LIVE TV
ରାଜ୍ୟରେ ନୂଆ ସରକାର ଆସିବା ପୂର୍ବରୁ କାହିଁକି ଶ୍ରୀମନ୍ଦିର ପରିସରରେ ଲାଗିଥିବା ଆଲୋକୀକରଣ ବ୍ୟବସ୍ଥାକୁ ହଠାତ୍ ବନ୍ଦ କରିଦିଆଗଲା? କିଏ ଏବଂ କାହା ନିର୍ଦ୍ଦେଶରେ ଖୋଲି ଦିଆଗଲା ଲାଇଟ୍ ସବୁକୁ ? ଏବେ ଏଭଳି ନାନା ପ୍ରଶ୍ନ ଉଠିବା ସହ ରାଜ୍ୟବ୍ୟାପୀ ଭକ୍ତ ଓ ସେବାୟତଙ୍କ ମଧ୍ୟରେ ଅସନ୍ତୋଷ ପରେ ସରକାରୀ ସ୍ତରରେ ଦେଖାଦେଇଛି ତତ୍ପରତା ।
ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ ପ୍ରଦୀପ ଜେନା । ଏନେଇ ପୁରୀ ଜିଲ୍ଲାପାଳଙ୍କୁ ତଦନ୍ତ କରିବା ସହ କାର୍ଯ୍ୟାନୁଷ୍ଠାନ ପାଇଁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ଏହାର ଯେପରି ସ୍ଥାୟୀ ସମାଧାନ ହୋଇପାରିବ ଏବଂ ପୁନଃ ଆଲୋକୀକରଣ ବ୍ୟବସ୍ଥା କରାଯିବ, ସେଦିଗରେ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିବା ନେଇ ସୋସିଆଲ୍ ମିଡିଆ Xରେ ମୁଖ୍ୟ ଶାସନ ସଚିବ ପ୍ରଦୀପ ଜେନା ଉଲ୍ଲେଖ କରିଛନ୍ତି ।
Also Read
ତଦନ୍ତ ନିର୍ଦ୍ଦେଶ ପରେ ଶ୍ରୀମନ୍ଦିରରେ ଆଲୋକୀକରଣ ବନ୍ଦ ଘଟଣାରେ ୪ ଅଟକ ରହିଛନ୍ତି । ଲାଇଟ ଲଗାଇଥିବା ଇଭେଣ୍ଟ ସଂସ୍ଥାର ୪ କର୍ମଚାରୀଙ୍କୁ ଅଟକ ରଖାଯାଇଛି । ୪ ଜଣଙ୍କୁ ଅଟକ ରଖି ତଦନ୍ତ ଚାଲିଥିବା କହିଛନ୍ତି ଜିଲ୍ଲାପାଳ । ତଦନ୍ତ ପାଇଁ ପୁରୀ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଥିଲେ ମୁଖ୍ୟ ସଚିବ ।
ନିର୍ବାଚନ ଫଳାଫଳ ଘୋଷଣା ପରଠୁ ବଡଦେଉଳକୁ ଆଲୋକୀକରଣ କରୁଥିବା ଫୋକସ୍ ଲାଇଟକୁ ଇଭେଣ୍ଟ କମ୍ପାନୀ ପକ୍ଷରୁ ଖୋଲି ଦିଆଯାଇଥିବା ଅଭିଯୋଗ ହୋଇଛି । ପରିକ୍ରମା ପ୍ରକଳ୍ପ ସମୟରେ ଶ୍ରୀମନ୍ଦିରର ସୌନ୍ଦର୍ଯ୍ୟକରଣ, ବଡ଼ଦାଣ୍ଡ, ମେଘନାଦ ପ୍ରାଚୀରର ଆଲୋକୀକରଣ ପାଇଁ ବ୍ୟାପକ ଫୋକସ ଲାଇଟ ଲଗାଯାଇଥିଲା ।
