୧୩ ମହଲା ଟାୱାର ଉପରେ ଚଢ଼ିଗଲା ଅଜଗର, ତା’ପରେ...

୧୩ ମହଲା ଟାୱାର୍‌ ଉପରେ ଚଢ଼ିଗଲା ଅଜଗର । ସୁରକ୍ଷିତ ଭାବେ ଉଦ୍ଧା କଲେ ଉଦ୍ଧାରକାରୀ ଟିମ୍‌ । ଏକ ୪ ଫୁଟ ଲମ୍ବର ଅଜଗର ୧୩ ମହଲା ଟାୱାର ଉପରେ ଚଢ଼ିଯାଇଥିବା ଦେଖିବାକୁ ମିଳିଛି । ଏହାକୁ ସ୍ଥାନୀୟ ଲୋକ ଦେଖିବା ପରେ ସୁରକ୍ଷିତ ଭାବେ ସାପଟିକୁ ଉଦ୍ଧାର କରାଯାଇଛି ।

ସୂଚନା ଅନୁସାରେ ଏପରି ଏକ ଘଟଣା ମୁମ୍ବାଇରୁ ନଜରକୁ ଆସିଛି । ମୁମ୍ବାଇର ଘାଟକୋପରେ ରହିଥିବା ଏକ ୧୩ ମହଲା ଟାୱାରର ଉପରକୁ ଅଜଗରଟି ଚଢ଼ିଯାଇଥିଲା । କିପରି ଏତେ ଉପରକୁ ଅଜଗରଟି ଚଢ଼ିଲା ସେନେଇ ଜଣାପଡ଼ିନାହିଁ । ଏହି ଘଟଣାକୁ ନେଇ ସ୍ଥାନୀୟ ବାସିନ୍ଦା ଆଶ୍ଚର୍ଯ୍ୟ ହୋଇଯାଇଛନ୍ତି ।

ମୁମ୍ବାଇର ଏକ ଆଇଟି ଫାର୍ମରେ କାମ କରୁଥିବା ସୋରଜ ସାହା ଏନେଇ ଜାତୀୟ ଜଣମାଧ୍ୟମ ଆଗରେ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ଘାଟକୋପର ଏଲବିଏସ୍ ରୋଡରେ ଥିବା ଏକ ପାରାଡାଇଜ୍ ବିଲ୍ଡିଂରେ ଅଜଗରଟି ନଜର ଆସିଥିଲା । ଏହା ଦେଖିବା ପରେ ଆମେ ତୁରନ୍ତ ରାଜ୍ୟ ଜଙ୍ଗଲ ବିଭାଗକୁ ସୂଚନା ଦେଇଥିଲୁ ।

ପରେ ମୁମ୍ବାଇ ରେଞ୍ଜର ବନ ଅଧିକାରୀ ରାକେଶ ଭୋଇରଙ୍କ ଏକ ଟିମ୍ ଘଟଣାସ୍ଥଳରେ ପହଞ୍ଚିଥିଲେ । ସେମାନେ ସାପଟିକୁ ସରକ୍ଷିତ ଭାବେ ଉଦ୍ଧାର କରି ସୁରକ୍ଷିତ ସ୍ଥାନରେ ଛାଡ଼ି ଦେଇଥିଲେ ।

ଏହି ଘଟଣାକୁ ବନ୍ୟଜନ୍ତୁ ବିଶେଷଜ୍ଞମାନେ ପ୍ରତିକ୍ରିୟା ରଖିଛନ୍ତି । ସେମାନେ କହିଛନ୍ତି ଯେ, ପ୍ରବଳ ବର୍ଷା ସମୟରେ ଅଜଗର ଓ ଅନ୍ୟ ସାପଗୁଡ଼ିକଙ୍କ ବାସସ୍ଥଳୀ ଜଳବନ୍ଦି ହୋଇଯାଏ । ତେଣୁ ସେମାନେ ଉଚ୍ଚା ଜାଗା ଖୋଜିଥାନ୍ତି ।