Sextortion: ଅନଲାଇନ୍ ଫ୍ରେଣ୍ଡସିପ୍ କରୁଥିଲେ ସାବଧାନ; ନଗ୍ନ ଫଟୋ ଓ ଅଶ୍ଳୀଳ ଭିଡିଓକୁ ଅସ୍ତ୍ର କରୁଛନ୍ତି ଠକ

ଅନଲାଇନ୍ ଫ୍ରେଣ୍ଡସିପ୍ ପୂର୍ବରୁ ଏକଦମ୍ ସାବଧାନ। ମାତିଛନ୍ତି ସେକ୍ସଟର୍ସନ୍ ରାକେଟ୍ । ଦିଲ୍ଲୀରୁ ଧରାପଡ଼ିଲା ସେକ୍ସଟର୍ସନ ମାଷ୍ଟରମାଇଣ୍ଡ୍ । କଟକରେ ସେକ୍ସଟର୍ସନର ଶିକାର ହୋଇ ଜଣେ ମହିଳା ଆତ୍ମହତ୍ୟା କରିଥିଲେ । ଏହି ମାମଲାର ଖିଅ ଖୋଜି ଖୋଜି ଦିଲ୍ଲୀରୁ ଜଣେ ନାଇଜେରିଆ ନାଗରିକକୁ ଗିରଫ କରିଛି କମିଶନରେଟ୍ ପୋଲିସ ।

ଆସନ୍ତୁ ଜାଣିବା କଣ ଏହି ସେକ୍ସଟର୍ସନ୍ ରାକେଟ୍ ଏବଂ କେମିତି ଏହାର ଜାଲରେ ଫସନ୍ତି ପୀଡିତା...

ସାଇବର୍ ଠକେଇର ସାଂଘାତିକ ରୂପ 'ସେକ୍ସଟର୍ସନ୍' । ନଗ୍ନ ଫଟୋ ଓ ଅଶ୍ଳୀଳ ଭିଡିଓକୁ ଅସ୍ତ୍ର କରୁଛନ୍ତି ଠକ । ବ୍ଲାକମେଲ୍ କରି କେବଳ ଲକ୍ଷ ଲକ୍ଷ ଟଙ୍କା ନୁହେଁ । ପରୋକ୍ଷରେ ଜୀବନ ବି ନେଉଛି ଏହି ରାକେଟ୍ । ଧମକଚମକ ଦେଇ ଟଙ୍କା ବା ବଟି ଆଦାୟକୁ କୁହାଯାଏ ଏକ୍ସଟର୍ସନ୍ । ହେଲେ, କାହାକୁ ତାଙ୍କର ନଗ୍ନ ଫଟୋ ବା ଭିଡିଓ ଭାଇରାଲ୍ କରାଇଦେବାର ଧମକ ଦେଇ ଟଙ୍କା ଆଦାୟ କଲେ, ତାକୁ କୁହାଯାଉଛି ସେକ୍ଟଟର୍ସନ୍ ।

ଆଜିକାଲି ଅନଲାଇନ ଯୁଗରେ ସେକ୍ସଟର୍ସନ୍ ରାକେଟ୍ କ୍ୟାନସର୍ ବ୍ୟାଧି ଭଳି ମାତିଛି । ଏହାର ଗୋଟିଏ ଖିଅ ଲାଗିଛି କମିଶନରେଟ୍ ପୋଲିସ ହାତରେ । ଦିଲ୍ଲୀରୁ ଧରାପଡ଼ିଛି ଆଫ୍ରିକା ନାଇଜେରିଆର ଜେଜେ ରେମଣ୍ଡ । କଟକର ଜଣେ ମହିଳାଙ୍କୁ ସେକ୍ସଟର୍ସନ୍ ଓ ତାଙ୍କ ଆତ୍ମହତ୍ୟା ମାମଲାରେ ରେମଣ୍ଡକୁ ଦିଲ୍ଲୀରୁ ଗିରଫ କରିଛି କମିଶନରେଟ୍ ପୋଲିସ ।

ଅଧିକ ପଢ଼ନ୍ତୁ:  କ’ଣ ହେବ ନବ ହତ୍ୟା ମାମଲାର ପରବର୍ତ୍ତୀ କ୍ରାଇମବ୍ରାଞ୍ଚ ତଦନ୍ତ ?

