LIVE TV
ରଶ୍ମିକା ମନ୍ଦନାଙ୍କ ‘ଡିପ୍ ଫେକ୍’ ଭିଡିଓ ଭାଇରାଲ୍ ପରେ ଆକ୍ସନ୍ ମୁଡକୁ ଆସିଛି କେନ୍ଦ୍ର ସରକାର। ସୋସିଆଲ୍ ମିଡିଆରେ ଏଭଳି ମିଛ ଓ ଆପତ୍ତିଜନକ ଭିଡିଓ ଆସିଲେ ତୁରନ୍ତ କାର୍ଯ୍ୟାନୁଷ୍ଠାନ ହେବ ବୋଲି ଏକ ଆଡଭାଇଜରୀ ଜାରି କରାଯାଇଛି। ଯଦି, ସୋସିଆଲ୍ ମିଡିଆରେ ଏଭଳି ପୋଷ୍ଟ କରାଯାଇଛି ତୁରନ୍ତ ଡିଲିଟ୍ କରିବାକୁ କୁହାଯାଇଛି। ନହେଲେ ଅଭିଯୋଗ ହେବାର ୩୬ ଘଣ୍ଟା ଭିତରେ ଏହାକୁ ହଟାଇବ କେନ୍ଦ୍ର।
ସେପଟେ ରଶ୍ମିକାଙ୍କ ଫେକ୍ ଭିଡିଓ ଘଟଣାରେ ଆରମ୍ଭ ହୋଇଛି ତଦନ୍ତ। ଭିଡିଓ କେଉଁ ଉତ୍ସରୁ ଅପଲୋଡ୍ ହେଇଛି ? କିଏ ଏହାକୁ ବନାଇଥିଲା ସେ ସବୁ ଦିଗ ଉପରେ ତଦନ୍ତ ହେଉଛି। ଅପରପକ୍ଷେ, ଘଟଣାକୁ ନେଇ ଦୁଃଖ ପ୍ରକାଶ
କରିଛନ୍ତି ଭିଡିଓରେ ଥିବା ଯୁବତୀ ଜାରା ପଟେଲ। ତାଙ୍କ ଭିଡିଓକୁ ଏମିତି ଭାବେ ଭାଇରାଲ୍ କରାଯିବ ବୋଲି ସେ କେବେ ବି କଳ୍ପନା କରି ନ ଥିଲେ ବୋଲି ସୋସିଆଲ୍ ମିଡିଆରେ କ୍ଷୋଭ ପ୍ରକାଶ କରି କହିଛନ୍ତି।
Also Read
ଅଧିକ ପଢ଼ନ୍ତୁ: ଡିପ୍ଫେକ୍ ଭିଡିଓରେ ଅପମାନିତ ହୋଇ ମୁହଁ ଖୋଲିଲେ ରଶ୍ମିକା ମନ୍ଦାନା
ଏହି ପରିପ୍ରେକ୍ଷୀରେ କେନ୍ଦ୍ର ସରକାର ସୋସିଆଲ ମିଡିଆ କମ୍ପାନୀମାନଙ୍କୁ ଏକ ଆଡଭାଇଜରୀ ଜାରି କରିବା ସହ ସେମାନଙ୍କୁ ଆଇଟି ଇଣ୍ଟରମିଡିଏତ୍ ନିୟମ ପାଳନ କରିବାକୁ କହିଛି। ସୂଚନା ପ୍ରଯୁକ୍ତିବିଦ୍ୟା ଅଧିନିୟମର ଧାରା ୬୬D ଅନୁଯାୟୀ, କମ୍ପ୍ୟୁଟର ଉତ୍ସ ବ୍ୟବହାର କରି ପ୍ରତିରୋପଣ ଠକିଲେ ତିନି ବର୍ଷ ପର୍ଯ୍ୟନ୍ତ ଜେଲଦଣ୍ଡ ଏବଂ ୧ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ଲାଗୁ କରାଯାଇପାରେ।
