ବାଲେଶ୍ୱର ଜିଲ୍ଲାର ଧୀରେ ଧୀରେ ବଢୁଛି ବାଂଲାଦେଶୀ ଅନୁପ୍ରବେଶକାରୀଙ୍କ ସଂଖ୍ୟା। ଜିଲ୍ଲାର ସୁଦୀର୍ଘ ୮୦ କିଲୋମିଟର ବେଳାଭୂମୀ କୂଳେ କୂଳେ ଏବେ ଏମାନଙ୍କ ସଂଖ୍ୟା ବଢିବାରେ ଲାଗିଛି। ସମୁଦ୍ରରେ ମାଛ ମାରିବା, ଲୁଗାପଟା ଓ ଅନ୍ୟାନ୍ୟ ଜିନିଷ ବୁଲି ବୁଲି ବିକ୍ରି କରିବା ବାହାନାରେ ଏମାନେ ଆସି ଏଠାରେ ରହି ସେମାନଙ୍କ ସଂଖ୍ୟା ବଢ଼ାଉଛନ୍ତି। ଜିଲ୍ଲାର ବରଜ ଦେଉଳି, ବଳରାମଗଡି, କଷାଫଳ, ଖଡୁପାହି, ପରଖି, ସହରର ଗଳାପୋଲ ଓ ରେମୁଣା ଅଂଚଳରେ ଏମାନଙ୍କ ଉପସ୍ଥିତି ରହିଥିବାର ଅଭିଯୋଗ ହେଉଛି ।
ବିଶେଷ କରି ସମୁଦ୍ର ଉପକୂଳ ଏବେ ଏମାନଙ୍କ କବଜାରେ। ଆଉ ସେମାନଙ୍କୁ ପୂର୍ବ ସରକାରଙ୍କ କିଛି ରାଜନୈତିକ ବ୍ୟକ୍ତି ହାତବାରିସୀ କରି ନିଜର ଭୋଟ ବ୍ୟାଙ୍କ ଭାବେ ବ୍ୟବହାର କରି ଏଠାରେ ସେମାନଙ୍କ ସଂଖ୍ୟା ବଢାଇବାରେ ସହଯୋଗ କରିଥିବାର ଅଭିଯୋଗ ହେଉଛି। ଏ କଥାକୁ ସ୍ବୀକାର କରିଛନ୍ତି ଖୋଦ ବର୍ତ୍ତମାନର ରାଜସ୍ଵ ମନ୍ତ୍ରୀ ସୁରେଶ ପୂଜାରୀ। ବର୍ତ୍ତମାନ ବାଂଲାଦେଶୀ ଅନୁପ୍ରବେଶ ଏକ ବଡ ସମସ୍ୟା କହିବା ସହ। ରାଜ୍ୟ ସରକାର ସେମାନଙ୍କୁ ଠାବ କରିବା ପ୍ରକ୍ରିୟା ଆରମ୍ଭ କରିଛନ୍ତି। ଏହା ସହ କେନ୍ଦ୍ର ସରକାରଙ୍କ ସହ ଏ ନେଇ ଆଲୋଚନା ଜାରି ରହିଛି ଆଉ ଖୁବ ଶୀଘ୍ର ଏ ନେଇ କାର୍ଯ୍ୟାନୁଷ୍ଠାନ ନିଆଯିବ ।
Also Read
ସେମାନେ ଦୀର୍ଘଦିନ ରହି ଏଠାକାର ଭୋଟର କାର୍ଡ ଠାରୁ ଆରମ୍ଭ କରି ଆଧାର କାର୍ଡ ଓ ରାସନ କାର୍ଡ ମଧ୍ୟ ହାତେଇଛନ୍ତି। ସେମାନଙ୍କ ବାପା ଜେଜେ ବାପା ଏଠାରେ ଜନ୍ମ ହୋଇ ମୃତ୍ୟୁବରଣ କରିଛନ୍ତି। ଏମାନେ ସରକାରଙ୍କ ସମସ୍ତ ସୁବିଧା ସୁଯୋଗ ପାଇବା ସହ ଜାଗାବାଡି ମଧ୍ୟ କରିପକେଇଲେଣି । ସେମାନଙ୍କୁ ବାଂଲାଦେଶୀ କହି ବିଭିନ୍ନ ସମୟରେ ଭୟଭୀତ କରାଯାଉଥିବା ସହ ଯେଉଁମାନେ ବାହାର ଦେଶରୁ ଆସିଛନ୍ତି ସରକାର ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଅନ୍ତୁ ବୋଲି କହିଛନ୍ତି ଜଣେ ବସ୍ତି ବାସିନ୍ଦା।
ଅଧିକ ପଢ଼ନ୍ତୁ : ରତ୍ନ ଭଣ୍ଡାର ନେଇ ଆସିଲା ବଡ଼ ଅପଡେଟ୍ ; ଗୃହରେ କ’ଣ କହିଲେ ମନ୍ତ୍ରୀ
ଅନୁପ୍ରବେଶକାରୀମାନେ ସରକାରୀ ଜମି ଜବରଦଖଲ କରି ସ୍ଥାନୀୟ ଲୋକଙ୍କ ସହ ଝଗଡାଝାଟି କରୁଥିବାର ମଧ୍ୟ ଅଭିଯୋଗ ହୋଇଛି । ସେମାନଙ୍କ ଯୋଗୁଁ ଚୋରି ଡକାୟତି, ନିଶା କାରବାର ସାଙ୍ଗକୁ ବହୁ ଅପରାଧୀଙ୍କ କାର୍ଯ୍ୟ ବୃଦ୍ଧି ପାଉଥିବା ମଧ୍ୟ ଅଭିଯୋଗ ହେଉଛି । ନିକଟ ଅତୀତରେ ବିଭିନ୍ନ ଅପରାଧରେ ଗିରଫ ହୋଇ କେହି କେହି ଜେଲ୍ ମଧ୍ୟ ଯାଇଛନ୍ତି । ହେଲେ ଜିଲ୍ଲା ପ୍ରଶାସନ ହେଉ ବା ପୋଲିସ ପ୍ରଶାସନ ଅବା ରାଜ୍ୟ ସରକାର ସେମାନଙ୍କ ବିଷୟରେ ଖୋଳତାଡ଼ କରି ଚିହ୍ନଟ କରୁଥିବା କଥା କେବଳ କାଗଜ କଲମରେ ସୀମିତ ରହିଥିବା କହିଛନ୍ତି ଜଣେ ଅବସରପ୍ରାପ୍ତ ସେନା ଅଧିକାରୀ ।
ସରକାର ସେମାନଙ୍କୁ ଚିହ୍ନଟ କରି ସେମାନଙ୍କ ବିଷୟରେ ସଠିକ ବିବରଣୀ ସଂଗ୍ରହ କରିବାକୁ ଦାବି ହୋଇଛି ।
( ବାଲେଶ୍ୱରରୁ ପ୍ରକାଶ ମହାନ୍ତିଙ୍କ ରିପୋର୍ଟ )