କଟକ ଡିସିପିଙ୍କ ସୂଚନା ଅନୁସାରେ, ମହିଳା ଜଣକ ନିଜ ସୁଇସାଇଡ୍ ନୋଟରେ ଖୋଲିଥିଲେ ସବୁ ଗୁମର । କେମିତି ତାଙ୍କୁ ବ୍ଲାକମେଲ୍ କରି ଲକ୍ଷ ଲକ୍ଷ ଟଙ୍କା ନିଆଯାଇଥିଲା । ଅଧିକ ଟଙ୍କା ନଦେବାରୁ ବ୍ୟକ୍ତିଗତ ଫଟୋ ଓ ଭିଡିଓ ଭାଇରାଲ୍ କରାଯାଇଥିଲା । ଜୀବନ ହାରିବା ଆଗରୁ ସବୁକିଛି ଗୋଟି ଗୋଟି କରି ଲେଖିଥିଲେ ।

ମହିଳାଙ୍କ ମୋବାଇଲରୁ ଏକ ଇଣ୍ଟରନ୍ୟାସନାଲ ନମ୍ବରର ଖିଅ ଖୋଜି ଖୋଜି, ଦିଲ୍ଲୀର ଉତ୍ତମ ନଗର ଓ ପାଲମ ଏରିଆରୁ ବିଦେଶୀ ଅଭିଯୁକ୍ତକୁ ଧରିଛି କଟକରୁ ଯାଇଥିବା ୬ ଜଣିଆ ସ୍ପେଶାଲ୍ ଟିମ୍ । ରେମଣ୍ଡ ପାଖରୁ ଜବତ ହୋଇଛି ନାଇଜେରିଆ ଓ ଆଇଭରି କୋଷ୍ଟର ପାସପୋର୍ଟ । କ୍ୟାମେରାରେ କଳା ଟେପ୍ ଲାଗିଥିବା ଲାପଟପ୍, ୫ଟି ମୋବାଇଲ୍ ଓ ୮ଟି ସିମ୍ । ସେଥିରୁ କିଛି ୟୁକେ ସିମ୍ ବି ରହିଛି । ସେ ଷ୍ଟୁଡେଣ୍ଟ କିମ୍ବା ଟୁରିଷ୍ଟ ଭିସାରେ ୨୦୨୦ରେ ଭାରତ ଆସିଥିଲା ଓ ଦିଲ୍ଲୀରେ ଘରଭଡ଼ା ନେଇ ରହୁଥିଲା ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି।

କେମିତି ଚାଲେ ସେକ୍ସଟର୍ସନ୍ ରାକେଟ?

ପ୍ରଥମେ ଫେସବୁକ୍‌ରୁ କିଛି ପ୍ରତିଷ୍ଠିତ ପୁରୁଷ ଡାକ୍ତର ଓ ଇଞ୍ଜିନିୟରଙ୍କ ପ୍ରୋଫାଇଲ୍ ଖୋଜି, ସେମାନଙ୍କ ଫେକ୍ ଆକାଉଣ୍ଟ ତିଆରି କରନ୍ତି ଠକ । ସେହି ଫେକ୍ ଆକାଉଣ୍ଟରୁ ଅନ୍ୟ ମହିଳା ଡାକ୍ତରଙ୍କୁ ଫ୍ରେଣ୍ଡ୍ ରିକ୍ବେଷ୍ଟ ପଠାନ୍ତି । ସେମାନଙ୍କ ସହ ବନ୍ଧୁତା ପରେ ଚାଟ୍ ଚାଲେ । ବିଶ୍ବାସ ଜନ୍ମାଇ ହ୍ବାଟସଆପ୍ ନମ୍ବର ହାତେଇବା ପରେ, ଆଉ ପାଦେ ଆଗକୁ ବଢ଼ନ୍ତି ଠକ । ଫେକ୍ ପ୍ରୋଫାଇଲ୍ କରାଯାଇଥିବା ଲୋକଙ୍କ ଫଟୋକୁ ଏଡିଟ୍ କରି ନଗ୍ନ ଫଟୋ ତିଆରି କରାଯାଏ ଏବଂ ସମ୍ପୃକ୍ତ ମହିଳାଙ୍କୁ ହ୍ବାଟସଆପରେ ପଠାଯାଏ ।

