NIT Rourkela: ଭାରତୀୟ ନୌସେନାକୁ ସଶକ୍ତ କରିବା ପାଇଁ ଓଡ଼ିଶାରେ ଚାଲିଛି ଗବେଷଣା, ଶତ୍ରୁ ଆଖିରେ ଧୂଳି ଦେବ ଭାରତୀୟ ନୌସେନାର ବୁଡ଼ାଜାହାଜ

ରାଉରକେଲା NITରେ ଦେଶର ପ୍ରଥମ ଶିକ୍ଷାନୁଷ୍ଠାନ ଭାବେ ଚାଲିଛି ଅଭିନବ ପ୍ରତିରକ୍ଷା ଗବେଷଣା । ସମୁଦ୍ର ଗର୍ଭରେ ଭାରତୀୟ ନୌସେନାର ବୁଡ଼ାଜାହାଜକୁ ଶତ୍ରୁର ନଜରରୁ ରକ୍ଷା କରିପାଇଁ ଜାରି ରହିଛି ପ୍ରଶିକ୍ଷଣ । ଏକ ସ୍ବତନ୍ତ୍ର ଟାଇଲ୍ସ ତିଆରି କରିବାକୁ ଅଣ୍ଡରୱାଟର୍ ଏକୋଷ୍ଟିକ୍ ଟେଷ୍ଟ୍ ଫ୍ୟାସିଲିଟିରେ ଚାଲିଛି ପରୀକ୍ଷା ନିରୀକ୍ଷା । ଶତ୍ରୁ ଆଖିରେ ଧୂଳି ଦେବ ଭାରତୀୟ ନୌସେନାର ବୁଡ଼ାଜାହାଜ ।

ଓଡ଼ିଶା ମାଟିରେ ଚାଲିଛି ଅଭିନବ ଜ୍ଞାନକୌଶଳର ବଡ଼ ଗବେଷଣା । ଦେଶର ଏକମାତ୍ର ଶିକ୍ଷାନୁଷ୍ଠାନ ଭାବେ ରାଉରକେଲା NIT ପାଇଛି ସଫଳତା । ଏଠାରେ ରହିଛି ଡିଫେନ୍ସ ଗ୍ରେଡ୍‌ର ଅଣ୍ଡରୱାଟର୍ ଏକୋଷ୍ଟିକ୍ ଟେଷ୍ଟ୍ ଫ୍ୟାସିଲିଟି । ରାଉରକେଲା ସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଟେକନୋଲୋଜି- NITରେ ନିର୍ମିତ ଏହି ପରୀକ୍ଷାଗାରରେ ଗୁରୁତ୍ବପୂର୍ଣ୍ଣ ଗବେଷଣା ଜାରି ରହିଛି ।

ଏହା ନୌସେନାର ଶକ୍ତିବୃଦ୍ଧି କରି ଆତ୍ମନିର୍ଭର ଭାରତକୁ ବଳ ଦେବା ସହ ସମୁଦ୍ର ଭିତରେ ତୈଳ ସନ୍ଧାନ ଭଳି ଗବେଷଣାକୁ ବି ସହଜ କରିବ । ତେବେ DRDO ସହଯୋଗରେ ଚାଲିଥିବା ଏହି ପରୀକ୍ଷା ନୀରିକ୍ଷାର ପ୍ରଥମ ଉଦ୍ଦେଶ୍ୟ ହେଉଛି- ବୁଡ଼ାଜାହାଜର ଲୁଚି ରହିବା କ୍ଷମତା ବୃଦ୍ଧି କରିବା । ସେଥିପାଇଁ ଅଣ୍ଡରୱାଟର୍ ଟାଇଲ୍ସ ବା ସବମରିନ୍ ଟାଇଲ୍ସ ଡିଜାଇନ୍ ଓ ଏକ୍ସପେରିମେଣ୍ଟ କରୁଛି ରାଉରକେଲା NIT।

ଏହି ଟାଇଲ୍ସରେ ସବମରିନ୍ ତିଆରି ହେବାପରେ , ଶତ୍ରୁର ସୋନାର୍ ରାଡାର୍ ଏହାକୁ ଚିହ୍ନଟ କରିପାରିବ ନାହିଁ । ଏହି ନୂଆ ଟେକନୋଲୋଜି କେବଳ ଭାରତ ନୁହେଁ, ଫ୍ରାନ୍ସ ନୌସେନା ପାଇଁ ମଧ୍ୟ ଉପଯୋଗ ହେବ । ପରୀକ୍ଷାମୂଳକ ଭାବେ ଏକ ଛୋଟ ଆକାରର ଟାଇଲ୍ସକୁ, ପାଣି ଭର୍ତ୍ତି ସିଲିଣ୍ଡର୍ ଆକୃତିର ଷ୍ଟେନଲେସ୍ ଷ୍ଟିଲ୍ ନିର୍ମିତ ଯନ୍ତ୍ର ଭିତରେ ରଖାଯାଇ, ଏହାର ବିଭିନ୍ନ ବୈଶିଷ୍ଟ୍ୟ ଯାଞ୍ଚ କରାଯାଉଛି ।

ଏଥିପାଇଁ ଖର୍ଚ୍ଚ ହେଉଛି ୧.୪ କୋଟି ଟଙ୍କା । ଶତ୍ରୁ ନଜରରୁ ଲୁଚି ରହିବା ସହିତ ସମୁଦ୍ରର ଅକାତ କାତ ପାଣି ଭିତରେ ଶତ୍ରୁ ଗତିବିଧିର ସନ୍ଧାନ କରିବା ପାଇଁ ବି ଏଠାରେ ପରୀକ୍ଷା ନିରୀକ୍ଷା ଚାଲିଥିବା ସୂଚନା ଦେଇଛନ୍ତି ରାଉରକେଲା NIT ନିର୍ଦ୍ଦେଶକ । ଅନ୍ୟପଟେ ଏଠାରେ ଛୋଟରୁ ଛୋଟ ଶବ୍ଦ ତରଙ୍ଗକୁ ବି ଚିହ୍ନଟ କରିବା ପାଇଁ ଚେଷ୍ଟା ଜାରି ରହିଛି ।

ଅଧିକ ପଢ଼ନ୍ତୁ : ଚାମ୍ପିଅନ୍ସ ଟ୍ରଫି ୨୦୨୫ ପରେ ‘ବାଜ୍‌ବଲ୍‌’ ଦୃଷ୍ଟିକୋଣର ଘଟିବ କି ଅନ୍ତ ?