LIVE TV
ସରକାର ବଦଳୁ ବଦଳୁ ଶ୍ରୀମନ୍ଦିରକୁ କିଏ ଶ୍ରୀହୀନ କରିବାକୁ ବସିଥିଲା? ବଡ଼ ଠାକୁରଙ୍କ ବଡ଼ ଦେଉଳକୁ ଆଲୋକଶୂନ୍ୟ କରିବାର ମନ୍ଦବୁଦ୍ଧି ପାଞ୍ଚିଥିଲା କିଏ? କାହା ନିର୍ଦ୍ଦେଶରେ ଖୋଲି ଦିଆଯାଉଥିଲା ଶ୍ରୀମନ୍ଦିର ଚତୁଃପାର୍ଶ୍ୱ ଏବଂ ମ୍ୟୁଜିୟମ୍ ଲାଇଟ୍ ? ୩ଦିନ ହୋଇଗଲା, ହେଲେ ଏ ନେଇ ପତ୍ତା ପାଉନି ଶ୍ରୀମନ୍ଦିର ପ୍ରଶାସନ ।
ଯାହାକୁ ନେଇ ପ୍ରଶ୍ନ ଉଠୁଥିବା ବେଳେ ଏହା ପଛରେ ଷଡ଼ଯନ୍ତ୍ର ସହ ଦୁର୍ନୀତିର ଗନ୍ଧ ବାରି ହାଇକୋର୍ଟ ଯିବାକୁ ଅଣ୍ଟା ଭିଡ଼ିଛନ୍ତି ସେବାୟତ ଓ ସାମାଜିକ କର୍ମୀ । ବଡ଼ ଠାକୁରଙ୍କ ବଡ଼ଦେଉଳ ଝଟକିବ ବୋଲି ଯେଉଁ ଆଲୋକୀକରଣ ବ୍ୟବସ୍ଥା କରାଯାଇଥିଲା, ତାକୁ ଖୋଲି ପକାଇଥିଲା କିଏ ? ଘଟଣାକୁ ୩ ଦିନ ହେଲା, ନା ଜାଣିଛି ଶ୍ରୀମନ୍ଦିର ପ୍ରଶାସନ ନା ଜାଣିଛି ଓଡ଼ିଶା ସେତୁ ନିର୍ମାଣ ନିଗମ-OBCC ।
ଶ୍ରୀମନ୍ଦିର ଉନ୍ନୟନ ପ୍ରଶାସକଙ୍କୁ ପଚାରିବାରୁ ସିଧା ସିଧା କହୁଛନ୍ତି, ସେ କିଛି ବି ଜାଣିନାହାଁନ୍ତି । ଯଦି ଶ୍ରୀମନ୍ଦିର ପ୍ରଶାସନ କିମ୍ବା OBCC ଜାଣିନି, ତେବେ କିଏ ସେହି ଅଦୃଶ୍ୟ ଶକ୍ତି, ଯାହାର ନିର୍ଦ୍ଦେଶରେ ଶ୍ରୀମନ୍ଦିରକୁ ଶ୍ରୀହୀନ ପାଇଁ ଉଦ୍ୟମ ଚାଲିଥିଲା ? ଶ୍ରୀଜଗନ୍ନାଥ ବଲ୍ଲଭ ପରିସରସ୍ଥିତ ସଂଗ୍ରହାଳୟରୁ ସାମିଆନା ସହ ଲାଇଟ୍ ଖୋଲିବାକୁ ନିର୍ଦ୍ଦେଶ ଦେଲା କିଏ ?
Also Read
ଅଧିକ ପଢ଼ନ୍ତୁ: ରାଜ୍ୟରେ କିଏ ହେବେ ବିରୋଧୀ ଦଳ ନେତା ? ବିପକ୍ଷରେ ନବୀନ ବସିବେ ନା ଆଉ କିଏ ?
