ଟାଟା ପାୱାର ନେଇଗଲା ଜୀବନ, ପୁଅକୁ ଝରିଝୁରି ବିଛଣା ଲଗା ହୋଇଗଲାଣି ମା’

ମା’ ତା’ ପୁଅକୁ ଝରିଝୁରି ବିଛଣା ଲଗା ହୋଇଗଲାଣି । ଜୀବନ ଜୀଇବା ପାଇଁ ସାଲାଇନ୍‌ ଲାଗିଛି । ମେଡିସନ୍‌ ବି ଚାଲିଛି । ହେଲେ ସବୁ କିଛି ଯେମିତି ତା’ର ଶେଷ ହୋଇଯାଇଛି । କେବଳ କୋଳ ଖାଲି ହୋଇନି । ସେ ଯେମିତି ସବୁ ଦେଖିପାରୁଥିଲେ ବି ତା’ ଦୁନିଆ ଅନ୍ଧାର ହୋଇଯାଇଛି । ଆଉ ଏ ମା’ର ସବୁ କିଛି ଛଡ଼ାଇ ନେଇଛି ଟାଟା ପାୱାର ।

ଯାଜପୁର ଜିଲ୍ଲା ଦାନଗଦି ବ୍ଲକ ବ୍ରାହ୍ମଣୀ ଗାଁରେ ନିଜ ଚାଷଜମିରେ କାମ କରୁଥିବା ବେଳେ ୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସି ୨୭ ବର୍ଷୀୟ ଯୁବକ ଜିତେନ୍ଦ୍ର କୁମାର ସାହୁଙ୍କ ଜୀବନ ଯାଇଛି । ଆଉ ଅସମୟରେ ଭେଣ୍ଡିଆ ପୁଅକୁ ହରାଇ ଭାଙ୍ଗିପଡିଛି ପୂରା ପରିବାର । ଘଟଣାକୁ ନେଇ ସମଗ୍ର ଅଞ୍ଚଳରେ ମଧ୍ୟ ଶୋକାକୂଳ ପରିବେଶ । ପୁଅକୁ ହରାଇ ମା’ ଏବେ ଶଯ୍ୟାସାୟୀ । ତେବେ ଜିତେନ୍ଦ୍ରଙ୍କ ମୃତ୍ୟୁ ପାଇଁ ଟାଟା ପାୱାରକୁ ଦାୟୀ କରିଛନ୍ତି ପରିବାର ଲୋକେ ଓ ଗ୍ରାମବାସୀ।

ସଠିକ୍ ଢଙ୍ଗରେ ବିଦ୍ୟୁତ୍ ଯୋଗାଣ, ଉପକରଣ ମରାମତି ଓ ନିୟମିତ ବ୍ୟବଧାନରେ ତଦାରଖ ହେଉନଥିବାରୁ ବିଦ୍ୟୁତ୍ ତାର ସଂସ୍ପର୍ଶରେ ଆସି ଅନେକ ଲୋକଙ୍କ ଜୀବନ ଯାଉଛି । ଯାଜପୁର ଜିଲ୍ଲାର ବ୍ୟାସନଗର, ସୁକିନ୍ଦା, କଳିଙ୍ଗନଗର ଶିଳ୍ପାଞ୍ଚଳ, ଦାନଗଦି, କୋରେଇ, ପାଣିକୋଇଲି ଆଦି ବିଭିନ୍ନ ଅଞ୍ଚଳରେ ଏଭଳି ସମସ୍ୟା ଦେଖାଦେଇଛି । ଯାହାଫଳରେ ଅନେକ ଲୋକଙ୍କ ଅକାଳରେ ମୃତ୍ୟୁ ଘଟୁଛି ।