ଶୁଭାରମ୍ଭ ହେଲା PM ବିଶ୍ୱକର୍ମା ଯୋଜନା;୧୮ କୌଳିକ ବୃତ୍ତିଧାରୀଙ୍କୁ ମିଳିବ କମ୍ ସୁଧରେ ଋଣ

ପିଢ଼ି ପରେ ପିଢ଼ି ବିଭିନ୍ନ ସୁନ୍ଦର, ସୌଖୀନ ତଥା ଉପଯୋଗୀ ଦେଶୀ ସାମଗ୍ରୀ ପ୍ରସ୍ତୁତ କରିଆସୁଛନ୍ତି ଦେଶର ଅଗଣିତ ପରିବାର । ସେହିଭଳି କୌଳିକ ଶିଳ୍ପୀ ଓ କାରିଗର ବର୍ଗଙ୍କ ପ୍ରଶିକ୍ଷଣ, ପ୍ରୋତ୍ସାହନ ଓ ଆର୍ଥିକ ସହାୟତା ପାଇଁ ଆରମ୍ଭ ହୋଇଛି କେନ୍ଦ୍ରୀୟ ଯୋଜନା 'ପିଏମ୍- ବିଶ୍ୱକର୍ମା’ । ଆଜି ବିଶ୍ୱକର୍ମା ପୂଜା ଅବସରରେ ନୂଆଦିଲ୍ଲୀରେ ଏହାର ଶୁଭାରମ୍ଭ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏଥିରେ ୫ ବର୍ଷରେ ୧୩ ହଜାର କୋଟି ଟଙ୍କା ଖର୍ଚ୍ଚ କରିବେ କେନ୍ଦ୍ର ସରକାର । ଏହି କାର୍ଯ୍ୟକ୍ରମରେ ଓଡ଼ିଆ ପୁଅ ବସନ୍ତ ରଣା ସମ୍ବର୍ଦ୍ଧିତ ହେବା ଓଡ଼ିଶା ପାଇଁ ଗର୍ବର ବିଷୟ ପାଲଟିଛି ।

କମାର ହୁଅନ୍ତୁ କି କୁମ୍ଭାର... ରାଜମିସ୍ତ୍ରୀ ଅବା ବୁଣାକାର । ଦେବଶିଳ୍ପୀ ବିଶ୍ୱକର୍ମା ପୂଜା ଅବସରରେ, ଦେଶର କୌଳିକ ଶିଳ୍ପୀ ଓ କାରିଗର ସମାଜକୁ ପ୍ରଧାନମନ୍ତ୍ରୀଙ୍କ ବଡ଼ ଭେଟି । 'ପିଏମ୍ ବିଶ୍ୱକର୍ମା' ଯୋଜନାର ଶୁଭାରମ୍ଭ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦିଲ୍ଲୀ ଦ୍ୱାରକାରେ ନବନିର୍ମିତ ଯଶୋଭୂମି କନଭେନ୍ସନ ସେଣ୍ଟରରେ ଆୟୋଜିତ ସ୍ୱତନ୍ତ୍ର ଉତ୍ସବରେ ଯୋଗଦେଇ, ବିଶ୍ୱକର୍ମା ସାଥିଙ୍କୁ ଟ୍ରେନିଂ, ଟେକ୍ନୋଲୋଜି ଓ ଟୁଲ୍ସର ମନ୍ତ୍ର ଦେଇଛନ୍ତି ମୋଦି । କହିଛନ୍ତି ଯେ, ସମସ୍ତ ନିର୍ମାଣକାରୀ ଜଣେ ଜଣେ ବିଶ୍ୱକର୍ମା । ସେମାନଙ୍କୁ ଶ୍ରେୟ ଓ ସମର୍ଥନ ଦେବା ସମୟର ଆହ୍ୱାନ। ଭାରତର ଲୋକାଲ୍ ପ୍ରଡକ୍ଟକୁ ଗ୍ଲୋବାଲ୍ କରିବା କ୍ଷେତ୍ରରେ ଏହି ଯୋଜନାର ବଡ଼ ଭୂମିକା ରହିବ ।

