ପଶ୍ଚିମବଙ୍ଗରେ ବୀରଭୂମ ହିଂସା ମାମଲା: ତେଜୁଛି ରାଜନୀତି, ରାଷ୍ଟ୍ରପତି ଶାସନ ଲାଗୁ ପାଇଁ ବିରୋଧୀଙ୍କ ଦାବି

ପଶ୍ଚିମବଙ୍ଗ ବୀରଭୂମ ହିଂସା ମାମଲାର ତଦନ୍ତ ଭିତରେ ଜୋର ଧରିଲା ରାଜନୀତି । ଆଜି ଘଟଣାସ୍ଥଳ ପରିଦର୍ଶନ କରିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ମୃତକଙ୍କ ସଂପର୍କୀୟଙ୍କୁ ଆଶ୍ୱାସନା ଦେଇଛନ୍ତି । ଏଥିସହ ମୃତକଙ୍କ ପରିବାରକୁ ୫ ଲକ୍ଷ ଟଙ୍କା ଲେଖାଏଁ ଚେକ୍ ପ୍ରଦାନ କରିବା ସହ, ସଂପର୍କୀୟଙ୍କ ପାଇଁ ସରକାରୀ ଚାକିରୀ ଘୋଷଣା କରିଛନ୍ତି । ତାସହ ଅଗ୍ନିକାଣ୍ଡରେ ଘର ହରାଇଥିବା ବିପନ୍ନଙ୍କ ପରିବାରକୁ ୨ ଲକ୍ଷ ଟଙ୍କାର ସହାୟତା ରାଶି ବି ଘୋଷଣା କରିଛନ୍ତି ।

ସେପଟେ ମମତାଙ୍କ ଶାସନକାଳରେ ପଶ୍ଚିମବଙ୍ଗରେ ଗଣତନ୍ତ୍ର ବିପଦରେ ଥିବା ଅଭିଯୋଗ କରିଛନ୍ତି ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର । ଜାତୀୟ ତଦନ୍ତକାରୀ ସଂସ୍ଥା ଦ୍ୱାରା ଘଟଣାର ତଦନ୍ତ ପାଇଁ ବିଜେପି ଦାବି କରିଛି । କଂଗ୍ରେସ ମଧ୍ୟ ବୀରଭୂମ ହିଂସା ମାମଲାରେ ତୃଣମୂଳ କଂଗ୍ରେସକୁ ଟାର୍ଗେଟ୍ କରିଛି । କଂଗ୍ରେସ ନେତା ଅଧିର ରଂଜନ ଚୌଧୁରୀଙ୍କ ନେତୃତ୍ୱରେ ଏକ ଟିମ୍ ଘଟଣାସ୍ଥଳକୁ ଯିବା ବେଳେ ତାଙ୍କୁ ଅଧାବାଟରେ ପୋଲିସ ଅଟକାଇଥିଲା । ତେବେ ପଶ୍ଚିମବଙ୍ଗରେ ରାଷ୍ଟ୍ରପତି ଶାସନ ଲାଗୁ କରିବା ପାଇଁ ଦାବି କରିଛି ଦଳ ।

ସେପଟେ ରାଜ୍ୟର ଏଭଳି ସ୍ଥିତିକୁ ନେଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ଭେଟିଛନ୍ତି ଟିଏମ୍‌ସି ପ୍ରତିନିଧି ଦଳ । ଏହି ଘଟଣା ପାଇଁ ରାଜ୍ୟପାଳଙ୍କୁ ଦାୟୀ କରିବା ସହ ତାଙ୍କୁ ସେଠାରୁ ହଟାଇବା ଲାଗି ଦାବି କରାଯାଇଛି । ଏହାରି ଭିତରେ ଆଜି କୋଲକାତା ହାଇକୋର୍ଟରେ ମାମଲାର ଶୁଣାଣି ଶେଷ ହୋଇଛି । ତେବେ ରାୟ ସଂରକ୍ଷିତ ରଖିଛନ୍ତି ହାଇକୋର୍ଟ । ସେପଟେ ଅବହେଳା ପାଇଁ ରାମପୁରହାଟ ଏସଡିପିଓ ସୟାନ ଅହମ୍ମଦଙ୍କୁ ଆଜି ସସପେଣ୍ଡ କରାଯାଇଛି । ପଶ୍ଚିମବଙ୍ଗ ବିଧାନସଭାରେ ବି ଏହି ପ୍ରସଙ୍ଗ ନଉଠିବାରୁ ବିଜେପି ବିଧାୟକମାନେ କକ୍ଷ୍ୟ ତ୍ୟାଗ କରିଥିଲେ ।