LIVE TV
ଛତୁଆକୁ ନେଇ ବିଧାନସଭାରେ ଗଭୀର ଉଦବେଗ । ଗର୍ଭବତୀ ମହିଳା ଓ କଅଁଳ ପିଲାଙ୍କ ପୁଷ୍ଟିକର ଖାଦ୍ୟ ଛତୁଆକୁ ନେଇ ବରିଷ୍ଠ ବିଧାୟକଙ୍କ ତାଛଲ୍ୟ, ବ୍ୟବସ୍ଥାକୁ ତୀବ୍ର ସମାଲୋଚନା । ବର୍ଷ ବର୍ଷ ଧରି ରାଜ୍ୟବ୍ୟାପୀ ବିଶାଳ ଚେର ମାଡ଼ି ସାରିଥିବା ଛତୁଆ ଦୁର୍ନୀତିକୁ ନେଇ ବିଧାନସଭାରେ ଦେଖିବାକୁ ମିଳିଛି ଉଦବେଗ । ଆଜି ଗୃହରେ ମହିଳା ଓ ଶିଶୁ କଲ୍ୟାଣ ବିଭାଗର ପ୍ରଶ୍ନୋତ୍ତର ଆରମ୍ଭ ହେବା ମାତ୍ରେ ଛତୁଆ ମହାଦୁର୍ନୀତି ପ୍ରସଙ୍ଗରେ ମୁହଁ ଖୋଲିଥିଲେ କଂଗ୍ରେସର ବରିଷ୍ଠ ସଦସ୍ୟ ତାରା ବାହିନୀପତି । ପରେ ପରେ ବିରୋଧୀଙ୍କ ସ୍ବର ସହ ସ୍ବର ମିଳାଇଥିଲେ ଶାସକ ଦଳର ସଦସ୍ୟ ।
Also Read
ବ୍ୟବସ୍ଥାରେ ନାକ ତଳେ ଚାଲୁଥିବା ଏ ମହାଦୁର୍ନୀତି ସମ୍ପର୍କରେ ସମସ୍ତେ ଅବଗତ ଥାଇ ବି କିଭଳି ବର୍ଷ ବର୍ଷ ଧରି ପୁଷ୍ଟି ନାଁରେ ଅପପୁଷ୍ଟି ବଣ୍ଟା ଚାଲିଛି ତା’ର ସ୍ପଷ୍ଟ ଅବତରାଣା କରିଥିଲେ ଜଣକ ପରେ ଜଣେ ବିଧାୟକ । ପରେ ଏ ଘଟଣାର ତଦନ୍ତ କରାଯାଇ, ବିଧାନସଭାକୁ ଜଣାଯିବ ବୋଲି ଉତ୍ତର ରଖିଥିଲେ ବିଭାଗୀୟ ମନ୍ତ୍ରୀ ପ୍ରଭାତୀ ପରିଡ଼ା ।
ଏହା ପୂର୍ବରୁ ମଧ୍ୟ ଛତୁଆ ଦୁର୍ନୀତିକୁ ନେଇ ବିଭିନ୍ନ ସମୟରେ ବିରୋଧାଭାଷ ଓ ବାଦ ବିବାଦର କିଛି ଦୃଶ୍ୟ ଦେଖିବାକୁ ମିଳିଥିଲା । ଗତ ୨୬ ତାରିଖରେ ଭଦ୍ରକ ତିହିଡ଼ି ବ୍ଳକ୍ କାର୍ଯ୍ୟାଳୟରେ ବିରୋଧାଭାଷ ଦେଖିବାକୁ ମିଳିଥିଲା । ଏଠି ପଞ୍ଚାୟତ ସମିତି ବୈଠକରେ ଛତୁଆର ମାନକୁ ନେଇ ବିଡିଓ ଓ ଚେୟାରମ୍ୟାନଙ୍କ ଆଗରେ ପ୍ରଶ୍ନ ଉଠାଇଥିଲେ କିଛି ସରପଞ୍ଚ । ସେହିଭଳି ଚାନ୍ଦବାଲି ବ୍ଲକ୍ ତେନ୍ତୁଳିଆରୁ ବି ଗତମାସ ୩୧ ତାରିଖରେ ଆସିଥିଲା ଏଭଳି ନିମ୍ନ ମାନର ଛତୁଆକୁ ନେଇ ସାଂଘାତିକ ଅଭିଯୋଗ । ଏ ନେଇ କିଛି ଲୋକ ବିଡିଓଙ୍କ ଦୃଷ୍ଟି ଆକର୍ଷଣ କରିଥିଲେ ବି ଏଯାଏଁ ଫଳ ଶୁନ୍ ।
ଆଉ ଯାଜପୁର ରସୁଲପୁର ବ୍ଲକ୍ ପରିସରର ଦାମୋଦରପୁର ଓ ଚିତ୍ରକୁଳ ସାହିରେ ପୋକ ସାଲୁବାଲୁ ଛତୁଆ ଯୋଗାଣ ହୋଇଥିବା ଅଭିଯୋଗରେ ଛତୁଆ ପ୍ରସ୍ତୁତକାରୀ ଓ ସିଡିପିଓଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ବିଡିଓଙ୍କୁ ଦାବିପତ୍ର ଦେଇଥିଲା ଏକ ସଂସ୍ଥା । ସେହିଭଳି ବଲାଙ୍ଗିର ଜିଲ୍ଲା ଟିଟିଲାଗଡ଼ରେ ମାଆ ଓ ଶିଶୁଙ୍କ ପାଇଁ ସରକାର ଯୋଗାଇ ଦେଉଛନ୍ତି ନିକୃଷ୍ଟ ମାନର ଛତୁଆ । ଯାହାକୁ ନେଇ ତାତିଛନ୍ତି ସାଧାରଣ ଲୋକେ ।
ଛତୁଆ ଦୁର୍ନୀତି ଆଜିକାଲିର ନୁହେଁ, ବର୍ଷ ବର୍ଷ ତଳର । ହେଲେ ଏ ଚେରମଡ଼ା ଦୁର୍ନୀତି ପ୍ରସଙ୍ଗ ଆଜି ବିଧାନସଭାରେ ଉଠିଥିବାରୁ ଏହାର ଅନ୍ତ କେବେ ହେଉଛି, ଆଉ ପୁଷ୍ଟି ନାଁରେ ମାଆ ଓ ଶିଶୁଙ୍କୁ ପ୍ରକୃତ ପୁଷ୍ଟିକର ଖାଦ୍ୟ କେବେ ମିଳୁଛି, ତାହା ଦେଖିବାକୁ ବାକି ରହିଲା ।