ଏହାପରେ ପ୍ରଲୋଭନ ଦେଖାଇ ମହିଳାଙ୍କ ନଗ୍ନ ଫଟୋ ମଧ୍ୟ ସଂଗ୍ରହ କରାଯାଏ । ଏହାପରେ ଅନ୍ୟ ଏକ ଆପ୍ ଦ୍ବାରା ଫରେନ୍ ମୋବାଇଲ ନମ୍ବରର ହ୍ବାଟସଆପ୍ ଆକାଉଣ୍ଟ ତିଆରି କରି, ସେଥିରେ ପୀଡ଼ିତାଙ୍କୁ ତାଙ୍କ ପ୍ରାଇଭେଟ୍ ଫଟୋ ପଠାଇ ବ୍ଲାକମେଲ କରାଯାଏ । ଦିଲ୍ଲୀରୁ ଧରାପଡ଼ିଥିବା ନାଇଜେରିଆ ଅଭିଯୁକ୍ତର ମୋବାଇଲରୁ ପ୍ରାୟ ୩ ହଜାରରୁ ଅଧିକ ଫେସବୁକ୍ ଫ୍ରୋଫାଇଲ୍ ସ୍କ୍ରିନସଟ୍ ଓ କିଛି ଚାଟ୍ ଜବତ ହୋଇଛି । ସେ ଭାରତ ସହ, ବିଦେଶରେ ଥିବା ଭାରତୀୟ ଏବଂ ନ୍ୟୁଜିଲ୍ୟାଣ୍ଡ୍ ଲୋକଙ୍କ ଠାରୁ ମଧ୍ୟ ସେକ୍ସଟର୍ସନ୍ କରିଥିବା ଜାଣିବାକୁ ପାଇଛି ପୋଲିସ ।

ଏଭଳି ସେକ୍ସଟର୍ସନ୍ ଜାଲରୁ ବର୍ତ୍ତିବା ପାଇଁ, ଅନଲାଇନ ବନ୍ଧୁତା ବେଳେ ସତର୍କ ରହିବାକୁ ଏବଂ ଯଦି କେହି ଏହାର ଶିକାର ହୋଇଥା'ନ୍ତି ତେବେ ପୋଲିସର ସାହାଯ୍ୟ ନେବାକୁ ଡିସିପି ଜନସାଧାରଣଙ୍କୁ ଅପିଲ୍ କରିଛନ୍ତି । ଏହି ଇଣ୍ଟରନ୍ୟାସନାଲ ସେକ୍ସଟର୍ସନ୍ ରାକେଟର ପର୍ଦ୍ଦାଫାସ୍ କରିବାକୁ, ଗିରଫ ଅଭିଯୁକ୍ତକୁ ରିମାଣ୍ଡରେ ଆଣିବ କମିଶନରେଟ୍ ପୋଲିସ ।
ତା’ର ପ୍ରକୃତ ନାଗରିକତା, ସେ କେବେଠୁ ଭାରତରେ ଅଛି, କାହା କାହାକୁ ଟାର୍ଗେଟ୍ କରିଛି, କେତେ ଟଙ୍କା ଅସୁଲ୍ କରିଛି, ଏଥିରେ ଆଉ କିଏ କିଏ ସାମିଲ ଅଛନ୍ତି , ଏ ଚେର କେତେ ଯାଏଁ ଲମ୍ବିଛି, ରିମାଣ୍ଡରେ ଆଣି ଏସବୁର ଗୁମର ଉଗାରିବାକୁ ଚେଷ୍ଟା କରିବ ପୋଲିସ । ଅଧିକ ସୁରାକ୍ ହାତେଇବାକୁ ପାସପୋର୍ଟ ଭେରିଫିକେସନ୍ କରାଯିବ ଏବଂ ଇମିଗ୍ରେସନ ସମେତ ଅନ୍ୟ ଏଜେନ୍ସି ସହ ମଧ୍ୟ ଯୋଗାଯୋଗ କରାଯିବ ।

ଅଧିକ ପଢ଼ନ୍ତୁ: ଅପରାଧ ହାର ନିୟନ୍ତ୍ରଣ ପାଇଁ କମିଶନରେଟ୍ ପୋଲିସର ବଡ଼ ଯୋଜନା