Pahalgam Hybrid Terrorism: ପହଲଗାମ୍‌ ଆକ୍ରମଣ ପଛରେ ଅଛି କି ହାଇବ୍ରିଡ୍ ଟେରରିଷ୍ଟଙ୍କ ହାତ ?

ଜାମ୍ମୁ କାଶ୍ମୀର ପହଲଗାମ ଆକ୍ରମଣ ପଛରେ ଅଛି କି ହାଇବ୍ରିଡ୍ ଟେରରିଷ୍ଟଙ୍କ ହାତ। ପର୍ଯ୍ୟଟକଙ୍କ ଆକ୍ରମଣ ପଛରେ ପାକିସ୍ତାନୀ ହାଇବ୍ରିଡ୍ ଟେରରିଜିମ ଫଣ୍ଡାକୁ ନେଇ ଏବେ ଜୋର ଧରିଛି ଚର୍ଚ୍ଚା । ୨୦୨୧ ଅଗଷ୍ଟରେ ପ୍ରଥମେ ଜାମ୍ମୁ କାଶ୍ମୀରରେ ହାଇବ୍ରିଡ ଟେରରିଷ୍ଟ ଥିବା ସାମ୍ନାକୁ ଆସିଥିଲା । 

ତେବେ ଗତକାଲିର ଆକ୍ରମଣ ପଛରେ ହାଇବ୍ରିଡ୍ ଟେରରିଷ୍ଟଙ୍କ ଆକ୍ରମଣ ଥିବା ସଂଦେହ ବଢ଼ିଛି । କାଶ୍ମୀର ଉପତ୍ୟକାରେ ହାଇବ୍ରିଡ୍ ଟେରରିଜିମ୍ ସୁରକ୍ଷା ଓ ଗୁଇନ୍ଦା ସଂସ୍ଥାଙ୍କ ନିଦ ହଜାଇଦେଇଛି । ଏହି ହାଇବ୍ରିଡ୍ ଟେରରିଷ୍ଟଙ୍କୁ ଚିହ୍ନଟ କରିବା ଓ ଧରିବା ସୁରକ୍ଷାବାହିନୀ ପାଇଁ ବଡ଼ ଚ୍ୟାଲେଂଜ । ତେବେ ଚର୍ଚ୍ଚାକୁ ଆସିଥିବା ଏହି ହାଇବ୍ରିଡ୍ ଟେରରିଜିମ କ'ଣ ? 

ଅଧିକ ପଢ଼ନ୍ତୁ:ପହଲଗାମରେ ହମଲା; ଏହି ଆତଙ୍କୀ ସଂଗଠନ କଲା ନିଜକୁ ଦାୟୀ

ତେବେ ଏମାନେ କେଉଁଠୁ ଆସନ୍ତି ? ଆତଙ୍କୀ କାର୍ଯ୍ୟକଳାପ ପରେ କୁଆଡ଼େ ଯାଆନ୍ତି ? କେଉଁଠୁ ଆଣନ୍ତି ଅସ୍ତ୍ରଶସ୍ତ୍ର ? ବନ୍ଧୁକ ଚାଳନାଠୁ ଆରମ୍ଭ କରି ଅନ୍ୟ ଅସ୍ତ୍ରଶସ୍ତ୍ର ଚାଳନା କେମିତି ଶିଖନ୍ତି ? କିଏ ଏମାନଙ୍କୁ ପରିଚାଳନା କରିଥାଏ ? ଏମାନେ କାହାକୁ କରନ୍ତି ଟାର୍ଗେଟ ? ସୁରକ୍ଷା ଓ ଗୁଇନ୍ଦା ବାହିନୀ ପାଇଁ ଏମାନେ କାହିଁକି ବଡ଼ ଚ୍ୟାଲେଂଜ ? ସିଧା କହିବାକୁ ଗଲେ କାଶ୍ମୀରର ସାଧାରଣ ଯୁବକଙ୍କୁ ଆତଙ୍କବାଦୀ କାର୍ଯ୍ୟକଳାପରେ ନିୟୋଜିତ କରାଯାଏ । ଯେଉଁ ମାନଙ୍କର ଅତିତରେ କୌଣସି କ୍ରାଇମ ରେକର୍ଡ ନାହିଁ ସେହି ଭଳି ଯୁବକଙ୍କୁ ଆତଙ୍କବାଦୀ ପାଇଁ ପ୍ରୋତ୍ସାହିତ କରାଯାଏ । 

