Bridge Collapse: ଲଗାଣ ବର୍ଷାରେ ଭାଙ୍ଗିଲା ପୋଲ, ଭୂସ୍ଖଳନ ଯୋଗୁଁ ରାସ୍ତା ବନ୍ଦ

ଜମ୍ମୁ-କାଶ୍ମୀରରେ ବର୍ଷା ବିତ୍ପାତରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ରାତି ସାରା ବର୍ଷା ହେବା ପରେ ଅନେକ ଅଞ୍ଚଳରେ ପାଣି ଜମିବା ସହ ଅନେକ ଧନଜୀବନ ପ୍ରଭାବିତ ହୋଇଛି। ପ୍ରବଳ ବର୍ଷା ଯୋଗୁଁ ନଦୀକୁ ମାଡ଼ି ଭୟଙ୍କର ବନ୍ୟାଜଳ ଆସିବା ଫଳରେ ପୋଲ ମଧ୍ୟ ଭାଙ୍ଗି ଯାଇଛି। ଭାଙ୍ଗି ଯାଇଛି ଜମ୍ମୁ-କାଶ୍ମୀର କଠୁଆର ସହାରଖାଦ ନଦୀ ଉପରେ ଥିବା ପୋଲ। ଜମ୍ମୁ-ପଠାନକୋଟ ରାଜପଥକୁ ସଂଯୋଗ କରୁଥିଲା ଏହି ବ୍ରିଜ୍।

ଲୋଗେଟ ମୋର୍ହ ନିକଟରେ ଥିବା ରାଜପଥରେ ଏକ ସେତୁ ମଝିରେ ଭାଙ୍ଗି ପଡ଼ିଛି। ପ୍ରବଳ ସ୍ରୋତ ଯୋଗୁଁ ଜାତୀୟ ରାଜପଥରେ ସାହାର ଖାଦ ଉପରେ ଥିବା ଉଭୟ ସେତୁରେ ଯାତାୟାତ ବନ୍ଦ କରାଯାଇଛି। ପ୍ରାଧିକରଣ ଗାଡ଼ିମୋଟରକୁ ଏକ ବିକଳ୍ପ ପଥ ଦେଇ ଡାଇଭର୍ଟ କରିଛନ୍ତି। ଡେପୁଟି କମିଶନର କଠୁଆ ରାଜେଶ ଶର୍ମା କହିଛନ୍ତି ଯେ ଗୋଟିଏ ପୋଲରେ ବଡ଼ କ୍ଷତି ହୋଇଛି ଏବଂ ଅନ୍ୟଟିରେ ମଧ୍ୟ ଦୁର୍ବଳ ଅଛି।

ଜମ୍ମୁରେ ଗତ ୨୪ ଘଣ୍ଟାରେ ସକାଳ ୮:୩୦ ପର୍ଯ୍ୟନ୍ତ ୧୯୦.୪ ମିମି ବର୍ଷା ରେକର୍ଡ କରାଯାଇଛି। ଯାହା ଗତ ୧୦୦ ବର୍ଷ ମଧ୍ୟରେ ଅଗଷ୍ଟ ମାସରେ ଦ୍ୱିତୀୟ ସର୍ବାଧିକ ବର୍ଷା ରେକର୍ଡ ହୋଇଛି।, ଅଗଷ୍ଟ ୫, ୧୯୨୬ରେ ସର୍ବାଧିକ ବର୍ଷା ୨୨୮.୬ ମିମି ରେକର୍ଡ ହୋଇଥିଲା। ଏହା ପରେ ଅଗଷ୍ଟ ୧୧, ୨୦୨୨ରେ ଦ୍ୱିତୀୟ ସର୍ବାଧିକ ୧୮୯.୬ ମିମି ରେକର୍ଡ ହୋଇଥିଲା।

ବର୍ଷା ଏତେ ପରିମାଣର ହୋଇଥିଲା ଯେ, ଜମ୍ମୁର ଅନେକ ସହରାଞ୍ଚଳ ଯେପରିକି ଜାନିପୁର, ରୁପ ନଗର, ତଲାବ ତିଲୁ, ଜେବେଲ ଛକ, ନିଉ ପ୍ଲଟ ଏବଂ ସଞ୍ଜୟ ନଗରରେ ଅନେକ ଘରେ ମଧ୍ୟ ପାଣି ପଶି ଯାଇଛି। ଘରର କାନ୍ଥ ଭୁଶୁଡି ପଡିଥିବାର ଦେଖା ଯାଇଛି।

ଭାରୀ ବର୍ଷା ସତ୍ତ୍ୱେ, ୨୫୦ କି.ମି. ଜମ୍ମୁ-ଶ୍ରୀନଗର ଜାତୀୟ ରାଜପଥ ଏବଂ ୪୩୪ କି.ମି. ଶ୍ରୀନଗର-ଲେହ ରାଜପଥ ଯାତାୟାତ ପାଇଁ ଖୋଲା ରହିଛି। ତଥାପି, ପାହାଡ଼ ଧସିବା କାରଣରୁ ପୁଞ୍ଚ ଓ ରାଜୌରୀକୁ ଶୋପିଆନ ସହ ସଂଯୋଗ କରୁଥିବା ମୁଘଲ ରୋଡ ଏବଂ କିଷ୍ଟୱାର ଓ ଡୋଡାକୁ ଅନନ୍ତନାଗ ସହ ସଂଯୋଗ କରୁଥିବା ସିନଥାନ ରୋଡ ବନ୍ଦ ହୋଇଯାଇଥିଲା।

କାଠୁଆରେ, ଉଝ ଓ ରବି ନଦୀର ଜଳସ୍ତର ବିପଜ୍ଜନକ ଭାବେ ବୃଦ୍ଧି ପାଇଥିଲା, ସେହିପରି ସମ୍ବାରେ ବସନ୍ତର, ଡୋଡା, କିସ୍ତୱାର, ରମ୍ବାନ ଓ ଜମ୍ମୁରେ ଚେନାବ, ଏବଂ ଉଧମପୁର ଓ ଜମ୍ମୁରେ ତାବି ନଦୀ ସମେତ ଅନ୍ୟାନ୍ୟ ପ୍ରମୁଖ ନଦୀ ଓ ନାଳରେ ଜଳସ୍ତର ତୀବ୍ର ଭାବେ ବୃଦ୍ଧି ପାଇଥିଲା। ବିପର୍ଯ୍ୟୟ ମୁକାବିଲା ଟିମ୍ ଓ ପୁଲିସକୁ ସତର୍କ ରହିବାକୁ ନିର୍ଦ୍ଦେଶ ଦିଆଯାଇଥିଲା।

ଅଧିକ ପଢନ୍ତୁ: ମାଡ଼ି ଆସୁଛି ବଡ଼ ବର୍ଷା, ୨୭ ଯାଏ ପ୍ରବଳ ବର୍ଷିବ