ବିଶ୍ୱାସ ଆଉ ଗୁରୁଶିଷ୍ୟ ପରଂପରା ନାଁରେ ଭୁବନେଶ୍ୱରସ୍ଥିତ ଖଣ୍ଡଗିରି ବୈକୁଣ୍ଠଧାମ ଆଶ୍ରମରେ ଚାଲିଥିଲା କି ଭାଣ୍ଡାମୀ? ଭକ୍ତ-ଭକ୍ତି ଓ ଭଗବାନ ନାଁରେ ସରକାରୀ ଜମିକୁ ମାଡ଼ିବସି ଏକ ସାମ୍ରାଜ୍ୟ ଛିଡ଼ା କରାଇବାକୁ ରଚାଯାଉଥିଲା କି ମସୁଧା ? ଆଜି ତୃତୀୟ ଦିନରେ ଆଶ୍ରମ ଜମିର ଖୋଳତାଡ଼ କରିଥିବା ପ୍ରଶାସନିକ ଅଧିକାରୀଙ୍କ ଏଭଳି ଇଙ୍ଗିତ ଏବଂ କିଛି ସାଧାରଣ ଜନତାଙ୍କ ସଂଗୀନ ଅଭିଯୋଗ ପରେ ଏବେ ଏମିତି ଆଶଙ୍କା କରାଯାଉଛି। କିନ୍ତୁ ଆଶ୍ରମ ପକ୍ଷରୁ ଆଜି ଆଉ କେହି ମୁହଁ ଖୋଲିନାହାନ୍ତି ।
ସରକାରୀ ଜମି ଉପରେ ଛିଡ଼ା ହୋଇଛି କି ଖଣ୍ଡଗିରି ବୈକୁଣ୍ଠଧାମ ଆଶ୍ରମ? ଭଗବାନଙ୍କ ନାଁରେ ଜାଗା ମାଡ଼ି ବସି ତଥାକଥିତ କୁନି କଳ୍କକୀଙ୍କ ପାଇଁ ପ୍ରତିଷ୍ଠା କରାଯାଉଥିଲା କି ବିରାଟ ସାମ୍ରାଜ୍ୟ ? କାହା ଅନୁମତିରେ ନିର୍ମାଣ କରାଯାଇଛି ବୈକୁଣ୍ଠ ଧାମ ଆଶ୍ରମର ଏହି ୩ ମହଲା କୋଠା ? ଚାଲିଛି ଖୋଳତାଡ଼ । ଫିତା ପକାଇ କରାଯାଇଛି ମାପଚୁପ ।
ଆଶ୍ରମରେ ଆଜି BDAର ୮ ଜଣିଆ ଟିମ୍ ସହ ଏଭଳି ସରଜମିନ ତଦନ୍ତ କରିଛି ସାଧାରଣ ପ୍ରଶାସନ ବିଭାଗ । GA ଡିପାର୍ଟମେଣ୍ଟର ଆସିଷ୍ଟାଣ୍ଟ ଡାଇରେକ୍ଟର କହିଛନ୍ତି, ବର୍ତ୍ତମାନ ଯେଉଁ ସ୍ଥାନରେ ଆଶ୍ରମ ଅଛି ତାହା ସରକାରୀ ଜମି ନା ସ୍ଥିତିବାନ, ସେନେଇ ତଦାରଖ କରିଛୁ । ପ୍ରାଥମିକ ତଦନ୍ତରେ ଯାହା ଦେଖିଲୁ ସେ ଜମି ସରକାରୀ ଜମି ଆସିପାରେ । ମାପଚୁପ ସରିଛି । ସରକାରଙ୍କୁ ରିପୋର୍ଟ ଦିଆଯିବ ।
Also Read
ଅଧିକ ପଢ଼ନ୍ତୁ:ବାବାଙ୍କ ଉପରେ ଯୁବତୀଙ୍କ ସଙ୍ଗୀନ ଆରୋପ, ‘ଝିଅଙ୍କ ସହ ବୁଲନ୍ତି, ଟଙ୍କା ଉଡ଼ାନ୍ତି’
ସରକାରୀ ଜମିରେ ଆଶ୍ରମ ଗଢ଼ିଉଠିଥିଲେ ଆଇନ ଅନୁଯାୟୀ ପଦକ୍ଷେପ ନିଆଯିବ । ବୈକୁଣ୍ଠଧାମ ଆଶ୍ରମରେ ଧାର୍ମିକ ଏବଂ ଆଧ୍ୟାତ୍ମିକ ଚେତନା ନାଁରେ ଯେଉଁ ଘଟଣା ସବୁ ଘଟୁଥିଲା, ତା’ର ଆଉ କିଛି ନୂଆ ଦିଗର ଅବତାରଣା କରି ଖଡଗହସ୍ତ କିଛି ମହିଳା । ତନ୍ଭୀ ନାମକ ଏହି ଯୁବତୀଙ୍କ ମୁହଁରୁ ଲୋକମୁଖରେ ଚର୍ଚ୍ଚିତ ସେହି ତଥାକଥିତ କଳ୍କୀ ବାବାଙ୍କ କାରନାମା ଶୁଣିଲେ ମୁଣ୍ଡରେ ହାତ ଦେଇଦେବେ ଆପଣ ।