ଏମାନେ ସାଧାରଣ ଲୋକଙ୍କ ଭଳି ଗାଁରେ ଚଳପ୍ରଚଳ କରନ୍ତି । ସମସ୍ତଙ୍କ ସହ ମିଶି ରୁହନ୍ତି । ସୋସିଆଲ ମିଡିଆରୁ ଅସ୍ତ୍ର ଚାଳନା ଶିଖନ୍ତି । ପାକିସ୍ତାନ ଆତଙ୍କୀ ସଂଗଠନ ଏମାନଙ୍କୁ ନିୟନ୍ତ୍ରଣ କରିଥାଏ । ସ୍ଲିପର ସେଲ ମାଧ୍ୟମରେ ଏମାନଙ୍କ ପାଖକୁ ଖବର ଦିଆଯାଏ । ଗୋଟିଏ ଅପରାଧ ପରେ ଆଉ କୌଣସି ଆତଙ୍କୀ କାର୍ଯ୍ୟରେ ଏମାନଙ୍କୁ ବ୍ୟବହାର କରାଯାଏ ନାହିଁ । ପୁଣି ନୂଆ ଯୁବକଙ୍କୁ ଆତଙ୍କୀ ସଂଗଠନ ଚିହ୍ନଟ କରି କାମରେ ଲଗାଇଥାଏ । ତେଣୁ ଏମାନଙ୍କୁ ଚିହ୍ନଟ କରିବା ସୁରକ୍ଷା ବାହିନୀ ପାଇଁ କଷ୍ଟକର ହୋଇଥାଏ । ପୂର୍ବରୁ କୌଣସି ଅପରାଧିକ ରେକର୍ଡ ନଥିବାରୁ ଏମାନଙ୍କୁ ଧରିବା ସହଜ ହୋଇନଥାଏ । ଅପରାଧ ପରେ ଏମାନେ ସ୍ଥାନୀୟ ଅଞ୍ଚଳରେ ସାଧାରଣ ଭାବେ ଚଳପ୍ରଚଳ କରିଥାନ୍ତି । ସୁରକ୍ଷାବାହିନୀ ଯଦି ବି ଚିହ୍ନଟ କରେ ତେବେ ଏମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ବେଳେ ସ୍ଥାନୀୟ ଲୋକେ ଏହାକୁ ବିଶ୍ବାସ କରନ୍ତି ନାହିଁ ଓ ପୋଲିସକୁ ବିରୋଧ କରନ୍ତି । କଡ଼ା କାର୍ଯ୍ୟାନୁଷ୍ଠାନ ହେଲେ ଅଞ୍ଚଳରେ ଅଧିକ ଆତଙ୍କୀ କାର୍ଯ୍ୟକଳାପ ବଢ଼ିବା ଆଶଙ୍କା ଥାଏ । ତେଣୁ ଆତଙ୍କବାଦର ଏଭଳି ଫଣ୍ଡା ସୁରକ୍ଷାବାହିନୀ ପାଇଁ ବଡ଼ ଚ୍ୟାଲେଂଜ ପାଲଟିଛି। 

ସୂଚନାଯୋଗ୍ୟ, ଗତକାଲି ପହଲଗାମର ବୈସରନ ଭ୍ୟାଲିରେ ରକ୍ତର ହୋଲି ଖେଳିଥିଲେ ଆତଙ୍କବାଦୀ । ଜମ୍ମୁ କାଶ୍ମୀର ପହଲଗାମରେ ପର୍ଯ୍ୟଟକଙ୍କୁ ଟାର୍ଗେଟ କରି ଆଖିବୁଜା ଗୁଳିମାଡ଼ କରିଥିଲେ। ଏଥିରେ ୨୬ ଜଣଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ରହିଛନ୍ତି ଦୁଇ ଜଣ ବିଦେଶୀ ପର୍ଯ୍ୟଟକ। ଜଣେ ନେପାଳର ଓ ଆଉ ଜଣେ ସାଉଦି ଆରବ ନାଗରିକ। ଅନ୍ୟମାନଙ୍କ ଭିତରେ ଓଡ଼ିଶାରୁ ଜଣେ ଏବଂ ମହାରାଷ୍ଟ୍ର, ଉତ୍ତରପ୍ରଦେଶ, ଗୁଜରାଟ, ତାମିଲନାଡୁ ଓ କର୍ଣ୍ଣାଟକରୁ ପର୍ଯ୍ୟଟକ ଅଛନ୍ତି। ଜଣେ ନୌସେନା ଓ ଜଣେ ଗୁଇନ୍ଦା ବ୍ୟୁରୋ ଅଧିକାରୀ ବି ପ୍ରାଣ ହରାଇଛନ୍ତି। ଆକ୍ରମଣରେ ଅନ୍ୟ ୧୦ ଜଣ ଆହତ ହୋଇଛନ୍ତି।

ଅଧିକ ପଢ଼ନ୍ତୁ: ଆତଙ୍କୀ ହମ୍‌ଲା: ଦିଲ୍ଲୀରେ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ ବୈଠକ