ଏହି ତମାମ ପ୍ରସଙ୍ଗରେ ସତରେ କ’ଣ ଶ୍ରୀମନ୍ଦିର ପ୍ରଶାସନ ଜାଣିନି ନା ଜାଣି ଅଜଣା ରହୁଛି ? କିଛି ଜାଣିନଥିବା କହିବା ପଛରେ ରହିଛି କି କୌଣସି ରହସ୍ୟ? ଏଭଳି ନାନା ପ୍ରଶ୍ନ ଭିତରେ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମଧ୍ୟ କିଛି ଜାଣିନଥିବା କହିଛନ୍ତି । ତଥ୍ୟ କହୁଛି, କୋଟି କୋଟି ଟଙ୍କାରେ ଗତ ଜାନୁଆରୀ ୧୭ରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପଣ ପାଇଁ ବଡ଼ଦେଉଳ ସହ ଚାରିକଡ଼କୁ ୪୨ଟି ହାଇଫୋକସ ଲାଇଟ୍ ମାଧ୍ୟମରେ ଆଲୋକୀକରଣ କରାଯାଇଥିଲା ।
ଯାହାର ଦାୟିତ୍ୱରେ ଥିଲା ଦିଲ୍ଲୀର ଥାର୍ଡୱେଭ୍ ନାମକ ଏକ ଠିକା ସଂସ୍ଥା । ସେହିପରି ଶ୍ରୀଜଗନ୍ନାଥ ବଲ୍ଳଭ ପରିସର ମ୍ୟୁଜିୟମର ଆଲୋକୀକରଣ ଦାୟିତ୍ୱ ଦିଲ୍ଲୀ ଗୋରେଗାଁର ଭେଣ୍ଡର NK KAPOOR pvt ltd ସମ୍ଭାଳୁଥିଲା । ତେବେ ଶ୍ରୀମନ୍ଦିର ଉନ୍ନୟନ ପ୍ରଶାସକଙ୍କ କହିବା ଅନୁଯାୟୀ, ଯଦି ଶ୍ରୀମନ୍ଦିର ପ୍ରଶାସନ କିମ୍ବା OBCC ଟଙ୍କା ଦେଇନି ତାହେଲେ, ଏହି ୨ଟି ଘରୋଇ ସଂସ୍ଥାକୁ କିଏ ଏବଂ କେଉଁ ପାଣ୍ଠିରୁ ଆଣି ଟଙ୍କା ଦେଉଥିଲା ?
କାହା ନିର୍ଦ୍ଦେଶରେ ଏବଂ କେତେ ଟଙ୍କାର ଟେଣ୍ଡର ହୋଇଥିଲା ଏହି ଯୋଜନା ପାଇଁ ? କାହିଁକି ତଥ୍ୟ ନାହିଁ ଶ୍ରୀମନ୍ଦିର ପ୍ରଶାସନ ନିକଟରେ ? ଏଭଳି ପ୍ରଶ୍ନ ଉଠାଇ ହାଇକୋର୍ଟଙ୍କ ଦ୍ୱାରସ୍ଥ ହେବାକୁ ସେବାୟତ ଓ ସାମାଜିକ କର୍ମୀ ଅଣ୍ଟା ଭିଡ଼ିଥିବା କହିଛନ୍ତି । ରାଜ୍ୟରେ ସରକାର ପରିବର୍ତ୍ତନ ପରେ ପରେ ଶ୍ରୀମନ୍ଦିର ଚତୁଃପାର୍ଶ୍ୱରୁ ଲାଇଟ୍ ଖୋଲିନେବା ସହ ପ୍ରାୟ ୩ଦିନ କାଳ ଅନ୍ଧାର କରିଦିଆଯାଇଥିଲା ।
ଯାହାକୁ ନେଇ ଭକ୍ତ ଓ ସେବାୟତଙ୍କ ତୀବ୍ର ଅସନ୍ତୋଷ ପରେ ଶନିବାର ସଂଧ୍ୟା ସୁଦ୍ଧା ଶ୍ରୀମନ୍ଦିର ସହ ଶ୍ରୀଜଗନ୍ନାଥ ବଲ୍ଳଭ ପରିସର ମ୍ୟୁଜିୟମର ଆଲୋକୀକରଣ ବ୍ୟବସ୍ଥାର ପୁନର୍ବାହାଲ୍ କରାଯାଇଥିଲା । ଯାହାର ସମ୍ପୂର୍ଣ୍ଣ ଦାୟିତ୍ୱ ଏବେ ନିଜ ହାତକୁ ନେଇଛି ଶ୍ରୀମନ୍ଦିର ପ୍ରଶାସନ ।
- Reported by:
- PRADEEP MAHANTY , MADHUSUDAN MISHRA
