Balangir Migrant Labourers: ମାଳମାଳ ଯୋଜନା...ମାଳମାଳ ଦାଦନ ଶ୍ରମିକ...ଶୁଣିବେ କି ସରକାର ?

ସ୍ବାଧୀନତାର ସାତ ଦଶନ୍ଧି ପରେ ବି ଦାନା ପାଇଁ ଦାଦନ ଯାଇ ନିର୍ଯାତିତ ହେବା ଘଟଣା ପାଇଁ ବେଶ ଜଣାଶୁଣା ପଛୁଆ ବଲାଙ୍ଗିର ଜିଲ୍ଳା । ସରକାରୀ ଯୋଜନାର ଅଭାବ ନାହିଁ । ସଚେତନତା କାର୍ଯ୍ୟକ୍ରମ ବି ଯାହାକୁ ଯେତେ । କିନ୍ତୁ ଅଧିକାରୀଙ୍କ ଆନ୍ତରିକତାର ଅଭାବ ଯୋଗୁଁ, କାମଧନ୍ଧା ନପାଇ ଦାନା ପାଇଁ ଦାଦନ ଯାଉଛନ୍ତି ସାଧାରଣ ଶ୍ରମିକ । ପରିବାର ପରିପୋଷଣ ପାଇଁ କିଏ ମଧ୍ୟଯୁଗୀୟ ମାଡ ଖାଇ ଅଖିଆ ଅପିଆ କାମ କରୁଛି, ତ ଆଉ କୋଉ ସ୍ତ୍ରୀ ପାଖରୁ ସ୍ବାମୀକୁ ଛଡାଇ ନେଇ ମାସ ମାସ ଧରି ନିଖୋଜ କରିଦେଇଛି ମାଲିକ । ପଡୋଶୀ ତେଲେଙ୍ଗାନା ସରକାର ଓ ପ୍ରଶାସନ ଓଡିଆ ଦାଦନକୁ ଉଦ୍ଧାର କରିବା ପାଇଁ ତତ୍ପର ଦେଖାଉଥିବା ବେଳେ, ଏଠି ଥଇଥାନ ପାଇଁ ପାଖ ମାଡୁନି ପ୍ରଶାସନ । ଏମିତି ସମୟରେ ଆଜି ପୁଣି ଏକ ନିର୍ଯ୍ୟାତନାର ନୂଆ କାହାଣୀ, -‘‘ଶୁଣ ସରକାର...ଦାଦନ ଦୁଃଖ...’’ ।

ଇଏ ଜଣେ ତିନି ଛୁଆର ମା’ର କାହାଣୀ । ମାଲିକ ସ୍ବାମୀକୁ ଅପହରଣ କରିନେଇଛି । ଏ ମା’ର କହିବା କଥା ହେଉଛି, ଗୋଟିଏ ମାସ ହେବ ମୋ ସ୍ବାମୀ ଅକ୍ଷୟ ପରାଭୁଏଙ୍କ କୌଣସି ଖୋଜଖବର ନାହିଁ । ଅବଶ୍ୟ ମାଲିକ ଧମକ ଦେଇଥିଲା, ହାଡଭଙ୍ଗା କାମ ନକଲେ, ସ୍ବାମୀକୁ ଅପହରଣ କରିନେଇ ହତ୍ୟା କରିଦେବେ । ସତକୁ ସତ ମାସେ ହେଲାଣି ସ୍ବାମୀଙ୍କ ଖୋଜଖବର ନାହିଁ । ତେଣୁ ତିନି ଛୁଆଙ୍କୁ ନେଇ ଜୀବନ ଧରି ବଲାଙ୍ଗିର ଫେରିଛି ।

ମୁରିବାହାଲ ବ୍ଳକ ଇଚ୍ଛାପଡାର ଅନିତା ପରାଭୁଏ, ତିନି ଛୁଆ ଓ ସ୍ବାମୀଙ୍କ ସହ ତେଲେଙ୍ଗାନାକୁ ଦାଦନ ଯାଇଥିଲେ । ଏବେ ଉଦ୍ଧାର ହୋଇ ଫେରିଲା ପରେ, ସ୍ଥାନୀୟ ସର୍ଦ୍ଦାର ଦେବ ସୁନା ପୂରା ପରିବାରକୁ ଧମକ ଦେଉଛି । ଏତିକିରେ ସରିନି ଦାଦନ ନିର୍ଯ୍ୟାତନାର ନିଆରା କାହାଣୀ । ବେଳପଡା ବ୍ଳକ ହଟକଟ ଗାଁର ନାରାୟଣ ମସନିଆ । ପିଠିରେ ମାଡର ଦାଗ । ବିଲରେ ହଳ କରୁଥିବା ବଳଦକୁ ବି ଏମିତି ମାଡ ମରାଯାଏନାହିଁ । ମାଡ ଖାଇବାର ସାତ ଦିନ ପରେ ବି ପିଠିରେ ଦାଗ ରହିଛି । ଅଭାବୀ ମଣିଷଙ୍କୁ ମାଡ ମାରି ପଶୁ ଭଳି ଖଟାଉଥିଲା ଇଟାଭାଟି ମାଳିକ । ସ୍ବେଚ୍ଛାସେବୀଙ୍କ ସହାୟତା ଓ ତେଲେଙ୍ଗାନା ପୋଲିସ ଓ ପ୍ରଶାସନର ସହଯୋଗରେ ଉଦ୍ଧାର ହୋଇ ବଲାଙ୍ଗିର ଫେରିଛନ୍ତି । କିନ୍ତୁ ଏଇଠି ଅଧିକାରୀଙ୍କ ଆଡ ଆଖି । ଆଉ ସ୍ଥାନୀୟ ସର୍ଦ୍ଦାରର ନାଲି ଆଖିର ଭୟ ।

