LIVE TV
ପଶ୍ଚିମବଙ୍ଗ ସରକାରଙ୍କୁ ନାଲି ଆଖି ଦେଖାଇଲେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ । ସୀମାରେ ଅନୁପ୍ରବେଶ ନେଇ ପଶ୍ଚିମବଙ୍ଗ ସରକାରଙ୍କୁ କଡା ଚେତାବନୀ ଦେଲେ ମନ୍ତ୍ରୀ । ଗଣମାଧ୍ୟମକୁ ପ୍ରତିକ୍ରିୟା ଦେଇ ମନ୍ତ୍ରୀ ସୁରେଶ ପୂଜାରୀ କହିଛନ୍ତି 'ପଶ୍ଚିମବଙ୍ଗ ଏକ ଅସଭ୍ୟ ସରକାର । ଆବଶ୍ୟକ ପଡିଲେ ଓଡିଶା ପଶ୍ଚିମବଙ୍ଗକୁ ପାଠ ପଢାଇ ରାସ୍ତା ଦେଖାଇବ ।
ବାଲେଶ୍ବର ଉଦୟପୁର ଏବଂ ସହାବାଜିପୁରରେ ପଶ୍ଚିମବଙ୍ଗ ସରକାରର ରାଜସ୍ୱ ମନ୍ତ୍ରୀଙ୍କ ଅନୁପ୍ରବେଶ ପ୍ରସଙ୍ଗରେ ରାଜସ୍ବ ମନ୍ତ୍ରୀ ପ୍ରତିକ୍ରିୟା ଦେଇ କହିଛନ୍ତି, ଓଡ଼ିଶାର ସୀମାକୁ ନେଇ ଛତିଶଗଡ଼, ଝାଡଖଣ୍ଡ ଏବଂ ପଶ୍ଚିମବଙ୍ଗ ସହିତ ବିବାଦ ରହିଛି । ଏନେଇ ମୁଁ ଜିଲ୍ଲା ଗସ୍ତ କରି ଅଧିକାରୀଙ୍କ ସହ ଆଲୋଚନ କରିଛି । ଛତିଶଗଡ଼ ଏବଂ ଝାଡଖଣ୍ଡ ସହ ବିଶେଷ ସମସ୍ୟା ନାହିଁ । କିନ୍ତୁ ଆଶ୍ଚର୍ଯ୍ୟର କଥା ଓଡିଶା ଗଠନରୁ ଆଜି ଯାଏଁ ବାଲେଶ୍ଵରରେ ସୀମା ଚିହ୍ନଟ ହୋଇନାହିଁ ।
Also Read
ରାଜସ୍ବ ବିଭାଗ ପଶ୍ଚିମବଙ୍ଗ ସରକାରଙ୍କ ସହ ଯୋଗାଯୋଗରେ ଅଛି । ଅନେକ ଓଡ଼ିଆ ଅଧିକାରୀ ମଧ୍ୟ ପଶ୍ଚିମବଙ୍ଗ ସରକାରଙ୍କ ରାଜସ୍ବ ବିଭାଗରେ କାର୍ଯ୍ୟ କରୁଛନ୍ତି । ସୌହାର୍ଦ୍ଦ୍ୟପୂର୍ଣ୍ଣ ବାତାବରଣ ଭିତରେ ସୀମା ଚିହ୍ନଟ ହେବ । ପଶ୍ଚିମବଙ୍ଗ ରାଜସ୍ବ ଅଧିକାରୀଙ୍କ ସହ ଓଡ଼ିଶାର ରାଜସ୍ବ ଅଧିକାରୀ ଫିଲ୍ଡ ଭିଜିଟ କରି ଅତିଶୀଘ୍ର ସୀମା ଚିହ୍ନଟ କରିବେ । ଏ ସରକାର ବିନା ବିବାଦରେ ସୀମା ଚିହ୍ନଟ ସମସ୍ୟାର ସମାଧାନ କରିବ । ପଶ୍ଚିମବଙ୍ଗ ସରକାର ଅସଭ୍ୟ ସରକାର । ପଶ୍ଚିମବଙ୍ଗ ଦେଶରେ ସମସ୍ୟା ସୃଷ୍ଟି କରୁଛି । ଓଡିଶା ସରକାରଙ୍କୁ ହଇରାଣ କରିବା ପାଇଁ ଆଳୁ ସମସ୍ୟା ସୃଷ୍ଟି କରୁଛି ପଶ୍ଚିମବଙ୍ଗ । ପଶ୍ଚିମବଙ୍ଗ ସରକାର ଅନୁପ୍ରବେଶ ମଧ୍ୟ କରାଉଛି । ନୂଆ ନାଗରିକତା ଆଇନକୁ ଲାଗୁ କଲେନାହିଁ । ପଶ୍ଚିମବଙ୍ଗ ସରକାର ଆୟୁଷ୍ମାନ ଯୋଜନା ଲାଗୁ କଲେ ନାହିଁ । ଗଣତନ୍ତ୍ରରେ ଏହା ଦୁର୍ଭାଗ୍ୟ ।
ବିବାଦ ତିଆରି କରିବାର କାମ କରିବା ସହ ଝଗଡା ତିଆରି କରିବାର କାମ କରୁଛି ପଶ୍ଚିମବଙ୍ଗ । ସେମାନଙ୍କର ପାଠ ପଢ଼ିବାର ଆବଶ୍ୟକତା ଅଛି । ଓଡିଶା ସରକାର ତାଙ୍କୁ ପାଠ ପଢ଼ାଇବ ଏବଂ ରାସ୍ତା ଦେଖାଇବ । ଜବରଦସ୍ତିକୁ କିଏ ଖାତିର କରୁଛି। ପଶ୍ଚିମବଙ୍ଗ ସରକାର ଖୁଣ୍ଟ ପୋତିଲେ ଓଡ଼ିଶା ଲୋକ ଉପାଡ଼ି ଫିଙ୍ଗିବେ। ରାଜସ୍ବ ବିଭାଗକୁ ଲୋକ ସହଯୋଗ କରୁଛନ୍ତି। ଓଡ଼ିଶା ସାରା ଦେଶକୁ ରାସ୍ତା ଦେଖାଉଛି, ପଶ୍ଚିମବଙ୍ଗ ସରକାରକୁ ରାସ୍ତା ଦେଖାଇବାକୁ ବେଶି ସମୟ ଲାଗିବନି । ମନ୍ତ୍ରୀ ଆହୁରି କହିଛନ୍ତି ୧୯୩୬ ମସିହାରୁ ଓଡିଶା ଗଠନ ହୋଇଛି । ରାଜ୍ୟ ଗଠନକୁ ଆଉ ୧୨ବର୍ଷ ପରେ ୧୦୦ବର୍ଷ ହେବ । କିନ୍ତୁ ଏବେ ପର୍ଯ୍ୟନ୍ତ ଉଭୟ ରାଜ୍ୟର କୌଣସି ସରକାର ସୀମା ଚିହ୍ନଟ କରିନାହାନ୍ତି ।
ଅଧିକ ପଢ଼ନ୍ତୁ: କେନ୍ଦୁଝରରେ ହେବ ଷ୍ଟିଲ୍ ପ୍ଲାଣ୍ଟ; ଯୁବକ-ଯୁବତୀଙ୍କୁ ମିଳିବ ନିଯୁକ୍ତି...
- Reported by:
- SOUMYA RANJAN SAHOO