ସୂଚନା ଅନୁସାରେ, ପିଏମ୍ ବିଶ୍ୱକର୍ମା ଯୋଜନାରେ ୧୮ଟି କୌଳିକ ଶିଳ୍ପୀ ଓ କାରିଗର ବର୍ଗ ସାମିଲ ହୋଇଛନ୍ତି । ସେମାନଙ୍କ ପ୍ରୋତ୍ସାହନ ଲାଗି ଆସନ୍ତା ୫ ବର୍ଷରେ ୧୩ ହଜାର କୋଟି ଟଙ୍କା ଖର୍ଚ୍ଚ କରିବେ କେନ୍ଦ୍ର ସରକାର । ଏହାଦ୍ୱାରା ୩୦ ଲକ୍ଷ ପରିବାର ଉପକୃତ ହେବେ । ହିତାଧିକାରୀଙ୍କୁ ୫ ପ୍ରତିଶତ ସୁଧ ହାରରେ ୧ ଲକ୍ଷରୁ ୩ ଲକ୍ଷ ଟଙ୍କା ପର୍ଯ୍ୟନ୍ତ ବନ୍ଧକମୁକ୍ତ ଋଣ ସହାୟତା ମିଳିବ । କୌଳିକ ଉପକରଣ ଆଦି କିଣିବାକୁ ମିଳିବ ୧୫ ହଜାର ଟଙ୍କାର ପ୍ରୋତ୍ସାହନ ରାଶି । ଏଥିସହ ପିଏମ୍ ବିଶ୍ୱକର୍ମା ସାର୍ଟିଫିକେଟ୍, ପରିଚୟ ପତ୍ର, ମୌଳିକ ଓ ଉନ୍ନତ ଦକ୍ଷତା ବିକାଶ ପ୍ରଶିକ୍ଷଣ, ମାର୍କେଟିଂ ସହାୟତା ପ୍ରଦାନ ଓ ଡିଜିଟାଲ୍ କାରବାର ପାଇଁ ପ୍ରୋତ୍ସାହନର ବି ବ୍ୟବସ୍ଥା ରହିଛି ।

ଦିଲ୍ଲୀ ମଞ୍ଚରେ ଆଜି ପ୍ରଧାନମନ୍ତ୍ରୀଙ୍କ ହାତରୁ ସମ୍ମାନିତ ହୋଇଛନ୍ତି ଜଣେ ଓଡ଼ିଆ ପୁଅ । ପୁରୀର ଟାହିଆ କାରିଗର ବସନ୍ତ ରଣା । ମହାପ୍ରଭୁଙ୍କ ନାଗାର୍ଜୁନ ବେଶ ଓ ହାତୀ ବେଶ ଆଦି ସହିତ ଟାହିଆ ପ୍ରସ୍ତୁତ କରିଥାନ୍ତି ବସନ୍ତ । ସେହିପରି ମାଛ ଜାଲ ତିଆରି କରୁଥିବା ତାମିଲନାଡୁର ଜଣେ ବୟସ୍କ କାରିଗର ସମ୍ମାନିତ ହେବା ବେଳେ, ଖୁସିରେ ଗଦଗଦ ହୋଇ ପ୍ରଧାନମନ୍ତ୍ରୀ ମୋଦିଙ୍କୁ ଆଲିଙ୍ଗନ କରିଥିବା ଦେଖିବାକୁ ମିଳିଥିଲା ।

ଏପଟେ ଓଡ଼ିଶାର ବିଭିନ୍ନ ସ୍ଥାନରେ ପିଏମ୍ ବିଶ୍ୱକର୍ମା ଯୋଜନାର ସିଧାପ୍ରସାରଣ ହୋଇଛି । ଭୁବନେଶ୍ୱରରେ ଆୟୋଜିତ କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ, ସମ୍ବଲପୁରରେ କେନ୍ଦ୍ରମନ୍ତ୍ରୀ ଜନ୍ ବାର୍ଲା ଏବଂ ପୁରୀରେ କେନ୍ଦ୍ରମନ୍ତ୍ରୀ ମୁଞ୍ଜାପରା ମହେନ୍ଦ୍ରଭାଇଙ୍କ ସହିତ ସାଂସଦ ଓ ବିଧାୟକ ପ୍ରମୁଖ ଯୋଗ ଦେଇଥିଲେ । ଏଥିରେ ବହୁସଂଖ୍ୟାରେ ସାମିଲ ହୋଇଥିଲେ ସ୍ଥାନୀୟ କୌଳିକ ଶିଳ୍ପୀ ଓ କାରିଗର । ସୂଚନା ଅନୁସାରେ ପିଏମ୍ ବିଶ୍ବକର୍ମା ଯୋଜନାରେ ଓଡ଼ିଶାର ୧ ଲକ୍ଷରୁ ଅଧିକ ଶିଳ୍ପୀ ଓ କାରିଗର ଉପକୃତ ହେବେ ।