LIVE TV
ଖରାଦିନେ ସମସ୍ତଙ୍କୁ ଆଇସକ୍ରିମ୍ ଖାଇବାକୁ ଭଲ ଲାଗିଥାଏ । ସାଧାରଣତଃ ଲୋକମାନେ ଘରେ ବସି ଅନଲାଇନ୍ରେ ଆଇସକ୍ରିମ୍ ମଗାଇ ଖାଇଥାନ୍ତି । କିନ୍ତୁ ନୋଏଡାରେ ଏମିତି ଏକ ଘଟଣା ଘଟିଛି ଯାହା ଶୁଣିଲା ପରେ ଆପଣ ଆଶ୍ଚର୍ଯ୍ୟ ହୋଇଯିବେ । ତିନି ଦିନ ପୂର୍ବେ ମୁମ୍ବାଇରେ ଏକ ଆଇସକ୍ରିମ ଭିତରୁ କଟା ଆଙ୍ଗୁଠି ମିଳିବା ପରେ ଏବେ ନୋଏଡାର ଏକ ଆଇସ୍କ୍ରିମ ଭିତରେ ବିଛା ବାହାରିଥିବା ଦେଖିବାକୁ ମିଳିଛି ।
Also Read
ସୂଚନା ଅନୁସାରେ ନୋଏଡା ଅଞ୍ଚଳରେ ଜଣେ ମହିଳା ଏକ ଅନଲାଇନ୍ ସପିଂ ପ୍ଲାଟଫର୍ମରେ ଆଇସ୍କ୍ରିମ୍ ଅର୍ଡର କରିଥିଲେ। ଯେତେବେଳେ ସେ ଆଇସକ୍ରିମ୍ ବାକ୍ସ ଖୋଲିଲେ, ତା ’ଭିତରେ ଏକ ବିଛା ମିଳିଲା । ଏହା ପରେ ଏହି ଘଟଣା ସମ୍ପର୍କରେ ମହିଳା ଜଣକ ଫୁଡ୍ ସେଫ୍ଟି ଡିପାର୍ଟମେଣ୍ଟ ଜଣାଇଥିଲେ ।
ଉକ୍ତ ମହିଳାଙ୍କ ଅଭିଯୋଗ ପରେ ଖାଦ୍ୟ ସୁରକ୍ଷା ବିଭାଗର ଏକ ଟିମ୍ ପୀଡିତା ମହିଳାଙ୍କ ଘରେ ପହଞ୍ଚିଥିଲେ ଏବଂ ପୁରା ଘଟଣା ବିଷୟରେ ପଚାରି ବୁଝିଥିଲେ । ଘଟଣା ବିଷୟରେ ଜାଣିବା ପରେ ଖାଦ୍ୟ ବିଭାଗ ଅନଲାଇନ୍ ସପିଂ ପ୍ଲାଟଫର୍ମର ସେହ ଷ୍ଟୋର୍ରେ ପହଞ୍ଚିଥିଲେ । ସେଠାରୁ ସେମାନେ ଆଇସକ୍ରିମର ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଇଛନ୍ତି ।
ମିଳିଥିବା ସୂଚନା ଅନୁଯାୟୀ, ନୋଏଡାର ସେକ୍ଟର ୧୨ରେ ରହୁଥିବା ଦୀପା ଶନିବାର ସକାଳେ ଅନଲାଇନ୍ ସପିଂ ଆପରୁ ଏକ ଜଣାଶୁଣା ବ୍ରାଣ୍ଡର ଭାନିଲା ଫ୍ଲେଭର ଆଇସକ୍ରିମ୍ ଅର୍ଡର କରିଥିଲେ । ଯେତେବେଳେ ସେ ଆଇସ୍କ୍ରିମ୍ ବାକ୍ସ ଖୋଲିଲେ, ସେ ଭିତରେ ଏକ ବିଛା ଥିବା ସେ ଦେଖିବାକୁ ପାଇଥିଲେ । ଏହା ପରେ ଦୀପା ଏହାର ଏକ ଭିଡିଓ ପ୍ରସ୍ତୁତ କରି ସୋସିଆଲ ମିଡିଆରେ ଅପଲୋଡ୍ କରିଥିଲେ ।
After a cut finger in ice cream, a centipede was found in Amul Ice Cream in Noida, watch @Amul_Coop @letsblinkit @UNWFP_India #noida pic.twitter.com/Mc5cm7rb6O
— Jyoti Karki (@Jyoti_karki_) June 15, 2024
ପରେ ଅନଲାଇନ୍ ସପିଂ ପ୍ଲାଟଫର୍ମ ଦୀପାଙ୍କୁ ଟଙ୍କା ଫେରସ୍ତ କରିଥିଲା ଏବଂ ପରେ ଆଇସକ୍ରିମ ଉତ୍ପାଦନକାରୀ କମ୍ପାନୀର ଏକ ଟିମ୍ ମଧ୍ୟ ଦୀପାଙ୍କ ସହ ଯୋଗାଯୋଗ କରି ଯାଞ୍ଚ ପାଇଁ କହିଥିଲେ । ଅନ୍ୟପକ୍ଷରେ ସୋସିଆଲ ମିଡିଆରେ ଭାଇରାଲ ଭିଡିଓ ଆଧାରରେ ନୋଏଡା ଖାଦ୍ୟ ବିଭାଗର ଦଳ ସକ୍ରିୟ ହୋଇଛି । ଖାଦ୍ୟ ବିଭାଗ ଦୀପାଙ୍କ ସହ ରାତିରେ ଯୋଗାଯୋଗ କରି ତଦନ୍ତ ପାଇଁ ଦୀପାଙ୍କ ଘରେ ପହଞ୍ଚିଥିଲା।
ଦୀପାଙ୍କ ସହ କଥା ହେବା ପରେ ଖାଦ୍ୟ ବିଭାଗ ଟିମ୍ ମଧ୍ୟ ସେକ୍ଟର ୨୨ ଶାହାଦତ୍ପୁରରେ ଅବସ୍ଥିତ ଅନଲାଇନ୍ ସପିଂ ପ୍ଲାଟଫର୍ମର ଷ୍ଟୋର୍କୁ ଯାଇଥିଲା, ଯେଉଁଠାରୁ ଆଇସକ୍ରିମ୍ ପଠାଯାଇଥିଲା। ଖାଦ୍ୟ ବିଭାଗର ଦଳ ସେଠାରେ ପହଞ୍ଚି ଅନୁସନ୍ଧାନ ଏବଂ ଯାଞ୍ଚ କରିଥିଲେ। ଯେଉଁଠାରେ ଆଇସକ୍ରିମ୍ ରଖାଯାଏ ସେହି ସ୍ଥାନକୁ ମଧ୍ୟ ଯାଞ୍ଚ କରାଯାଇଥିଲା । ଖାଦ୍ୟ ବିଭାଗ ଟିମ୍ ଆଇସକ୍ରିମର ନମୁନା ନେଇ ପରୀକ୍ଷା ପାଇଁ ପଠାଇଛନ୍ତି ।
