ସାବାଡ୍ ହେବେ ଅପରାଧୀ। ଆଉ ଖୁଲମଖୁଲା ବୁଲି ପାରିବେନି। ରାତିରେ ଦୋକାନ ବଜାରରେ କରିପାରିବେନି ଖଟି। ଏଥିପାଇଁ ବଡ଼ ପଦକ୍ଷେପ ନେଇଛି ସୁନ୍ଦରଗଡ଼ ଜିଲ୍ଲା ପ୍ରଶାସନ। ଏଣିକି ରାତି ୧୦ଟା ପରେ ଦୋକାନରେ ଝୁଲିବ ତାଲା। ଏନେଇ ପୋଲିସ ପ୍ରଶାସନ ନିର୍ଦ୍ଦେଶ ଦେଇଛି। ଯଦି ନିୟମ ଖିଲାପ ହୁଏ ତେବେ ନିଆଯିବ କଡ଼ା ଆକ୍ସନ।
ସୁନ୍ଦରଗଡ଼ ସହରରେ ଆଇନ ଶୃଙ୍ଖଳା ପରିସ୍ଥିତି ବିଗିଡିବାରେ ଲାଗିଛି। ଦିନକୁ ଦିନ ଅପରାଧୀକ କାର୍ଯ୍ୟକଳାପ ବୃଦ୍ଧି ପାଇବାରେ ଲାଗିଛି। ତେବେ ଏଥିରେ କିପରି ସୁଧାର ଆସିବ ଓ ଆଇନଶୃଙ୍ଖଳା ପରିସ୍ଥିତି କିଭଳି ଠିକ୍ ରହିବ ସେନେଇ ଜିଲ୍ଲା ପ୍ରଶାସନ ଅଣ୍ଟାଭିଡ଼ିଛି। ଜିଲ୍ଲା ପୋଲିସ ବିଭାଗ ଏନେଇ ବଡ଼ ପଦକ୍ଷେପ ନେଇଛି। ରାତି ୧୦ ଟା ପରେ ସହରର ସମସ୍ତ ଦୋକାନ ବଜାର ବନ୍ଦ କରିବାକୁ ଜାରି ହୋଇଛି ନିର୍ଦ୍ଦେଶନାମା।
Also Read
ଏନେଇ ଟାଉନ ଥାନା ଅଧିକାରୀ ସହରରେ ଥିବା ସମସ୍ତ ଦୋକାନୀମାନଙ୍କୁ ନୋଟିସ ଦେଇଛନ୍ତି। ଏଥିସହ ଏଥିରେ ଖିଲାପ କଲେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉଲ୍ଲେଖ କରିଛନ୍ତି। ଦୋକାନ ଖୋଲା ରହିଲେ ରାତିରେ ବିଭିନ୍ନ ଅପରାଧିକ କାର୍ଯ୍ୟରେ ଲିପ୍ତ ରହୁଥିବା ଅପରାଧୀମାନେ ଗୋଟିଏ ସ୍ଥାନରେ ଏକାଠି ହେବାର ସୁଯୋଗ ପାଉଛନ୍ତି। ଏଣୁ ଏସବୁ ଉପରେ ଅଙ୍କୁଶ ଲଗାଇବାକୁ ପୋଲିସ ପ୍ରଶାସନ ଏହି ପଦକ୍ଷେପ ନେଇଛି। ତେବେ ଆଜିଠାରୁ ଏହାକୁ କଡା କଡି ଭାବେ ପାଳନ୍ କରାଯିବା ନେଇ ନୋଟିସ ରେ ଉଲ୍ଲେଖ ରହିଛି।