ତନ୍ଭୀଙ୍କ ଅଭିଯୋଗ ହେଲା, ବାବା କୁଆଡ଼େ ପାଦରେ, ବେକରେ ଆଉ ମୁଣ୍ଡରେ ତୁଳସୀ ପକାଇ ଏଇଠି ବସି ଲୋକଙ୍କ ଦୁଃଖସୁଖ ବୁଝୁଥିଲେ । ଏପରିକି ବାହାଘରଠୁ ସନ୍ତାନ ସନ୍ତତି ହେବା ଯାଏଁ କୁଆଡ଼େ ପ୍ରତିକାର ବି କରୁଥିଲେ । ଆଉ ଏହି ସେବା ବାବଦକୁ ଆଶ୍ରମ ପକ୍ଷରୁ ଆଦାୟ ହୁଏ ଲକ୍ଷ ଲକ୍ଷ ଟଙ୍କା । ତଥାକଥିତ କଳ୍କୀ ବାବା ପଟିଆ ଅଞ୍ଚଳରେ କେବେ କାଫେରେ ଝିଅ ମାନଙ୍କ ସହ ବସା ଉଠା କରନ୍ତି ତ ଆଉ କେବେ ଟଙ୍କା ଉଡ଼ାଉଥିବା ତନ୍ଭୀ ନିଜେ ଦେଖିଥିବା କହିଛନ୍ତି ।
ଏଣେ ବାବା ଓ ଆଶ୍ରମର କାର୍ଯ୍ୟକଳାପ ସଂପର୍କରେ ଏଭଳି ନାନା ଅଭିଯୋଗ ଭିତରେ ଆଶ୍ରମରେ ପହଞ୍ଚି ଗେଟରେ ଥିବା ‘ଶ୍ରୀ’ ଲେଖାକୁ କାଦୁଅ ବୋଳି ବିକ୍ଷୋଭ ପ୍ରଦର୍ଶନ କରିଛନ୍ତି କିଛି ମହିଳା । ତା’ସହ ଆଶ୍ରମ ଉପରେ ଲାଗିଥିବା ନିର୍ଦ୍ଦିଷ୍ଟ ଏକ ପତାକାକୁ ନେଇ ପ୍ରଶ୍ନ ଉଠାଇଛନ୍ତି । ଅଭିଯୋଗ ଯଦି ସତ, ତାହେଲେ କାହା ଛତ୍ରଛାୟାରେ ଗଢ଼ିଉଠିଥିଲା ବୈକୁଣ୍ଠଧାମ ଆଶ୍ରମ ?
ତିନି ମହଲା ବିଶିଷ୍ଟ ଏହି ସବୁଜ କୋଠାରେ ବାସ୍ତବରେ ଚାଲୁଥିଲା କ’ଣ? କୁହାଯାଉଛି ଏହି କୋଠାରେ କୁଆଡ଼େ ବିଦେଶୀ ଭକ୍ତ ଏବଂ ଦୂରଦୂରାନ୍ତରୁ ଅନୁଗାମୀ ମଧ୍ୟ ଆସି ରହୁଥିଲେ । ତେବେ ସମଗ୍ର ଘଟଣା ଓ ତନ୍ଭୀଙ୍କ ଅଭିଯୋଗ ନେଇ ଆଶ୍ରମ କର୍ତ୍ତୃପକ୍ଷଙ୍କର କୌଣସି ପ୍ରତିକ୍ରିୟା ମିଳିନାହିଁ । କିନ୍ତୁ ତଥାକଥିତ ବାବାଙ୍କ ପିତା ପଣ୍ଡିତ କାଶୀନାଥ ମିଶ୍ର କାଲି ଓଟିଭିକୁ ପ୍ରତିକ୍ରିୟା ଦେଇ କହିଥିଲେ, ବୈକୁଣ୍ଠ ଧାମ ଆଶ୍ରମର ମୁଁ ସଦସ୍ୟ ନୁହେଁ । ମୁଁ ସେହି ୧୨୧୭/୧୩୬୨ ନମ୍ବର ପ୍ଲଟରେ ରୁହେଁ । ଆଶ୍ରମରେ ବି ସମୟ ବିତାଏ । କିନ୍ତୁ କାହାକୁ ଗୁଣି ଗାରେଡି କରି ଭଲ କରିଦେବା ଭଳି କୌଣସି କାର୍ଯ୍ୟକଳାପ ଚାଲେ ନାହିଁ ।