Maha Kumbh 2025: ମହାକୁମ୍ଭ ପାଇଁ ଆସିବେ ୪୦ କୋଟି ଶ୍ରଦ୍ଧାଳୁ, ଭବ୍ୟ-ଦିବ୍ୟ ଓ ଡିଜିଟାଲ୍ କରିବାକୁ ଲାଗିଛି ସରକାରଙ୍କ ଜୀ-ଜାନ୍

ଉତ୍ତର ପ୍ରଦେଶ ପ୍ରୟାଗ କ୍ଷେତ୍ରରେ ୨୦୨୫ ମହାକୁମ୍ଭ ପାଇଁ ଚାଲିଛି ମହା ଆୟୋଜନ। ଜାନୁଆରୀ ୧୩ରୁ ଫେବ୍ରୁଆରୀ ୨୬ ଯାଏଁ ଚାଲିବାକୁ ଥିବା ବିଶ୍ବର ସର୍ବବୃହତ ଆଧାତ୍ମିକ ମେଳାକୁ ଆସିବେ ୪୦ କୋଟିରୁ ଅଧିକ ଲୋକ। ଏଥର ମେଳାକୁ ଭବ୍ୟ-ଦିବ୍ୟ ଓ ଡିଜିଟାଲ୍ କରିବାକୁ ଉଭୟ କେନ୍ଦ୍ର ଓ ୟୁପି ସରକାର ଜୀ-ଜାନ୍ ଲଗାଇଛନ୍ତି। ତେବେ ଏ ମହାକୁମ୍ଭ ମେଳା ପାଇଁ କେମିତି ଚାଲିଛି ପ୍ରସ୍ତୁତି- ସଂଗମ ତଟରେ ସ୍ଥିତି ପରଖିଛି ଓଟିଭି ଟିମ୍ ।

ପୁଣ୍ୟୋତୟା ଗଂଗା, ପାପନାଶିନୀ ଯମୁନା ଓ ଅଦୃଶ୍ୟ ସରସ୍ବତୀ ନଦୀଙ୍କ ମିଳନସ୍ଥଳୀରେ ଲାଗିବ ବିଶ୍ବର ସବୁଠୁ ମହାମେଳା କୁମ୍ଭମେଳା । ସାଧୁସନ୍ଥଙ୍କ ରାଜକୀୟ ସ୍ନାନ ପାଇଁ ସଜେଇ ହେଲାଣି ସଙ୍ଗମ ସ୍ଥଳ ତ କୋଟି କୋଟି ଶ୍ରଦ୍ଧାଳୁଙ୍କୁ ପାପ ଧୌତ ଅପେକ୍ଷାରେ ତୀର୍ଥରାଜ ପ୍ରୟାଗ । ଜାନୁଆରୀ ୧୩ ପୌଷ ପୂର୍ଣ୍ଣମୀରେ ପ୍ରଥମ ସ୍ନାନ ଯୋଗ ପାଖେଇ ଆସୁ ଥିବାରୁ ସ୍ବଳ୍ପ ସମୟ ଭିତରେ ବିରାଟ ଆୟୋଜନ ସାରିବାକୁ ଜୋରସରରେ ଚାଲିଛି ପ୍ରସ୍ତୁତି ।

ଅଧିକ ପଢ଼ନ୍ତୁ: କଂଗ୍ରେସକୁ ଟାର୍ଗେଟ୍ କଲେ ନରେନ୍ଦ୍ର ମୋଦୀ; କହିଲେ ପାପ ଧୋଇବାରେ ସକ୍ଷମ ହୋଇପାରିବନି କଂଗ୍ରେସ

