ଦିଲ୍ଲୀରେ ଘନ କୁହୁଡ଼ି; ଉଡ଼ି ପାରୁନି ବିମାନ, ଟ୍ରେନ ଚଳାଚଳ ପ୍ରଭାବିତ

ଉତ୍ତର ଭାରତରେ ଘନ କୁହୁଡ଼ି ଯୋଗୁ ପ୍ରଭାବିତ ହେଲା ବିମାନ ଓ ଟ୍ରେନ ଚଳାଚଳ । ଦିଲ୍ଲୀରେ କୁହୁଡ଼ି ଯୋଗୁ ଦୃଶ୍ୟମାନ ଦୂରତା କମିଯିବାରୁ ୩୦ରୁ ଅଧିକ ବିମାନ ବିଳମ୍ବିତ ହୋଇଛି । ସେହିପରି ୧୭ଟି ବିମାନର ଉଡ଼ାଣକୁ ରଦ୍ଦ କରିଦିଆଯାଇଛି । ଦିଲ୍ଲୀ ଅନ୍ତର୍ଜାତୀୟ ବିମାନ ବନ୍ଦରରେ ଯାତ୍ରୀ ନାହିଁନଥିବା ଅସୁବିଧାର ସମ୍ମୁଖିନ ହୋଇଛନ୍ତି ।

ଘଣ୍ଟାଘଣ୍ଟା ଧରି ବିମାନ ବିଳମ୍ବିତ ହେଉଥିବାରୁ ଗନ୍ତବ୍ୟ ସ୍ଥଳକୁ ଯାଇନ ପାରି ଅଟକି ରହିଛନ୍ତି ଯାତ୍ରୀ । ପାଗ ଖରାପ ଥିବାରୁ ବିମାନ ଚଳାଚଳ ପ୍ରଭାବିତ ହୋଇଛି । କେବଳ କୁହୁଡ଼ି ନୁହେଁ ଦିଲ୍ଲୀରେ ପ୍ରବଳ ଶୀତ ଅନୁଭୂତ ହେଉଛି । ସହରରେ ତାପମାତ୍ରା ୫ ଡିଗ୍ରୀକୁ ଖସି ଆସିଛି । ବିମାନ ବିଳମ୍ବିତ ଥିବାରୁ ଯାତ୍ରୀ ମାନେ ନିଜ ନିଜ ଲଗେଜ ସହ ବିମାନ ବନ୍ଦରରେ ଅପେକ୍ଷା କରିଛନ୍ତି ।

ବିମାନ ବନ୍ଦରକୁ ଆସିବା ପୂର୍ବରୁ ନିଜ ଏୟାରଲାଇନ୍ସ ସହ ଯୋଗାଯୋଗ କରିବାକୁ ବିମାନବନ୍ଦର କର୍ତ୍ତୃପକ୍ଷଙ୍କ ପକ୍ଷରୁ ସୂଚନା ଦିଆଯାଇଛି । ସେପଟେ ପ୍ରବଳ କୁହୁଡ଼ି ଯୋଗୁ ଟ୍ରେନ ଚଳାଚଳ ମଧ୍ୟ ପ୍ରଭାବିତ ହୋଇଛି । ଭିଜିବିଲିଟି କମିଯାଇଥିବାରୁ ଦିଲ୍ଲୀ ଯାଉଥିବା ୩୦ ଟ୍ରେନ ବିଳମ୍ବରେ ଚାଲୁଛି ।