥିବା ଦେଖିବାକୁ ମିଳିଛି । ପୋଲ ଉପରେ ଗାଡିମୋଟର ନେଇ ଯାଆସ କରିବାକୁ ଭୟ କରୁଛନ୍ତି ଅଞ୍ଚଳବାସୀ । ତେବେ ଏଯାଏ ଘଟଣାସ୍ଥଳରେ ପ୍ରଶାସନ ପହଞ୍ଚନଥିବା ଅଭିଯୋଗ ହୋଇଛି ।