ନିୟମ ଅନୁଯାୟୀ, ଅଭିଯୋଗ ପାଇବା ପରେ କମ୍ପାନୀମାନଙ୍କୁ କଣ୍ଟେଟ ହଟାଇବାକୁ ପଡିବ। କେନ୍ଦ୍ର ମନ୍ତ୍ରୀ ରାଜୀବ ଚନ୍ଦ୍ରଶେଖର କହିଛନ୍ତି ଯେ ଆମର ଡିଜିଟାଲ ନାଗରିକଙ୍କ ସୁରକ୍ଷା ଏବଂ ବିଶ୍ୱାସ ଆମର ଅତୁଟ ପ୍ରତିବଦ୍ଧତା। ଏଥି ସହିତ ନରେନ୍ଦ୍ର ମୋଦୀ ସରକାରଙ୍କ ପାଇଁ ଏହା ଏକ ସର୍ବୋଚ୍ଚ ପ୍ରାଥମିକତା। ଭୁଲ ତଥ୍ୟ ଏବଂ ଡିପ୍ଫେକ୍ ଦ୍ୱାରା ସୃଷ୍ଟି ହୋଇଥିବା ଗୁରୁତ୍ୱପୂର୍ଣ୍ଣ ଆହ୍ୱାନକୁ ଚିହ୍ନି ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଗତ ୬ ମାସ ମଧ୍ୟରେ ଦ୍ୱିତୀୟ ଆଡଭାଇଜରି ଜାରି କରି ଅନ୍ଲାଇନ୍ ପ୍ଲାଟଫର୍ମଗୁଡିକୁ ଡିପ୍ଫେକ୍ ପ୍ରସାର ବିରୁଦ୍ଧରେ ନିର୍ଣ୍ଣାୟକ ପଦକ୍ଷେପ ନେବାକୁ କହିଛି।
ସେ କହିଛନ୍ତି ଯେ ଡିପ୍ଫେକ୍ ଏକ ବଡ ଉଲ୍ଲଂଘନ ଏବଂ ବିଶେଷ କରି ମହିଳାମାନଙ୍କୁ ଏହା କ୍ଷତି ପହଞ୍ଚାଉଛି। ଆମ ସରକାର ସମସ୍ତ ନାଗରିକଙ୍କ ସୁରକ୍ଷା ଏବଂ ବିଶ୍ୱାସ ପାଇଁ ଏହାର ଦାୟିତ୍ୱକୁ ଅତି ଗମ୍ଭୀରତାର ସହ ଗ୍ରହଣ କରିଛି ଏବଂ ଏହିପରି କଣ୍ଟେଟ୍ ମାଧ୍ୟମରେ ଟାର୍ଗେଟ କରାଯାଉଥିବା ଆମ ପିଲା ଏବଂ ମହିଳାମାନଙ୍କ ପାଇଁ ମଧ୍ୟ ଅଧିକ ଗୁରୁତ୍ୱ ଦେଇଛି।
କେନ୍ଦ୍ର ମନ୍ତ୍ରୀ ଟ୍ୱିଟରରେ ଲେଖିଛନ୍ତି ଯେ “ସମସ୍ତ ସୋସିଆଲ ମିଡିଆ ପ୍ଲାଟ୍ଫର୍ମ ଏହା ନିଶ୍ଚିତ କରିବା ଉଚିତ ଯେ ଯେପରି କୌଣସି ଉପଭୋକ୍ତାଙ୍କ ଦ୍ୱାରା କୌଣସି ଭୁଲ ତଥ୍ୟ ପୋଷ୍ଟ କରା ନ ଯାଏ ଏବଂ ରିପୋର୍ଟ ହେଲେ ୩୬ ଘଣ୍ଟା ମଧ୍ୟରେ ସେହି କଣ୍ଟେଟ୍କୁ ଡିଲିଟ୍ କରାଯିବା ଉଚିତ।
