Mumbai: ଅଟୋ ଭିତରେ ନାବାଳକ ଉପରକୁ ଛାଡିଦେଲେ ପିଟ୍ ବୁଲ୍, କୁକୁର କାମୁଡିବା ବେଳେ ମଜା ଉଠାଇଲେ କୁକୁରର ମାଲିକ

ଜଣେ ନାବାଳକଙ୍କୁ ନିଜର ପୋଷା କୁକୁରକୁ ନେଇ ଜଣେ ବ୍ୟକ୍ତି ଭୟଭୀତ କରାଉଥିବାର ଭିଡିଓ ସୋସିଆଲ୍ ମିଡିଆରେ ଭାଇରାଲ ହୋଇଛି। ପିଲାଟି କୁକୁର ପାଖରୁ ଯେତେ ଦୂରେଇ ଯିବାକୁ ଚେଷ୍ଟା କଲେ ମଧ୍ୟ କୁକୁରଟି ପିଲାଟିକୁ କାମୁଡି ଦେଇଥିବାର ଦେଖାଦେଇଛି। ମୁମ୍ବାଇରେ ଜଣେ ବ୍ୟକ୍ତି ଜଣେ ୧୧ ବର୍ଷୀୟ ନାବାଳକକୁ ଏକ ପିଟ୍‌ ବୁଲ୍‌ କୁକୁର ସହିତ ଅଟୋ ଭିତରେ ଭୟଭୀତ କରୁଥିବା ବେଳେ କୁକୁରଟି ଆକ୍ରମଣ କରି ବାଳକଟିକୁ କାମୁଡ଼ି ଦେଇଥିଲା।

ସମଗ୍ର ଘଟଣା ଭିଡିଓରେ ରେକର୍ଡ ହୋଇଥିଲା, ଯେଉଁଠାରେ ଉପସ୍ଥିତ ଅନ୍ୟ ଲୋକମାନେ ବାଳକଟିକୁ ସାହାଯ୍ୟ କରିବା ପରିବର୍ତ୍ତେ ହସୁଥିବା ଓ ଦୃଶ୍ୟଟି ଉପଭୋଗ କରୁଥିବା ଦେଖାଯାଇଥିଲା। ଜୁଲାଇ ୧୭ ତାରିଖରେ, ମାଙ୍କହର୍ଡରେ ବାଳକଟି ତାଙ୍କ ସାଙ୍ଗମାନଙ୍କ ସହ ଏକ ଅଟୋରିକ୍ସାରେ ଖେଳୁଥିବା ବେଳେ ସେମାନେ ପିଟ୍‌ ବୁଲ୍‌ କୁକୁରଟିକୁ ଦେଖି ଉତ୍ସାହିତ ହୋଇ "ପିଟ୍‌ ବୁଲ୍!" ବୋଲି ଚିତ୍କାର କରିଥିଲେ। କିନ୍ତୁ କୁକୁରର ମାଲିକ, ସୋହେଲ୍‌ ଖାନ୍‌, ପିଟ୍‌ ବୁଲକୁ ଧରି ଅଟୋ ଭିତରେ ପ୍ରବେଶ କରିଥିଲେ, ତେଣୁ ସବୁ ପିଲା ଭୟରେ ପଳାଇଥିଲେ। କିନ୍ତୁ ପୀଡ଼ିତ ବାଳକ ହମଜା ଠିକ୍ ସମୟରେ ଯାଇ ପାରିନଥିଲା। ତା ପରେ ଯାହା ଘଟିଥିଲା ତାହା ଅତ୍ୟନ୍ତ ଭୟାନକ।

ସୋହେଲ୍‌ ପ୍ରଥମେ ବାଳକଟିକୁ କୁକୁରକୁ ଦେଖାଇ ଭୟଭୀତ କରିଥିଲେ ଏବଂ ପରେ ପିଲାଟି ଉପରକୁ କୁକୁରଟିକୁ ଛାଡ଼ି ଦେଇଥିଲେ। ନିଜକୁ ବଞ୍ଚାଇବା ପାଇଁ ଚେଷ୍ଟା କରି ହମଜା ଅଟୋରୁ ଡେଇଁ ଦୌଡ଼ିଥିଲା, କିନ୍ତୁ ପିଟ୍‌ ବୁଲ୍‌ ତାକୁ ଗୋଡ଼ାଇ ଏକାଧିକ ସ୍ଥାନରେ କାମୁଡ଼ିଥିଲା। ବାଳକଟି ଅଭିଯୋଗ କରିଥିଲା ଯେ କେହି ତାକୁ ସାହାଯ୍ୟ କରିବାକୁ ଆସିନଥିଲେଅ। ବରଂ ଅନ୍ୟମାନେ ଭିଡିଓ କରିବାରେ ବ୍ୟସ୍ତ ଥିଲେ। ସେ କହିଥିଲେ ଯେ କୁକୁରଟି ତାକୁ କାମୁଡ଼ି ଓ ଗୋଡ଼ାଇବା ସହ ତା’ର ସାର୍ଟ ଧରି ଟାଣିବା ବେଳେ ସେ ବହୁତ ଭୟଭୀତ ହୋଇ ଯାଇଥିଲେ।

ବାଳକର ବାପା ମାଙ୍କହର୍ଡ ଥାନାରେ ଏକ ଅଭିଯୋଗ ଦାୟର କରିଥିଲେ। ଅଭିଯୋଗ ଆଧାରରେ, ପୁଲିସ୍‌ ସୋହେଲ୍‌ ଖାନ୍‌ଙ୍କ ବିରୁଦ୍ଧରେ ଭାରତୀୟ ନ୍ୟାୟ ସଂହିତା (ବିଏନ୍‌ଏସ୍‌)ର ଧାରା ୨୯୧, ୧୨୫ ଏବଂ ୧୨୫ଏ ଅଧୀନରେ ଏକ ମାମଲା ରୁଜୁ କରିଛି। ଅଭିଯୁକ୍ତ ବର୍ତ୍ତମାନ ଫେରାର ଅଛନ୍ତି ଏବଂ ପୁଲିସ୍‌ ତାଙ୍କୁ ଗିରଫ କରିବା ପାଇଁ ଖୋଜାଖୋଜି ଆରମ୍ଭ କରିଛି।

ଅଧିକ ପଢ଼ନ୍ତୁ: ଦୁଇ ଭାଇଙ୍କର ଗୋଟିଏ କନ୍ୟା, ଧୁମଧାମରେ ହେଲା ବାହାଘର