ଏବେ ଆସନ୍ତୁ ନଜର ପକାଇବା, ତେଲେଙ୍ଗାନା ପ୍ରଶାସନର ରେସକ୍ୟୁ ଅପରେସନ ଓ ବଲାଙ୍ଗିର ପ୍ରାଶାସନର ନିରବତା ଉପରେ । ଗତ ପାର୍ବଣ ଋତୁରୁ କାମଧନ୍ଧା ଅଭାବରୁ ପାଖାପାଖି ଶହେ ଜଣଙ୍କୁ ତେଲେଙ୍ଗାନାକୁ ଦାଦନ ପଠାଇଥିଲା ସ୍ଥାନୀୟ ସର୍ଦ୍ଦାର ଦେବ ସୁନା । ଅଗ୍ରୀମ ବା ବଇନା ନେଇ, ବେଳପଡା, ଖପ୍ରାଖୋଲ,ପାଟଣାଗଡ ଓ ମୁରିବାହାଲ ବ୍ଳକରୁ ଗୋଟିଏ ଗ୍ରୁପରେ ତେଲେଙ୍ଗାନାକୁ ଦାଦନ ଯାଇଥିଲା । କିନ୍ତୁ ବଇନା ଅପେକ୍ଷା ଅଧିକ କାମ ଦେଇଥିଲା ମାଲିକ । କାମ ବଦଳରେ ଟଙ୍କା ମାଗିବାରୁ, ଆରମ୍ଭ ହେଲା ନିର୍ଯ୍ୟାତନା । ଲୋକ ଲଗାଇ ମାଡ ମାରିଲା । ମହିଳା ମାନଙ୍କୁ ଠାରୁ ସ୍ବାମୀଙ୍କୁ ଅପହରଣ କରିନେଲା । ମାସକ ପରେ ବି ନିଖୋଜ ଜଣେ ସ୍ତ୍ରୀର ସ୍ବାମୀ ।

ନିର୍ଯ୍ୟାତନା ଅତ୍ୟଧିକ ହେବାରୁ ଜଣେ ସ୍ବେଚ୍ଛାସେବୀଙ୍କୁ ଯୋଗାଯୋଗ କଲେ ବିଚରା ଶ୍ରମିକ । ତେଲେଙ୍ଗାନା ସରକାର ଓ ପ୍ରଶାସନକୁ ସାମାଜିକ ଗଣମାଧ୍ୟମରେ ଖବର ଦେଲେ ସ୍ବେଚ୍ଛାସେବୀ । ତତ୍ପର ହେଲା ତେଲେଙ୍ଗାନା ସରକାର । ଖବର ପାଇଲା କ୍ଷଣି ତତକ୍ଷଣାତ ଶ୍ରମିକ ମାନଙ୍କୁ ଉଦ୍ଧାର କରି ଟ୍ରେନରେ ସୁରକ୍ଷା ଦେଇ ବଲାଙ୍ଗିର ଆଣିଥିଲେ । କିନ୍ତୁ ବଲାଙ୍ଗିର ଷ୍ଟେସନରେ ପହଞ୍ଚିଲା ପରେ, ଖବର ଦେବା ସତ୍ବେ, ଶ୍ରମ ବିଭାଗ, ପୋଲିସ କିମ୍ବା ପ୍ରଶାସନର କୌଣସି ଅଧିକାରୀ କି କର୍ମଚାରୀଙ୍କ ପାଖ ମାଡିନଥିଲେ । ଶେଷରେ ଭୋକିଳା ଉଦ୍ଧାର ଶ୍ରମିକ ମାନଙ୍କୁ କିଛି ବିସ୍କୁଟ ଦେଇ ବସ ଯୋଗେ ଗାଁକୁ ପଠାଇଥିଲେ ରେଲବାଇ ପୋଲିସ । କିନ୍ତୁ କାଯ୍ୟାନୁଷ୍ଠାନ ପରିବର୍ତ୍ତେ ରଥ ବୁଲାଇ କାମ ତୁଟାଇଛି ଜିଲ୍ଳା ପ୍ରଶାସନ । କୌଣସି ପ୍ରତିକ୍ରୀୟା ଦେବାକୁ ବି ମନା କରିଦେଉଛନ୍ତି ଶ୍ରମ ବିଭାଗ ଅଧିକାରୀ ।