ତାତିର ତାଉ ବଢୁଥିବା ବେଳେ ଲୋକଙ୍କ ଚିନ୍ତା ବଢାଇଛି ବିଜୁଳି ବିଭ୍ରାଟ । କେଉଁଠି ବାରମ୍ବାର ବିଦ୍ୟୁତ୍ କାଟ୍ ତ କେଉଁଠି ପୁଣି ଲୋ' ଭୋଲଟେଜ୍ ସମସ୍ୟାରେ ଦହଗଞ୍ଜ ହେଉଛନ୍ତି ଲୋକେ। ପୁଣି କେଉଁଠି ଟାଟା ପାୱାରର ବକେୟା ବିଜୁଳି ବିଲ୍ ଆଦାୟ ଚକ୍କରରେ ପୁରା ଗାଁକୁ ଅନ୍ଧାରରେ ରହିବାକୁ ପଡୁଛି । ଯାହାକୁ ନେଇ ଅସନ୍ତୋଷ ଆନ୍ଦୋଳନର ରୂପ ନେଲାଣି । ସହର ହେଉ କି ଗାଁ, ସବୁଠି ସମାନ ଦଶା । ଚୈତ୍ରରେ ଖରାର କୋପଠୁ ବଳି ଗଲାଣି ବିଜୁଳି ବିଭ୍ରାଟ ଜନିତ ସମସ୍ୟା ।
ଉଦୁଉଦିଆ ଖରାବେଳେ ଝାଞ୍ଜିମାଡ଼ ହେଉ କିମ୍ବା ରାତିର ଗୁଳୁଗୁଳି । ତାତିର ତାଉ ବଢୁ ବଢୁ ରାଜ୍ୟର କୋଣ ଅନୁକୋଣରେ ଦେଖାଗଲାଣି ଉତ୍କଟ ବିଜୁଳି ସମସ୍ୟା । ଏହାର ସ୍ପଷ୍ଟ ଚିତ୍ର ଦେଖିବାକୁ ମିଳିଛି ନବରଙ୍ଗପୁରର ରାଇଘର ଅଞ୍ଚଳରେ । ଏଠାରେ ଗତକାଲି ଦିନ ୧୨ଟାରୁ ଗାଏବ୍ ହୋଇଯାଇଥିଲା ବିଜୁଳି । ଫଳରେ ବ୍ଳକର ପ୍ରାୟ ୨୬ଟି ପଞ୍ଚାୟତର ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ ।
Also Read
ସେହିଭଳି ରାଇଘର ଅଞ୍ଚଳରେ ବିଜୁଳି ବିଭ୍ରାଟର ମୂଳ କାରଣ ହେଲା, ଲୋ ଭୋଲଟେଜ୍ ସମସ୍ୟା । ସ୍ଥାନୀୟ ଚାଷୀଙ୍କ ଅଭିଯୋଗ ଅନୁଯାୟୀ, ଏଠାରେ ପ୍ରାୟ ୬ ମାସ ଧରି ଏହି ସମସ୍ୟା ଲାଗି ରହିଛି । ଏଥିପ୍ରତି ବିଦ୍ୟୁତ୍ ବିଭାଗ ଦୃଷ୍ଟି ଦେଉନଥିବାରୁ ଚାଷୀମାନେ ସର୍ଗୁଲି ଛକରେ ପ୍ରାୟ ୩୦ ଘଣ୍ଟା ଧରି ରାସ୍ତାରୋକ ସହ ପ୍ରତିବାଦ କରିଥିଲେ । ଶେଷରେ ପ୍ରଶାସନର ବୁଝାସୁଝା ପରେ ଆଜି ଆନ୍ଦୋଳନ ହଟିଥିଲା । ତେବେ ଚାଷୀଙ୍କୁ ଏପ୍ରିଲ ୬ତାରିଖ ସୁଦ୍ଧା ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ମିଳିଛି ।
ଅଧିକ ପଢ଼ନ୍ତୁ: ପର୍ଯ୍ୟଟକ ସାଜିଛନ୍ତି ନୀଳଜହର ବାହକ, ଟୁରିଷ୍ଟ ହୋଇ ଆସୁଛନ୍ତି...ଗଂଜେଇ ଧରି ଫେରୁଛନ୍ତି