ସେପଟେ ପାଣ୍ତିଆନଙ୍କୁ ନେଇ ବଡ଼ ଅଭିଯୋଗ ଆଣିଛନ୍ତି ଶ୍ରୀମନ୍ଦିର ସେବାୟତ । ଶ୍ରୀମନ୍ଦିରକୁ ଖେଳଘର ଭାବୁଥିଲା ବିଜେଡି ସରକାର । ମହାପ୍ରଭୁ ଥିଲେ ତାଙ୍କ ପାଇଁ ଖେଳନା । କାଳେ ପାଣ୍ଡିଆନଙ୍କ ପାଇଁ ବିଳମ୍ବ ହେଉଥିଲା ମହାପ୍ରଭୁ ଶ୍ରୀ ଜଗନ୍ନାଥଙ୍କ ନୀତିକାନ୍ତି । ଶ୍ରୀମନ୍ଦିରକୁ ପାଣ୍ଡିଆନ ଯିବାବେଳେ କାଳେ ୧୦ ମିନିଟ ଘୁଞ୍ଚିଯାଉଥିଲା ଚତୁର୍ଦ୍ଧାମୂର୍ତ୍ତିଙ୍କ ମଙ୍ଗଳ ଆଳତି ।
ଅବକାଶନୀତିରେ ବି କରାଯାଉଥିଲା ବିଳମ୍ବ । ଏଭଳି ଅଭିଯୋଗ ଆଣିଛନ୍ତି ଜଣେ ସେବାୟତ । ବିଜେଡି ନେତା ପାଣ୍ଡିଆନ୍ ଶ୍ରୀମନ୍ଦିରକୁ ଯିବା ସମୟରେ ଏମିତି ହେଉଥିବା ସେ କହିଛନ୍ତି । ଖାଲି ଏତିକି ନୁହେଁ, ଜଗନ୍ନାଥଙ୍କୁ ଧରି ଗାଁ ଗାଁରୁ ଚାଉଳ ସଂଗ୍ରହ କରିବା, ଶ୍ରୀମନ୍ଦିର ପରିସରରେ ମଠ ମନ୍ଦିର ଭାଙ୍ଗିବା ଓ ରଥଯାତ୍ରା ବନ୍ଦ ପ୍ରସଙ୍ଗକୁ ନେଇ ଖୁବ୍ ବର୍ଷିଛନ୍ତି ସେବାୟତ ।
୨୪ ବର୍ଷର ଶାସନ କାଳ ଭିତରେ ସରକାର କରିଥିବା ସମସ୍ତ ଅନ୍ୟାୟକୁ ଗୋଟିଗୋଟି କରି ବଖାଣିଛନ୍ତି । ସେବାୟତଙ୍କ କଥା ଯେମିତି କହିଦେଉଛି, ଗର୍ବଗଞ୍ଜନେ ନରହରି ଗର୍ବ ନସହନ୍ତି କାହାରି । ବୋଧହୁଏ ମହାପ୍ରଭୁଙ୍କ ପାଖରେ ସରକାରଙ୍କ ଏପରି ଅଭିମୁଖ୍ୟ ତାଙ୍କ ପାଇଁ ମହଙ୍ଗା ପଡ଼ିଛି । ୨୪ ବର୍ଷର ସରକାର ଆଜି ଧରାଶାୟୀ ହୋଇଛି ।
ଓଡ଼ିଶା ମାଟିର ସାହସ, ପ୍ରତ୍ୟେକ ଓଡ଼ିଆର ମୁରବୀ, ଯାହା ନାଁକୁ ସୁମରଣା କରି ଓଡ଼ିଆ ଲୋକଟିଏ ତା’ ଦିନ ଆରମ୍ଭ କରେ । ତାଙ୍କୁ ଏପରି ଅସମ୍ମାନ ଯେମତି ଏ ସରକାର ପାଇଁ କାଳ ହୋଇଛି । ସାଢ଼େ ଚାରିକୋଟି ଏପରି ଜଣେ ଲୋକ ପାଇଁ ପୂରା ଦଳକୁ ପ୍ରତ୍ୟାଖାନ କରିଛନ୍ତି ।