ଏଥରର ଆହ୍ଲାବାଦ କୁମ୍ଭ ମେଳାକୁ ଭବ୍ୟ-ଦିବ୍ୟ ଓ ସୁରକ୍ଷିତ ସହ ଡିଜିଟାଲ୍ କରିବାକୁ ଯାଉଛନ୍ତି ଉତ୍ତର ପ୍ରଦେଶର ଯୋଗୀ ସରକାର । ସାଧୁସନ୍ଥ ଓ ଶ୍ରଦ୍ଧାଳୁଙ୍କ ପାଇଁ ସଂଗମ ତଟରେ ପ୍ରାୟ ୨୫ କିଲୋମିଟର ବ୍ୟାପି ଅଞ୍ଚଳରେ ହୋଇଛି ବ୍ୟବସ୍ଥା । ଆବଣ୍ଟନ ଚାଲିଛି ଟେଣ୍ଟ ସ୍ଥଳ। ୨୦୧୯ କୁମ୍ଭମେଳା ସମୟର ୩୫ଟି ସହ ଆଉ ୯ ନୂଆ ଘାଟକୁ ମିଶାଇ ଏଥର ହୋଇଛି ୪୪ଟି ସ୍ନାନ ଘାଟ । ଧିରେ ଧିରେ ସାଧୁ ସନ୍ଥଙ୍କର ସମାଗମ ମଧ୍ୟ ହେଲାଣି ସଂଗମ ସ୍ଥଳକୁ ତ ଗଙ୍ଗା ଆରତି ଓ ମନ୍ତ୍ରଧ୍ବନୀରେ ଗୁଜଂରିତ ହେଲାଣି ତ୍ରିବେଣୀ ଘାଟ ଅଞ୍ଚଳ ।

ପ୍ରୟାଗ ତୀର୍ଥରେ ଏଥର ହେବାକୁ ଥିବା ମହାକୁମ୍ଭ ମେଳା ଅବସରରରେ ରହିଛି ୬ଟି ସ୍ନାନ ଯୋଗ । ସେଗୁଡ଼ିକ ହେଲା ଜାନୁଆରୀ ୧୩ ପୌଷ ପୂର୍ଣ୍ଣମୀ, ଜାନୁଆରୀ ୧୪ ମକର ସଂକ୍ରାନ୍ତି ଜାନୁଆରୀ ୨୯ ମୌନି ଅମାବାସ୍ୟା, ଫେବ୍ରୁଆରୀ ୩ ବସନ୍ତ ପଞ୍ଚମୀ, ଫେବ୍ରୁଆରୀ ୧୨ ମାଘ ପୂର୍ଣ୍ଣମୀ ଓ ଫେବ୍ରୁଆରୀ ୨୬ ମହା ଶିବରାତ୍ରୀ । ସେଥିମଧ୍ୟରୁ ମକର ସଂକ୍ରାନ୍ତି, ମୌନି ଅମାବାସ୍ୟା ଓ ବସନ୍ତ ପଞ୍ଚମୀରେ ରହିଛି ସାହି ସ୍ନାନ ଯୋଗ । ବିଶ୍ବର ଏହି ବିଶାଳ ଧାର୍ମିକ ମେଳାରେ ୪୦ କୋଟି ଲୋକଙ୍କ ଆଗମନକୁ ଦେଖି ସ୍ବଚ୍ଛତା ପାଇଁ ଦେଢ଼ ଲକ୍ଷ ଟୟଲେଟ୍ ଓ ୨୫ ହଜାର ଡଷ୍ଟବିନ୍ ବସିବ । ଅନଲାଇନରେ ପଞ୍ଜିକରଣ କରି ଶ୍ରଦ୍ଧାଳୁ ରହଣୀ ସୁବିଧା ପାଇ ପାରିବେ ଓ ପ୍ରୟାଗରାଜ ଜଙ୍କସନ୍ ସହ ୧୦ଟି ଆଖାପାଖ ଷ୍ଟେସନକୁ ସମ୍ପୂର୍ଣ୍ଣ ଉନ୍ନତିକରଣ ହୋଇଛି । ମେଳାକୁ ଆସୁଥିବାର ଶ୍ରଦ୍ଧାଳୁଙ୍କୁ ଯେପରି ଟିକେ ବି ଅସୁବିଧା ନହୁଏ ସେଦିଗରେ ଉତ୍ତର ପ୍ରଦେଶ ସରକାର ଜୀ ଜାନ୍ ଲଗାଇଛନ୍ତି । ଗତକାଲି ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରୟାଗରାଜ ଗସ୍ତ କରି କୁମ୍ଭମେଳା ପାଇଁ ସାଢ଼େ ୫ ହଜାର କୋଟିର ବିଭିନ୍ନ ପ୍ରକଳ୍ପ ଲୋକର୍ପଣ କରିଛନ୍ତି ।

ଅଧିକ ପଢ଼ନ୍ତୁ: ୪୬ ବର୍ଷ ପରେ ଖୋଲିଲା ଶିବ ମନ୍ଦିର, ଜବରଦଖଲରେ ଥିଲା