LIVE TV
ଛୁଞ୍ଚିରୁ ଜାହାଜ, ଲକ୍ଷେ ଟଙ୍କିଆ ନାନୋ କାରଠୁ ଆରମ୍ଭ କରି କୋଟିଏ ଟଙ୍କାର ବିଜନେସ୍ କ୍ଲାସ୍ କାର୍ ଜାଗୁଆର୍...ସବୁ କିଛି ନିର୍ମାଣ କରୁଥିଲା TATA କମ୍ପାନି। ରତନ ଟାଟାଙ୍କ ଦିଗଦର୍ଶନ, ରତନ ଟାଟାଙ୍କ ପରିକଳ୍ପନାରେ ଏସବୁ ସମ୍ଭବପର ହୋଇଥିଲା । ସେ ବୟସରେ ସିନା ବୃଦ୍ଧ ହୋଇଥିଲେ କିନ୍ତୁ ମନରେ କିମ୍ବା ବ୍ୟବହାରରେ ନୁହେଁ । ଏହାର ସବୁଠୁ ବଡ଼ ଉଦାହରଣ ହେଉଛନ୍ତି ଶାନ୍ତନୁ ନାଇଡ଼ୁ । ୨୦୧୪ ମସିହାରେ ପୁଣେ ବିଶ୍ବବିଦ୍ୟାଳୟରୁ ସ୍ନାତ୍ତକୋତ୍ତର ପରେ ତାଙ୍କୁ ନିଜର ସବୁଠୁ କମ୍ ବୟସର ଜେନେରାଲ୍ ସେକ୍ରେଟାରୀ ଭାବେ ନିଯୁକ୍ତ ଦିଅନ୍ତି ରତନ ।
Also Read
ଶାନ୍ତନୁଙ୍କୁ ସେତେବେଳେ ମାତ୍ର ୨୦ ବର୍ଷ ଓ ରତନଙ୍କୁ ବୟସ ୭୫ ବର୍ଷ । ଏଇଠୁ ପ୍ରମାଣିତ ହୋଇଥିଲା କି ରତନ କେବେ ବି ବୃଦ୍ଧ ହୋଇନଥିଲେ କି କେବେ ବି ଜୀବନରେ ହାର ମାନିନଥିଲେ ।
ଭାରତର ବିଶିଷ୍ଟ ଶିଳ୍ପପତି ରତନ ଟାଟାଙ୍କ ମୃତ୍ୟୁ ପରେ ତାଙ୍କ ଘନିଷ୍ଠ ସହଯୋଗୀ ତଥା ରତନ ଟାଟାଙ୍କ କାର୍ଯ୍ୟାଳୟର ଜେନେରାଲ ମ୍ୟାନେଜର ଶାନ୍ତନୁ ନାଇଡୁ ସୋସିଆଲ ମିଡିଆରେ ଏକ ଭାବପୂର୍ଣ୍ଣ ପୋଷ୍ଟ କରି ସମବେଦନା ଜଣାଇଛନ୍ତି । ଶାନ୍ତନୁ ନାଇଡୁ ତାଙ୍କ ଲିଙ୍କଡିନ୍ ଆକାଉଣ୍ଟ ମାଧ୍ୟମରେ ଏକ ହୃଦୟସ୍ପର୍ଶୀ ପୋଷ୍ଟ କରିଛନ୍ତି । ସେ ରତନ ଟାଟାଙ୍କର ଅନେକ ବୃତ୍ତିଗତ ସଫଳତା ନୁହେଁ ବରଂ ସେମାନଙ୍କର ଘନିଷ୍ଠ ବନ୍ଧୁତା ଉପରେ ଆଲୋକପାତ କରିଛନ୍ତି ।
ସେ ଲେଖିଛନ୍ତି ଯେ, ‘ମୋ ବନ୍ଧୁ ମୋତେ ଯେଉଁ ଶୂନ୍ୟତା ଭିତରେ ଛାଡ଼ି ଚାଲିଯାଇଛନ୍ତି, ସେ ସ୍ଥାନ ଭରଣ କରିବାକୁ ସାରା ଜୀବନ କାଟିଦେବି । ଅଲବିଦା ମୋର ପ୍ରିୟ ଲାଇଟ୍ ହାଉସ୍’।
ସୂଚନା ଅନୁସାରେ ଗତକାଲି କିମ୍ବଦନ୍ତୀ ଉଦ୍ୟୋଗପତି ତଥା ପଦ୍ମ ବିଭୂଷଣ ରତନ ଟାଟାଙ୍କ ପରଲୋକ ହୋଇଥିଲା । ୮୬ ବର୍ଷ ବୟସରେ ଆଖି ବୁଜିଥିଲେ ଟାଟା ଟ୍ରଷ୍ଟ ଚେୟାରମ୍ୟାନ୍ ତଥା ଟାଟା ସନ୍ସର ଚେୟାରମ୍ୟାନ ଏମେରିଟସ୍ ରତନ ଟାଟା । ବାର୍ଦ୍ଧକ୍ୟଜନିତ ଅସୁସ୍ଥତା ଯୋଗୁଁ ସେ ମୁମ୍ବାଇର ବ୍ରିଚ୍ କ୍ୟାଣ୍ଡି ହସ୍ପିଟାଲରେ ଚିକିତ୍ସିତ ହେଉଥିଲେ । ଦୁଇ ଦିନ ତଳେ ତାଙ୍କ ଅସୁସ୍ଥତାକୁ ନେଇ ଚର୍ଚ୍ଚା ହୋଇଥିଲେ ମଧ୍ୟ, ସୋସିଆଲ ମିଡିଆରେ ଏହାକୁ ଖଣ୍ଡନ କରିଥିଲେ ନିଜେ ରତନ ଟାଟା ।
ତେବେ ଗତକାଲି ସେ ଆଇସିୟୁରେ ଥିବା ନେଇ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଥିଲା । ନିଜର ଅମାୟିକ ବ୍ୟକ୍ତିତ୍ବ, ସରଳ ଜୀବନଶୈଳୀ, ମେଳାପି ସ୍ବଭାବ ଏବଂ ବଦାନ୍ୟତା ପାଇଁ ପରିଚିତ ଥିଲେ ରତନ ଟାଟା । ୧୯୬୧ରେ ସେ ପ୍ରଥମେ ଟାଟାଷ୍ଟିଲରେ ଯୋଗ ଦେଇଥିଲେ ଏବଂ ୧୯୯୧ରେ ଜେଆରଡି ଟାଟା ଅବସର ନେବା ପରେ ସେ ଟାଟା ସନ୍ସ ଚେୟାରମ୍ୟାନ୍ ବନିଥିଲେ । ଶିଳ୍ପ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ତାଙ୍କୁ ୨୦୦୦ ମସିହାରେ ପଦ୍ମଭୂଷଣ ଓ ୨୦୦୮ରେ ପଦ୍ମବିଭୂଷଣ ସମ୍ମାନରେ ସମ୍ମାନିତ କରିଥିଲେ ଭାରତ ସରକାର ।
