ପରମବୀର ସିଂହଙ୍କୁ ଆଶ୍ୱସ୍ତି, ତାଙ୍କ ଦେହରେ ହାତ ମାରିପାରିବନି ମହାରାଷ୍ଟ୍ର ପୋଲିସ

ମୁମ୍ବାଇର ପୂର୍ବତନ ପୋଲିସ କମିଶନର ପରମବୀର ସିଂଙ୍କୁ ସାମୟିକ ଆଶ୍ୱସ୍ତି । ମାର୍ଚ୍ଚ ୯ ଯାଏଁ ତାଙ୍କ ବିରୋଧରେ କୌଣସି ପ୍ରକାର ପୋଲିସ କାର୍ଯ୍ୟାନୁଷ୍ଠାନ ଉପରେ ରୋକ୍ ଲଗାଇଛନ୍ତି ସୁପ୍ରିମକୋର୍ଟ । ପରମବୀର ସିଂ ବନାମ ମହାରାଷ୍ଟ୍ର ସରକାର ଲଢ଼େଇରେ ସୁପ୍ରିମକୋର୍ଟ କହିଛନ୍ତି ଯେ, ପରମବୀର ସିଂଙ୍କ ବିରୋଧରେ ଥିବା ସମସ୍ତ ମାମଲାର ତଦନ୍ତ ଭାର ସିବିଆଇ ହାତକୁ ଯିବ କି ନାହିଁ, ସେନେଇ ଆସନ୍ତା ୯ ତାରିଖରେ ଅନ୍ତିମ ଶୁଣାଣି କରିବେ । ସେପର୍ଯ୍ୟନ୍ତ ମହାରାଷ୍ଟ୍ର ସରକାର ଏହି ମାମଲାର ସମସ୍ତ ତଦନ୍ତ ପ୍ରକ୍ରିୟାକୁ ସ୍ଥଗିତ ରଖନ୍ତୁ ।

ତେବେ ପରମବୀର ସିଂଙ୍କ ବିରୋଧରେ ସବୁ ମାମଲାର ତଦନ୍ତ ଭାର କେନ୍ଦ୍ରୀୟ ଏଜେନ୍ସି ହାତକୁ ଯିବା ଉଚିତ ନୁହେଁ ବୋଲି ମହାରାଷ୍ଟ୍ର ସରକାରଙ୍କ ପକ୍ଷରୁ ଯୁକ୍ତି ଦର୍ଶାଯାଇଥିଲା । ଏହି ମାମଲାର ଶୁଣାଣି ବେଳେ ଉଭୟ ମହାରାଷ୍ଟ୍ର ସରକାର ଓ ପରମବୀର ସିଂଙ୍କୁ କଟାକ୍ଷ କରିଛନ୍ତି ସୁପ୍ରିମକୋର୍ଟ । ସର୍ବୋଚ୍ଚ ଅଦାଲତ କହିଛନ୍ତି, ଆମେ ପୁଣି କହିବାକୁ ଚାହୁଁଛୁ ଯେ, ଏହା ଏକ ଗଡ଼ବଡ଼ ସ୍ଥିତି । ଏଥିରେ କେହି ବି ଦୁଧ୍ କା ଧୁଲା ନୁହଁନ୍ତି । ଏଥିରେ ରାଜ୍ୟ ସରକାର ଓ ପୋଲିସ ବ୍ୟବସ୍ଥା ଉପରୁ ଲୋକଙ୍କ ବିଶ୍ୱାସ ତୁଟିଯାଇ ପାରେ । ଏହା ସବୁଠୁ ଦୁର୍ଭାଗ୍ୟପୂର୍ଣ୍ଣ । କିନ୍ତୁ ଆଇନର ସଠିକ୍ ପ୍ରକ୍ରିୟା ଜାରି ରହିବା ଦରକାର ।