ମୁମ୍ବାଇରେ ବି ଚମକିଲା ଓଡ଼ିଶାର ଶିଳ୍ପ ଅଭିବୃଦ୍ଧି ଭିଜନ୍, ଇନଭେଷ୍ଟର୍ସଙ୍କ ସହ ରୋଡ୍ ସୋ’ କଲେ ରାଜ୍ୟ ସରକାର

ରିଲାଏନ୍ସ, ଟାଟା, ଜେଏସ୍ଡବ୍ଲୁ, ବିର୍ଲା ଗ୍ରୁପ୍, ପାର୍ଲେ ଆଗ୍ରୋ । ଏମିତି ଅନେକ ବଡ଼ ବଡ଼ ଶିଳ୍ପ ସଂସ୍ଥାର ମୁଖିଆ ଓ ସେମାନଙ୍କ ପ୍ରତିନିଧିଙ୍କୁ ଭେଟି ଓଡ଼ିଶାରେ ନିବେଶ ପାଇଁ ନିମନ୍ତ୍ରଣ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମୁମ୍ବାଇରେ ୨ ଦିନିଆ ଇନଭେଷ୍ଟର୍ସ ମିଟ୍ ରୋଡ୍ ସୋ ଅବସରରେ ବିସ୍ତୃତ ସୂଚନା ଦେଇ ମୁଖ୍ୟମନ୍ତ୍ରୀ କହିଛନ୍ତି- ଆସନ୍ତାବର୍ଷ ଓଡ଼ିଶାକୁ ୫ ଲକ୍ଷ କୋଟିର ନିବେଶ ଆଣିବାର ଲକ୍ଷ୍ୟ ରହିଛି । ଏଥିପାଇଁ ଆସନ୍ତା ଜାନୁଆରୀ ୨୮ ଓ ୨୯ରେ ଭୁବନେଶ୍ବରରେ ହେବାକୁ ଯାଉଥିବା ଉତ୍କର୍ଷ ଓଡ଼ିଶା ମେକ୍-ଇନ୍ ଓଡ଼ିଶା କନକ୍ଲେଭ ୨୦୨୫କୁ ଆସିବାକୁ ସବୁ ପ୍ରମୁଖ ଶିଳ୍ପ ସଂସ୍ଥାମାନଙ୍କୁ ଆମନ୍ତ୍ରଣ କରିଛୁ ।

ଯେହେତୁ ଓଡ଼ିଶାରେ ପୁଞ୍ଜିନିବେଶ ପାଇଁ ଭରପୁର ସମ୍ଭାବନା ରହିଛି ଓ ୮.୫ ପ୍ରତିଶତ ବିକାଶ ହାରରେ ରାଜ୍ୟ ଆଗକୁ ଯାଉଛି ତେଣୁ ନିବେଶମାନେ ଆଗ୍ରହ ଦେଖାଇଛନ୍ତି । ରାଜ୍ୟରେ ପର୍ଯ୍ୟାପ୍ତ ପ୍ରାକୃତିକ ଖଣିଜ ପଦାର୍ଥ, କୋଷ୍ଟ ଲାଇନ୍ ଓ ବନ୍ଦର ଥିବାରୁ ଓଡ଼ିଶା ଆଗାମୀ ଦିନରେ ଇଣ୍ଡଷ୍ଟ୍ରି ହବ୍ ହେବାକୁ ଯାଉଛି । ଆଇଟି, ଟେକ୍ସଟାଇଲସ୍, ଅକ୍ଷୟ ଶକ୍ତି, ପ୍ଲାଷ୍ଟିକ୍ ଓ କେମିକାଲ୍ସ ଓ ପେଟ୍ରୋକେମିକାଲସ୍ କ୍ଷେତ୍ରକୁ ରାଜ୍ୟ ସରକାର ଅଧିକ ପ୍ରାଧାନ୍ୟ ଦେଉଛନ୍ତି ।

