SC Modifies Stray Dog Policy: ବୁଲା କୁକୁର ପ୍ରସଙ୍ଗରେ ସୁପ୍ରିମ ରାୟ; ବନ୍ଧ୍ୟାକରଣ କରି ରାସ୍ତାରେ ଛାଡ

ବୁଲା କୁକୁର ପ୍ରସଙ୍ଗ ନେଇ ସୁପ୍ରିମକୋର୍ଟଙ୍କ ବଡ଼ ରାୟ। ସର୍ବସାଧାରଣ ସ୍ଥାନରେ ବୁଲା କୁକୁରଙ୍କୁ ଖାଦ୍ୟ ଦେବା ଉପରେ ରୋକ୍ ଲଗାଇଛନ୍ତି ସୁପ୍ରିମକୋର୍ଟ। ନିର୍ଦ୍ଦିଷ୍ଟ ସ୍ଥାନରେ ବୁଲା କୁକୁରଙ୍କୁ ଖାଇବାକୁ ଦେବାକୁ ନିର୍ଦ୍ଦେଶ ଦିଆଯାଇଛି। ହିଂସାତ୍ମକ କୁକୁରଙ୍କୁ ନିର୍ଦ୍ଦିଷ୍ଟ ସେଲଟର୍ ରେ ରଖାଯିବା ସହ ବନ୍ଧ୍ୟାକରଣ ପରେ କୁକୁରଙ୍କୁ ଛଡ଼ାଯିବାକୁ ନିର୍ଦ୍ଦେଶ ଜାରି ହୋଇଛି। ସାରା ଦେଶରେ ଲାଗୁ ହେବ ଗୋଟିଏ ନିୟମ। ସବୁ ରାଜ୍ୟ ସରକାରଙ୍କୁ ଏନେଇ ନୋଟିସ୍ ପଠାଇଛନ୍ତି ସୁପ୍ରିମକୋର୍ଟ।

ସୁପ୍ରିମକୋର୍ଟ ଶୁକ୍ରବାର ଦିନ ଦିଲ୍ଲୀ-ଏନସିଆରରେ ବୁଲା କୁକୁରମାନଙ୍କ ଉପରେ ଅଗଷ୍ଟ ୮ ତାରିଖରେ ଦେଇଥିବା ବିବାଦୀୟ ଆଦେଶକୁ ସଂଶୋଧନ କରି ଟୀକାକରଣ ଏବଂ କୃମିନାଶକ ପରେ କୁକୁରାମାନଙ୍କୁ ସେହି ଅଞ୍ଚଳରେ ଛାଡିବାକୁ ନିର୍ଦ୍ଦେଶ ଦେଇଛନ୍ତି। ତଥାପି, ରେବିଜ୍ କିମ୍ବା ଆକ୍ରମଣାତ୍ମକ ଆଚରଣ ଥିବା କୁକୁରମାନଙ୍କୁ ଟିକାକରଣ କରି ପୃଥକ ଆଶ୍ରୟସ୍ଥଳରେ ରଖିବାକୁ ପଡିବ ବୋଲି ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି।

ତିନି ଜଣିଆ ସ୍ୱତନ୍ତ୍ର ଖଣ୍ଡପୀଠ ଏସମ୍ପର୍କିତ ମାମଲାର ଶୁଣାଣି କରି ରାୟ ଦେଇଛନ୍ତି। ବିଚାରପତି ବିକ୍ରମ ନାଥ, ବିଚାରପତି ସନ୍ଦୀପ ମେହେଟା ଏବଂ ବିଚାରପତି ଏନଭି ଅଞ୍ଜାରିଆଙ୍କୁ ନେଇ ଗଠିତ ତିନି ଜଣିଆ ଖଣ୍ଡପୀଠ ଏହି ରାୟ ଶୁଣାଇଛନ୍ତି।

ସର୍ବୋଚ୍ଚ ନ୍ୟାୟାଳୟ କଡ଼ାକଡ଼ି ଭାବରେ କହିଛନ୍ତି ଯେ ବୁଲା କୁକୁରମାନଙ୍କୁ ସାର୍ବଜନୀନ ଭାବରେ ଖାଇବାକୁ ଦିଆଯିବ ନାହିଁ। ବୁଲା କୁକୁରମାନଙ୍କୁ ଖାଦ୍ୟ ଦେବା ପାଇଁ ସ୍ୱତନ୍ତ୍ର ସ୍ଥାନ ତିଆରି କରାଯିବ। ରାସ୍ତାରେ କୁକୁରମାନଙ୍କୁ ଖାଦ୍ୟ ଦେଉଥିବା ବ୍ୟକ୍ତିମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ। ଯଦି ଏହି ନିୟମକୁ କେହି ଉଲ୍ଲଂଘନ କରନ୍ତି, ତାହାଲେ ଉଲ୍ଲଂଘନକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ।

ସେହିପରି କୋର୍ଟ ପଶୁପ୍ରେମୀମାନଙ୍କୁ କୁକୁରମାନଙ୍କୁ ପୋଷ୍ୟ ଗ୍ରହଣ କରିବା ପାଇଁ ଏକ ଆବେଦନ ଦାଖଲ କରିବାକୁ ପଡିବ। କିନ୍ତୁ ସେମାନେ ଯେପରି ରାସ୍ତାକୁ ନ ଆସନ୍ତି ତା’ର ଦାୟିତ୍ବ ମଧ୍ୟ ପୋଷ୍ୟ ଗ୍ରହଣକାରୀଙ୍କୁ ନେବାକୁ ପଡିବ। ଏହି ମାମଲାରେ ଯଦି କୌଣସି ବ୍ୟକ୍ତି କିମ୍ବା ଏନଜିଓ ଅଦାଲତକୁ ଆସିବାକୁ ଚାହାଁନ୍ତି, ତାହାଲେ ସେମାନଙ୍କୁ ଯଥାକ୍ରମେ ୨୫ ହଜାର ଟଙ୍କା ଏବଂ ୨ ଲକ୍ଷ ଟଙ୍କା ଜମା କରିବାକୁ ପଡିବ। ଯାହା କୁକୁରମାନଙ୍କ ପାଇଁ ଭିତ୍ତିଭୂମି ତିଆରି କରିବା ପାଇଁ ବ୍ୟବହାର କରାଯିବ।

ସୂଚନାଯୋଗ୍ୟ, ଅଗଷ୍ଟ ୧୧ ତାରିଖରେ ଦିଲ୍ଲୀ-ଏନସିଆରର ସମସ୍ତ ବୁଲା କୁକୁରଙ୍କୁ ୮ ସପ୍ତାହ ଭିତରେ ଉଠାଇ ନେଇ ବନ୍ଧ୍ୟାକରଣ କରିବା ସହ ଆଶ୍ରୟସ୍ଥଳୀରେ ରଖିବାକୁ ଆଦେଶ ପାରିତ କରିଥିଲେ ଦୁଇ ଜଣିଆ ଖଣ୍ଡପୀଠ । ଏହି ରାୟକୁ ଚ୍ୟାଲେଞ୍ଜ କରି ହୋଇଥିବା ଆବେଦନକୁ ଗ୍ରହଣ କରି ସୁପ୍ରିମକୋର୍ଟ ମାମଲାକୁ ସ୍ୱତନ୍ତ୍ର ଖଣ୍ଡପୀଠକୁ ସ୍ଥାନାନ୍ତର କରିଥିଲେ।

ଅଧିକ ପଢନ୍ତୁ: ରାସ୍ତା ଖରାପ ଥିଲେ ଦେବାକୁ ପଡ଼ିବନି ଟୋଲ୍: ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