ସେପଟେ ସୁବର୍ଣ୍ଣପୁର ଜିଲ୍ଲାରେ ଟାଟା ପାୱାର ମନମାନି କରୁଥିବା ଅଭିଯୋଗ ହୋଇଛି । ତତଲା କଢ଼େଇରେ ସିଝି ହେଉଥିବା ବୀରମହାରାଜପୁର ବ୍ଲକ ବହଳପଦର ଗ୍ରାମବାସୀ ବିଦ୍ୟୁତ୍ ସେବାରୁ ବଞ୍ଚିତ ରହିଛନ୍ତି ।
ଲୋକଙ୍କ ଅଭିଯୋଗ ହେଲା, ବିଦ୍ୟୁତ ବିଭାଗ ପକ୍ଷରୁ ବକେୟା ବିଲ୍ ବାବଦକୁ ୨-୨ ହଜାର ଟଙ୍କା ପୈଠ କରିବାକୁ କୁହାଯାଇଥିଲା । ତେବେ ଗାଁ ଲୋକେ ହଜାରେ ଟଙ୍କା ଲେଖାଏଁ ଦେବେ ବୋଲି କହିଥିଲେ । କିନ୍ତୁ, ଏହାକୁ ଗ୍ରହଣ ନକରି ଟାଟା ପାୱାର ପକ୍ଷରୁ ଗତ ୨୯ ତାରିଖ ଦିନ ୧୨ଟାରୁ ସାରା ଗାଁକୁ ବିଜୁଳି ସେବା ବିଚ୍ଛିନ୍ନ କରି ଦିଆଯାଇଥିଲା ।
ଏହାପରେ ଆନ୍ଦୋଳନକୁ ଓହ୍ଲାଇଥିଲେ ସ୍ଥାନୀୟ ଲୋକେ । ପୋଲିସ୍ ପହଞ୍ଚି ଆନ୍ଦୋଳନକାରୀ ଓ ଟାଟା ପାୱାର ଅଧିକାରୀଙ୍କ ସହ ଆଲୋଚନା କରିବା ପରେ ପ୍ରାୟ ୨୪ ଘଣ୍ଟା ପରେ ବିଦ୍ୟୁତ ସେବା ସ୍ବାଭାବିକ ହୋଇଥିଲା । ତେବେ ଏ ନେଇ ଟାଟା ପାୱାର ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ ।
ବାଲେଶ୍ବର ସହର ଉପକଣ୍ଠ ରଣସାହି ଅଞ୍ଚଳରେ ମଧ୍ୟ ମାର୍ଚ୍ଚ ଦ୍ବିତୀୟ ସପ୍ତାହରେ ଦେଖା ଦେଇଥିଲା ଅନୁରୂପ ସ୍ଥିତି । କିଛି ଉପଭୋକ୍ତାଙ୍କ ବିଦ୍ୟୁତ୍ ବିଲ୍ ବକେୟା ଥିବାରୁ ପୁରା ଗାଁକୁ ସପ୍ତାହେ ଧରି ଅନ୍ଧାରରେ ରହିବାକୁ ପଡ଼ିଥିଲା । ଏଠାରେ ମାର୍ଚ୍ଚ ୧୧ ତାରିଖ ସଂଧ୍ୟାରୁ ବିଜୁଳି ସେବା ବିଚ୍ଛିନ୍ନ ହୋଇଥିବା ବେଳେ ମାର୍ଚ୍ଚ ୧୯ରେ ସ୍ବାଭାବିକ ହୋଇଥିଲା । କିଛିଦିନ ତଳେ ଉପମୁଖ୍ୟମନ୍ତ୍ରୀ ତଥା ଶକ୍ତିମନ୍ତ୍ରୀ କେଭି ସିଂହଦେଓ ବକେୟା ବିଲ୍ ପାଇଁ ଖରାଦିନେ ବିଦ୍ୟୁତ କାଟ୍ ହେବ ନାହିଁ ବୋଲି ସୂଚନା ଦେଇଥିଲେ । ତା ସତ୍ତ୍ବେ ବିଭିନ୍ନ ଅଞ୍ଚଳରେ ଏଭଳି ବିଦ୍ୟୁତ କାଟ୍ ଲୋକଙ୍କ ସମସ୍ୟା ବଢ଼ାଇ ଦେଇଛି ।