ମୁମ୍ବାଇରେ ୩ଶହରୁ ଅଧିକ ନିବେଶକଙ୍କ ସହ ରୋଡ୍ ସୋ ସଫଳ ହୋଇଛି ଓ ଆଗାମୀ ଦିନରେ ଓଡ଼ିଶାକୁ ଅଧିକ ପୁଞ୍ଜିନିବେଶକାରୀ ଆସିବେ ବୋଲି ଦୃଢ ଆଶା ପୋଷଣ କରିଛନ୍ତି ଶିଳ୍ପମନ୍ତ୍ରୀ ସଂପଦ ସ୍ବାଇଁ । ତାସହ ଶିଳ୍ପମନ୍ତ୍ରୀ କହିଛନ୍ତି- ପୂର୍ବ ସରକାର ଅମଳରେ କେବଳ ଶିଳ୍ପସଂସ୍ଥାଙ୍କ ସହ ଏମଓୟୁ ସହ ମେଟାଲ ବେସ୍‌ଡ ଇଣ୍ଟଷ୍ଟ୍ରିକୁ ଗୁରୁତ୍ବ ଦିଆଯାଉଥିଲା, ହେଲେ ମୋହନ ସରକାର ଉତ୍ପାଦନ ସହ ଅଧିକ ନିଯୁକ୍ତି ସୁଯୋଗ ସୃଷ୍ଟି କରୁଥିବା କ୍ଷେତ୍ର ଯେମିତିକି ଟେକ୍ସଟାଇଲ୍ସ, ଗାର୍ମେଣ୍ଟ, ଫାର୍ମା, ଫୁଡ୍ ପ୍ରୋସେସିଂ ଓ ଆଗ୍ରୋ ବେସଡ ଶିଳ୍ପସଂସ୍ଥାଙ୍କୁ ଗୁରୁତ୍ବ ଦେଉଛନ୍ତି।

ଏସବୁ ସଂସ୍ଥାର ମୁଖ୍ୟଙ୍କ ସହ ୱାନ ଟୁ ୱାନ୍ ଆଲୋଚନା ବି କରିଛନ୍ତି ମୁଖ୍ୟମନ୍ତ୍ରୀ । ଏହାଛଡ଼ା ଦିନକ ତଳେ ଇଣ୍ଡିଆ କେମ୍ ସମ୍ମିଳନୀରେ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡାଙ୍କ ଉପସ୍ଥିତିରେ ଓଡ଼ିଶା ସହ ଗୁଜରାଟ ଓ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମାନେ ବିଭିନ୍ନ କେମିକାଲ୍ସ ଇଣ୍ଟଷ୍ଟ୍ରୀଙ୍କ ସହ ପୁଞ୍ଜିନିବେଶ ନେଇ ଆଲୋଚନା କରିଛନ୍ତି । ଓଡ଼ିଶାରେ ପାରାଦୀପ, ଗୋପାଳପୁର ଓ ଧାମରାରେ ପୁଞ୍ଜି ନିବେଶ ପାଇଁ ନିବେଶକ ମନ ବଳାଇଥିବା ସୂଚନା ଦେଇଛନ୍ତି ଶିଳ୍ପମନ୍ତ୍ରୀ ।

ଜାନୁଆରୀରେ ଉତ୍କର୍ଷ ଓଡ଼ିଶା ମେକ୍-ଇନ୍ ଓଡ଼ିଶା କନକ୍ଲେଭ ୨୦୨୫ ପାଇଁ ପୂର୍ବରୁ ଦିଲ୍ଲୀରେ ବି ରୋଡ୍ ସୋ କରିଥିଲେ ଓଡ଼ିଶା ସରକାର । ଆଗକୁ ହାଇଦ୍ରାବାଦ୍, ବେଙ୍ଗଳୁରୁ ଓ ୟୁରୋପରେ ବି ନିବେଶକ ସମ୍ମିଳନୀ କରିବା ଯୋଜନାରେ ଅଛନ୍ତି ରାଜ୍ୟ ସରକାର ।