ସ୍ୱର୍ଗଦ୍ୱାରରେ ଲାଗୁ ହେବ ନୂଆ ବ୍ୟବସ୍ଥା, କାଠ ବଦଳରେ ଗୋବର ଘଷିରେ ହେବ ଶବଦାହ

କାଠ ନୁହେଁ ସ୍ବର୍ଗଦ୍ବାରରେ ଗୋବର ଘଷିରେ ହେବ ଶବ ଦାହ । ଧୀରେ ଧୀରେ ରାଜ୍ୟର ଅନ୍ୟ ଶ୍ମଶାନରେ ବି ଲାଗୁ ହେବ ଏ ବ୍ୟବସ୍ଥା । ଏନେଇ ପ୍ରସ୍ତୁତି ଆରମ୍ଭ କରିଛି ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ । ଏମିତିକି ଏ ଦିଗରେ ପ୍ରାରମ୍ଭିକ ପ୍ରସ୍ତୁତି ଚାଲିଥିବା ସୂଚନା ଦେଇଛନ୍ତି ବିଭାଗୀୟ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ । ମନ୍ତ୍ରୀ କହିଛନ୍ତି- ଏହା ଦ୍ୱାରା ଗଛ ବଞ୍ଚିବ, ପରିବେଶ ସୁରକ୍ଷା ହେବ, ଦାହ ଖର୍ଚ୍ଚ କମିବା ସହ ସହ ଗୋପାଳନ ଓ ଗୋସୁରକ୍ଷା ପ୍ରତି ଉତ୍ସାହ ବଢ଼ିବ । ଆବଶ୍ୟକତାକୁ ଦୃଷ୍ଟିରେ ରଖି ରାଜ୍ୟରେ ଥିବା ଗୋଶାଳା ଗୁଡିକକୁ ଗୋବରରୁ ଗୋବର କାଠ ତିଆରି ମେସିନ ଯୋଗାଇ ଦିଆଯିବ । ତେବେ ଏ ବ୍ୟବସ୍ଥା କିଭଳି ଗ୍ରହଣୀୟ ହେବ ସେ ନେଇ ଖୁବଶୀଘ୍ର ପୁରୀ ସ୍ୱର୍ଗଦ୍ୱାର ପରିଚାଳନା କମିଟି ଓ ବିଭିନ୍ନ ସାମାଜିକ ଅନୁଷ୍ଠାନ ଏବଂ ଗୋଶାଳାମାନଙ୍କ ସହ ଆଲୋଚନା କରାଯିବ ।

ତେଣେ ସ୍ବର୍ଗଦ୍ବାରରେ ଘଷିରେ ଶବଦାହକୁ ନେଇ ବିଭିନ୍ନ ମହଲରୁ ଆସିଲାଣି ମିଶ୍ର ପ୍ରତିକ୍ରିୟା । ସେବାୟତ ଓ ଜଗନ୍ନାଥ ସଂସ୍କୃତି ଗବେଷକ ଏହା ଉପରେ ଅସହମତି ପ୍ରକାଶ କରିଥିବା ବେଳେ ଅନେକ କିଛି ବର୍ଗ ସ୍ୱାଗତ ବି କରିଛନ୍ତି । ଜଗନ୍ନାଥ ସଂସ୍କୃତି ଗବେଷକ କହିଛନ୍ତି ହିନ୍ଦୁ ପରମ୍ପରାରେ ଶବଦାହ କାଠରେ କରାଯିବା ବିଧି ରହିଛି । ସେମିତି ବରିଷ୍ଠ ସେବାୟତଙ୍କ ମତରେ ଆମ ଧର୍ମ କି ସଂସ୍କୃତିରେ ଗୋବର ଘଷିରେ ଶବଦାହ କଥା ନାହିଁ । ତେଣେ ସ୍ବର୍ଗଦ୍ୱାରରେ ଶବ ଦାହରେ ନିୟୋଜିତ ମାଲବାହୀ ମାନେ ବି କହିଲେଣି ଘଷିରେ ଶବଦାହ କରିବା କାଠିକର ପାଠ । ତେଣେ ବୁଦ୍ଧୀଜୀବୀ ହରିଶଙ୍କର ମିଶ୍ର ସରକାରଙ୍କ ଏଭଳି ନିଷ୍ପତ୍ତିକୁ ସ୍ୱାଗତ କରି କହିଛନ୍ତି ଏହାଦ୍ବାରା ଗଛ ସୁରକ୍ଷା ହୋଇପାରିବ ଓ ପରିବେଶ ଉପରେ କୁ ପ୍ରଭାବ ବି ପଡ଼ିବ ନାହିଁ ।

