LIVE TV
ପୁଣି ଥରେ କେରଳରୁ ଆସିଲା ସାଂଘାତିକ ଅଭିଯୋଗ । ପରୀକ୍ଷା ଦେବା ପୂର୍ବରୁ ଖୋଲିବାକୁ ପଡ଼ିଲା ଅନ୍ତବସ୍ତ୍ର । ପରୀକ୍ଷା ହଲ ଭିତରକୁ ପଶିବା ପୂର୍ବରୁ ଅନ୍ତବସ୍ତ୍ର ଖୋଲିବାକୁ ବାଧ୍ୟ । NEET ପରୀକ୍ଷା ଦେବାକୁ ଆସିଥିବା ଛାତ୍ରୀମାନଙ୍କୁ କୁହାଗଲା, ଅନ୍ତବସ୍ତ୍ର ଖୋଲ । କଥାଟା ଅଡ଼ୁଆ ଲାଗୁଥିବ, କିନ୍ତୁ ଏହା ସତ । ଖୋଦ ଜଣେ NEET ପରୀକ୍ଷାର୍ଥୀ ବା ଛାତ୍ରୀଙ୍କ ବାପା ଏଭଳି ଅଭିଯୋଗ ଆଣିଛନ୍ତି । ସେ କହିଛନ୍ତି NEET ପରୀକ୍ଷା ଦେବାକୁ ଆସିଥିବା ପ୍ରାୟ ୯୦ ପ୍ରତିଶତ ପରୀକ୍ଷାର୍ଥୀଙ୍କୁ ଏଭଳି ସମସ୍ୟାର ସମ୍ମୁଖୀନ ହେବାକୁ ପଡ଼ିଥିଲା । ତାଙ୍କ ଝିଅ ମଧ୍ୟ ଏଭଳି ସମସ୍ୟାର ସମ୍ମୁଖୀନ ହୋଇଥିବା ସେ କହିଥିଲେ ।
ଏନେଇ ସେ ଥାନାରେ ଅଭିଯୋଗ ମଧ୍ୟ କରିଛନ୍ତି । ଏହି ମାମଲା ଏବେ ମାନବାଧିକାର କମିଶନଙ୍କ ନିକଟରେ ମଧ୍ୟ ପହଞ୍ଚିସାରିଛି । କୋଲାମ ରୁରାଲ ଏସ୍ପିଙ୍କୁ ଘଟଣାର ପୁଙ୍ଖାନୁ ପୁଙ୍ଖ ତଦନ୍ତ କରି ଆସନ୍ତା ୧୫ ଦିନ ମଧ୍ୟରେ ରିପୋର୍ଟ ଦେବାକୁ ମାନବାଧିକାର କମିଶନଙ୍କ ପକ୍ଷରୁ କଡ଼ା ନିର୍ଦ୍ଦେଶ ରହିଛି ।
Also Read
ଛାତ୍ରୀଙ୍କ ବାପା କରିଥିବା ଅଭିଯୋଗ ଅନୁଯାୟୀ, ମେଟାଲ ଡିଟେକ୍ଟର ସାହାଯ୍ୟରେ ଅନ୍ତ୍ରବସ୍ତ୍ରରେ ଲାଗିଥିବା ହୁକ୍ ଜଣାପଡ଼ୁଥିଲା । ତାପରେ ତାକୁ କାଢ଼ିବା ପାଇଁ ପରୀକ୍ଷାର୍ଥୀଙ୍କୁ କୁହାଯାଉଥିଲା । ପରେ ଏକ ଷ୍ଟୋର ରୁମ୍ ଭିତରେ ରଖିବା ପାଇଁ କୁହାଯାଇଥିଲା । ଏହି ଭୟରେ କିଛି ଛାତ୍ରୀ ବା ପରୀକ୍ଷାର୍ଥୀ ନିଜ ଅନ୍ତବସ୍ତ୍ର ହୁକ୍ କାଢ଼ି ଦେଇଥିଲେ ଏବଂ ଗଣ୍ଠି ପକାଇ ଅନ୍ତବସ୍ତ୍ର ପିନ୍ଧିଥିଲେ । ଯାହାକି ପରୀକ୍ଷା ସମୟରେ ତାଙ୍କୁ ସମସ୍ୟାରେ ପକାଇଥିଲା । ଛାତ୍ରୀମାନେ ପରୀକ୍ଷା ଦେବା ସମୟରେ ନିଜକୁ ଅସହଜ ମନେ କରିଥିଲେ ଏବଂ ସେମାନଙ୍କର ମାନସିକ ସ୍ଥିତି ଠିକ୍ ରହିନଥିଲା । ତେଣୁ ଅନେକ ଛାତ୍ରୀ ପରୀକ୍ଷାକୁ ନେଇ ଏବେ ଚିନ୍ତାରେ ଅଛନ୍ତି ।
ଏଭଳି ଘଟଣା କେରଳର କୋଲାମ ଜିଲ୍ଲାରୁ ଆସିଛି । କୋଟ୍ଟାରାକାରା ପୋଲିସ ଷ୍ଟେସନ୍ରେ ଏନେଇ ଅଭିଯୋଗ ହୋଇଛି । ଚାଥମଙ୍ଗଲମ ପରୀକ୍ଷା ସେଣ୍ଟରରେ ଏଭଳି କାଣ୍ଡ ଘଟିଥିବା ଜଣେ ପରୀକ୍ଷାର୍ଥୀଙ୍କ ବାପା ଅଭିଯୋଗ କରିଛନ୍ତି । ଅଭିଯୋଗକାରୀ ଏହାମଧ୍ୟ କହିଛନ୍ତି ଯେ, ପରୀକ୍ଷାର୍ଥୀଙ୍କୁ ମାନସିକ ଭାବେ ନିର୍ଯାତନା ଦିଆଯାଇଥିଲା ।
ଜଣେ NEET ଷ୍ଟାଫ୍ ପରୀକ୍ଷାର୍ଥୀଙ୍କୁ କହିଥିଲେ ଯେ, ‘ତୁମ ପାଇଁ ଅନ୍ତବସ୍ତ୍ର ଜରୁରୀ ନା ନିଜ କ୍ୟାରିୟର ଜରୁରୀ’ ।
ପୋଲିସ ଅଭିଯୋଗକରୀଙ୍କ ସମସ୍ତ ବୟାନ ରେକର୍ଡ କରିଛି । ଆବଶ୍ୟକ ପଡ଼ିଲେ ପୁଣି ଥରେ ଡାକି ପଚରାଉଚରା କରିପାରେ । ତେବେ ସୂଚନାଯୋଗ୍ୟ ଯେ, ଏହି ପରୀକ୍ଷା କରାଉଥିବା ସଂସ୍ଥା NTA ପକ୍ଷରୁ, ଅନ୍ତବସ୍ତ୍ର ପିନ୍ଧି ପରୀକ୍ଷା ଦିଆଯାଇପାରିବ ନାହିଁ ବୋଲି କୌଣସି ନିୟମ କରାଯାଇ ନାହିଁ ।
