Fevikwik Horror: ସେବାଶ୍ରମ ହଷ୍ଟେଲରେ ଅଘଟଣ; ୮ ଜଣ ଛାତ୍ରଙ୍କ ଆଖିରେ ଫେଭିକ୍ବିକ୍

ସେବାଶ୍ରମ ହଷ୍ଟେଲରେ ଅଘଟଣ। ଆଖିରେ ଫେଭିକ୍ବିକ୍ ଅଠା ଲାଗି ୮ ଜଣ ଛାତ୍ର ଅସୁସ୍ଥ। ଏଭଳି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ୍‌ ସଲାଗୁଡ଼ା ସେବାଶ୍ରମ ବିଦ୍ୟାଳୟରେ!

ସେବାଶ୍ରମ ହଷ୍ଟେଲରେ ରାତିରେ ଶୋଇଥିବା ବେଳେ କିଛି ଛାତ୍ର, ଅନ୍ୟ ୮ ଜଣ ଛାତ୍ରଙ୍କ ଆଖିରେ ଫେଭିକ୍ବିକ୍ ଅଠା ପକାଇ ଦେଇଥିବା ଅଭିଯୋଗ ହୋଇଛି।

ଶୁକ୍ରବାର ସକାଳେ ପୀଡିତ ପିଲାମାନେ ଯନ୍ତ୍ରଣାରେ କାନ୍ଦି ଉଠିବା ଏବଂ ଆଖି ଖୋଲି ନ ପାରିବାରୁ ଘଟଣାଟି ଜଣାପଡ଼ିଥିଲା। ହଷ୍ଟେଲ କର୍ତ୍ତୃପକ୍ଷ ଏବଂ ସାଥୀ ଛାତ୍ରମାନେ ସେମାନଙ୍କୁ ଚିକିତ୍ସା ପାଇଁ ତୁରନ୍ତ ପଠାଇଥିଲେ।

ପିଲାମାନଙ୍କୁ ପ୍ରଥମେ ଗୋଚ୍ଛାପଡ଼ା ମେଡିକାଲରେ ଭର୍ତ୍ତି କରାଯାଇଥିଲା, କିନ୍ତୁ ଅବସ୍ଥା ଗୁରୁତର ହେବାରୁ ସ୍ୱତନ୍ତ୍ର ଚିକିତ୍ସା ପାଇଁ ଫୁଲବାଣୀ ଜିଲ୍ଲା ମୁଖ୍ୟାଳୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।

ଛାତ୍ରମାନେ ଚିକିତ୍ସାଧୀନ ଅଛନ୍ତି ଏବଂ ସେମାନଙ୍କ ଉପରେ କଡ଼ା ଡାକ୍ତରୀ ତତ୍ତ୍ୱାବଧାନ ରହିଛି ବୋଲି ଅଧିକାରୀମାନେ ନିଶ୍ଚିତ କରିଛନ୍ତି। କନ୍ଧମାଳ DWO ଚିକିତ୍ସାଳୟରେ ପହଞ୍ଚି ପରିସ୍ଥିତି ସମୀକ୍ଷା କରିଛନ୍ତି।

ଏହା ସେବାଶ୍ରମ ହଷ୍ଟେଲରେ ତଦାରଖ ଏବଂ ଯୁବ ଛାତ୍ରମାନଙ୍କ ମଧ୍ୟରେ ମାନସିକ ପରିବେଶ ଉପରେ ଗମ୍ଭୀର ପ୍ରଶ୍ନ ଉଠାଇଛି। କେତେକ ମତ ଦିଅନ୍ତି ଯେ ଏହା ପିଲାମାନଙ୍କ ସହିତ ଏକ ପ୍ରାଙ୍କ (Prank) ହୋଇପାରେ, କିନ୍ତୁ ଏଭଳି ମାନସିକତା ବଢୁଥିବା ବେଳେ ଏହା ଏକ ଚିନ୍ତାଜନକ ପରିସ୍ଥିତି ସୃଷ୍ଟି କରିଛି।

ତେବେ ସେବାଶ୍ରମ ବିଦ୍ୟାଳୟ ଗୁଡ଼ିକରେ ପିଲାମାନେ ରହି ପାଠ ପଢ଼ିବା ପାଇଁ ହଷ୍ଟେଲ ଠାରୁ ଆରମ୍ଭ କରି ସମସ୍ତ ପ୍ରକାର ଆନୁସଙ୍ଗିକ ସୁବିଧା ଏବଂ ୱାର୍ଡ଼ନ ଠାରୁ ଆରମ୍ଭ କରି ହଷ୍ଟେଲ ସୁପରିଟେଣ୍ଡେଣ୍ଟ ପର୍ଯ୍ୟନ୍ତ ସମସ୍ତେ ନିୟୋଜିତ ରହୁଥିଲେ ମଧ୍ୟ କିଭଳି ସେବାଶ୍ରମ ହଷ୍ଟେଲରେ ଏହି ଅଘଟଣ ଘଟିଲା, ତାକୁ ନେଇଁ ଅନେକ ପ୍ରଶ୍ନ ଉଠୁଛି।