ଏସବୁ ଭିତରେ ପ୍ରଶ୍ନ- କାଠ ବଦଳରେ ଗୋବର ଘସିରେ ଶବ ଦାହ ଫଳପ୍ରଦ ହେବ ତ ? ସଠିକ୍ ସମୟରେ ଆବଶ୍ୟକ ପରିମାଣର ଗୋବର ଘସି କାଠ ସରକାର ଯୋଗାଇ ପାରିବେ ତ ? ବର୍ଷା ଦିନେ ଏହା କେତେ ଉପଯୋଗୀ ହୋଇପାରିବ ? ଏଣେ ସୂଚନା ମୁତାବକ ସ୍ୱର୍ଗଦ୍ୱାରରେ ଦୈନିକ ପ୍ରାୟ ୬୦ରୁ ୭୦ଟି ଶବ ଦାହ ପାଇଁ ଆସୁଛି । ଗୋଟିଏ ଶବ ପାଇଁ ଦେଢରୁ ଦୁଇ କୁଇଣ୍ଟାଲ ଝାଉଁ କାଠ ଦରକାର ହେଉଛି। ଏଥିପାଇଁ ୪ହଜାର ଟଙ୍କା ପାଖାପାଖି ଖର୍ଚ୍ଚ ହେଉଛି । ତେଣେ ଗୋଶାଳା ମାଲିକଙ୍କ କହିବା କଥା ସମାନ ପରିମାଣରେ ଘସି କାଠରେ ବି ଶବ ଦାହ ହୋଇପାରିବ। ଓ ଏବାବଦରେ ମାତ୍ର ୧୨ଶହରୁ ୧୫ଶହ ଟଙ୍କା ଖର୍ଚ୍ଚ ପଡ଼ିବ । ପୂର୍ବରୁ ସେମାନେ ଏହାର ପ୍ରସ୍ତୁତି ଆରମ୍ଭ କରିଥିଲେ ହେଲେ ସରକାର ପ୍ରୋତ୍ସାହନ ନ ଦେବାରୁ ବନ୍ଦ କରିଦେଲେ ।

ବର୍ତ୍ତମାନ ସମୟରେ କାଠ, ଇଲେକ୍ଟ୍ରି ଓ ଗ୍ୟାସରେ ଶବଦାହ କରାଯାଇ ପାରୁଛି । ହରିଦ୍ୱାରରେ କାଠ ଘସିରେ ଶବ ଦାହ ହେଉଛି । ଉତ୍ତରପ୍ରଦେଶ, ରାଜସ୍ଥାନ, ଗୁଜୁରାଟ୍, ଦିଲ୍ଲୀ ଓ ବିହାର ଭଳି ରାଜ୍ୟ ସହ ଭୋପାଳ, ରାୟପୁର ଓ ପୁଣେ ଭଳି ସହରରେ ବି ଶବଦାହରେ ଗୋବର ଘଷିର ବ୍ୟବାହର ଆରମ୍ଭ ହୋଇଗଲାଣି । ତେଣୁ ଆମ ରାଜ୍ୟରେ ଏ ବ୍ୟବସ୍ଥା କେତେ ଗ୍ରହଣୀୟ ହେବା ତାକୁ ଏବେ ଅପେକ୍ଷା ।