କ୍ଷୀରରେ ମିଶୁଛି ସୋଡ଼ା, କେମିକାଲ, ଦୂଷିତ ଜଳ ! ଚଢ଼ାଉ ବେଳେ ମିଳିଲା ସୁରାକ୍

ନକଲି ...ନକଲି...ଆଉ ନକଲି... ଯେଉଁଠି ହାତ ରଖିବେ ବାହାରିବ ପୁଳା ପୁଳା ନକଲି ସାମଗ୍ରୀ । କେତେବେଳେ ଖାଇବା ତେଲ, ହଳଦୀ ଗୁଣ୍ଡ ତ ପୁଣି କେତେବେଳେ ମସଲା ଗୁଣ୍ଡ ଠୁ ନେଇ ନଡ଼ିଆ ତେଲ, ରାଶିତେଲ ଯାଏ । ସବୁଠି ଅପମିଶ୍ରଣ...ଶସ୍ତା ପାଇଁ ହିନସ୍ତା ହେଉଛନ୍ତି ଲୋକେ । ଖାଦ୍ୟ ନାଁରେ ଖାଉଛନ୍ତି ବିଷ ।

ବର୍ତ୍ତମାନ ପୁଣି ଆଇ ଏକ ନକଲି ରାକେଟ୍‌ର ପର୍ଦ୍ଦାଫାଶ ହୋଇଛି । ଏଥର କିନ୍ତୁ କ୍ଷୀରକୁ ଛାଡ଼ିନାହାନ୍ତି ଖାଦ୍ୟ ଦଲାଲ । କଟକ ଜଗତପୁର ଥାନା ଆତୋଡ଼ା ଛକରେ ଥିବା ପ୍ରୋସେସିଂ ୟୁନିଟରେ ଚଢ଼ାଉ । କ୍ଷୀରରେ ଅପମିଶ୍ରଣ ଅଭିଯୋଗରେ ଚଢାଉ କରିଛି ପୋଲିସ ଓ ଖାଦ୍ୟ ନିରାପତ୍ତା ବିଭାଗ।

ଅଧିକ ପଢ଼ନ୍ତୁ: ରେଶମ ସହରରେ ବଢୁଛି ବିଷ ବେପାର; ଏବେ ମୁଣ୍ଡ ଟେକିଛି ନକଲି ଗୁଟଖା...

ପ୍ରୋସେସିଂ ୟୁନିଟ୍ ସିଲ୍ କରିବା ସହ ପରୀକ୍ଷା ପାଇଁ ସାମ୍ପଲ ପଠାଇଛି ଖାଦ୍ୟ ନିରାପତ୍ତା ବିଭାଗ । କ୍ଷୀର ପ୍ୟାକେଟରେ ଖାଇବା ସୋଡ଼ା, କେମିକାଲ, ଦୂଷିତ ଜଳ ଏବଂ ଲୁଣ ମିଶା ଯାଉଥିବା ରେଡ୍ ବେଳେ ଜଣାପଡିଛି । କେବଳ କ୍ଷୀର ନୁହେଁ ଦହି ଏବଂ ଲସି ମଧ୍ୟ ଏଠାରେ ପ୍ରସ୍ତୁତ କରାଯାଇ କଟକ, କେନ୍ଦ୍ରାପଡା, ଯାଜପୁର, ପୁରୀ ଜିଲ୍ଲାକୁ ଚାଲାଣ ହେଉଥିଲା । ମାମଲାରେ ସଂସ୍ଥାର ମାଲିକଙ୍କୁ ପୋଲିସ ଅଟକ ରଖି ପଚରାଉଚରା କରୁଛି ।

ସେପଟେ ଗତ କିଛିଦିନ ତଳେ ବ୍ରହ୍ମପୁର ବଡବଜାର ଅଞ୍ଚଳରେ ଧରାପଡିଥିଲା ନକଲି ନଡିଆ ତେଲ । ଦୂରରୁ ନାମୀଦାମୀ ଅସଲି ବ୍ରାଣ୍ଡ ଭଳି ଦିଶୁଥିଲେ ଅପମିଶ୍ରଣ ତେଲର ନାଁ ରହିଥିଲା ଶିବାନୀ । ବ୍ରାଣ୍ଡେଡ କଂପାନୀର ତେଲ ଆଣି ଅପମିଶ୍ରଣ କରି ତିଆରି କରାଯାଉଥିଲା ନକଲି ତେଲ । ମୁନାଫା କମାଇବା ପାଇଁ ଲୋକାଲ ବ୍ରାଣ୍ଡରେ ଏହାକୁ ପ୍ରସ୍ତୁତ କରି ଲୋକଙ୍କୁ ଶସ୍ତାରେ ବିକ୍ରି କରାଯାଉଥିବା ବେଳେ ଧରାପଡିଛି । ଯେଉଁଥିରେ ପାରାଫିନ୍, ମୋବିଲ ଓ ପୋଡା ତେଲ ମିଶେଇ ମାର୍କେଟକୁ ଛଡାଯାଉଥିଲା ।