LIVE TV
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ୨ ନମ୍ବର ତିହାର ଜେଲରେ ରହିଛନ୍ତି । ତିହାର ଜେଲର ୬୭୦ ନମ୍ବର କଏଦୀ ଏବେ ଅରବିନ୍ଦ କେଜ୍ରିଓ୍ବାଲ । ଅବକାରୀ ନୀତି ଦୁର୍ନୀତି ମାମଲାରେ ଇଡି ଦ୍ବାରା ଗିରଫ ହେବା ପରେ ଏବେ ଜେଲରେ ଅଛନ୍ତି କେଜ୍ରିଓ୍ବାଲ । ତିହାର ଜେଲର ବାରାକ ନମ୍ବର ୨ ତାଙ୍କର ନୂଆ ଠିକଣା ହୋଇଛି । ତିହାର ଜେଲରେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ କଟିଛି ପ୍ରଥମ ରାତି । କ୍ଷମତାରେ ଥିବା ସମୟରେ ପ୍ରଥମ ମୁଖ୍ୟମନ୍ତ୍ରୀ ଭାବେ ସେ ଜେଲ ଯାଇଛନ୍ତି । ସୋମବାର ଦିନ ଦିଲ୍ଲୀର ମଦ ନୀତି ମାମଲାରେ ଆମ୍ ଆଦମୀ ପାର୍ଟି ସୁପ୍ରିମୋଙ୍କୁ ଦ୍ବିତୀୟ ପର୍ଯ୍ୟାୟ ରିମାଣ୍ଡ ଅବଧି ଶେଷ ହେବା ପରେ କୋର୍ଟ ତାଙ୍କୁ ଗତକାଲି ୧୫ ଦିନିଆ ବିଚାର ବିଭାଗୀୟ ହାଜତକୁ ପଠାଇ ଦେଇଥିଲେ । ଆସନ୍ତା ୧୫ ତାରିଖ ପର୍ଯ୍ୟନ୍ତ ସେ ହାଜତରେ ରହିବେ ।
କେମିତି କଟିଲା ପ୍ରଥମ ସକାଳ ?
Also Read
ତିହାର ଜେଲରେ ପ୍ରଥମ ରାତି ବିତାଇବା ପରେ ମଙ୍ଗଳବାର ସକାଳେ ଜଳଖିଆ ପାଇଁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ରୁଟି ଓ ଚା ’ଦିଆଯାଇଥିଲା । ଅନ୍ୟ କଏଦୀଙ୍କ ଭଳି କେଜ୍ରିୱାଲ ସୂର୍ଯ୍ୟୋଦୟ ସମୟ ପାଖାପାଖି ସକାଳ ୬ଟା ୩୦ରେ ଶଯ୍ୟା ଛାଡ଼ିଥିଲେ । ୬ଟା ୪୦ ବେଳକୁ ଜଳଖିଆ ଭାବେ ଚା’ ଓ ପାଉଁରୁଟି ଦିଆଯାଇଥିଲା । କିଛି ସମୟ ପାଇଁ ଯୋଗ ମଧ୍ୟ କରିଥିଲେ । ଏହାପରେ ସେ ଗାଧୋଇଥିଲେ ।
ଇଡି ହାଜତରେ ରହି ମଧ୍ୟ ସେ ସରକାର ଚଳାଉଥିବାରୁ ଯେଉଁଦିନ ଶୁଣାଣି ଥିବ ସେଦିନ ଅଦାଲତକୁ ଯିବେ କିମ୍ବା ତାଙ୍କ ଆଇନଜୀବୀଙ୍କୁ ଭେଟିପାରିବେ । ସକାଳ ୧୧ଟାରେ ଜେଲ୍ରେ ମଧ୍ୟାହ୍ନ ଭୋଜନ ଦିଆଯାଇଛି । ଏହାପରେ କଏଦୀମାନଙ୍କୁ ସେମାନଙ୍କ କୋଠରୀରେ ମଧ୍ୟାହ୍ନ ୧୨ଟାରୁ ଅପରାହ୍ଣ ୩ଟା ପର୍ଯ୍ୟନ୍ତ ରହିବାକୁ ହୋଇଥାଏ । ଅନ୍ୟ ବନ୍ଦୀମାନଙ୍କ ଭଳି କେଜ୍ରିୱାଲଙ୍କୁ ଅପରାହ୍ଣ ୩ଟା ୩୦ରେ ଚା’ ଓ ବିସ୍କୁଟ ଖାଇବାକୁ ଦିଆଯିବ। ଏହାପରେ ୪ଟା ବେଳେ ସେ ଆଇନଜୀବୀଙ୍କୁ ଭେଟିପାରିବେ।
ରାତ୍ରିରେ କେମିତି ଥାଏ ବ୍ୟବସ୍ଥା ?
ସେହିପରି ରାତ୍ରିଭୋଜନ ସନ୍ଧ୍ୟା ୬ଟା ୩୦ ମିନିଟ୍ରେ ଦିଆଯାଇଥାଏ । ଏହାପରେ ରାତି ପ୍ରାୟ ୭ଟା ବେଳକୁ ସେମାନଙ୍କୁ କୋଠରୀରେ ବନ୍ଦ କରି ଦିଆଯାଇଥାଏ। ଖାଇବା ଓ ଅନ୍ୟ କାର୍ଯ୍ୟ ନଥିଲେ କଏଦୀମାନେ ସକାଳ ୫ଟାରୁ ରାତି ୧୧ଟା ପର୍ଯ୍ୟନ୍ତ ଟିଭି ଦେଖିପାରିବେ। ତେବେ ଅଳ୍ପ କେତୋଟି ଚାନେଲ୍ ଟିଭିରେ ଦେଖିବାକୁ ମିଳିଥାଏ।
