Health Ministry : ବଧିର କରୁଛି ଇଅରଫୋନ୍ ଏବଂ ହେଡଫୋନ୍, ଗାଇଡ୍ ଲାଇନ୍ ଜାରିକଲା ସ୍ୱାସ୍ଥ୍ୟ ମନ୍ତ୍ରଣାଳୟ

ଗ୍ରୀନ୍ ଲାଇଟ୍ ପରେ ଏବେ ଇଅର୍ ଫୋନ୍ ଏବଂ ହେଡ୍ ଫୋନ୍ ଚିନ୍ତା । ମୋବାଇଲ୍, ଲାପଟପ୍ ଆଖି ଉପରେ କୁପ୍ରଭାବ ପକାଉ ଥିବାବେଳେ ଏବେ କାନ ପାଇଁ ମୁଣ୍ଡବିନ୍ଧାର କାରଣ ପାଲଟିଛି ହେଡଫୋନ୍ ଏବଂ ଇଅରଫୋନ୍ । ଏହି ଦୁଇ ଯାନ୍ତ୍ରିକ ଉପକରଣ କାରଣରୁ ଅଧିକାଂଶ ଯୁବପିଢି ଏବେ ଶୃତିବାଧିତ ସମସ୍ୟାର ସମ୍ମୁଖୀନ ହେଉଛନ୍ତି । ଏଣୁ ସଚେତନତା ପାଇଁ ଗାଇଡ୍ ଲାଇନ୍ ଜାରି କରିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ।

ଯୁବପିଢି କିପରି ଦୀର୍ଘ ସମୟ ହେଡଫୋନ୍ ଏବଂ ଇଅରଫୋନ୍ ବ୍ୟବହାରରୁ ବର୍ତ୍ତିବେ ସେଥିପାଇଁ ମନ୍ତ୍ରଣାଳୟ ସମସ୍ତ ରାଜ୍ୟଗୁଡ଼ିକୁ ନିର୍ଦ୍ଦେଶନାମା ଜାରି କରିଛି । ଡିରେକ୍ଟର ଜେନେରାଲ୍ ଅଫ୍ ହେଲଥ ସର୍ଭିସ୍ ବା ସ୍ୱାସ୍ଥ୍ୟ ସେବା ନିର୍ଦ୍ଦେଶକ ପ୍ରଫେସର ଡକ୍ଟର ଅତୁଲ ଗୋଏଲ ଏକ ଚିଠି ଯୋଗେ ଏହି ନିର୍ଦ୍ଦେଶନାମା ଜାରି କରିଛନ୍ତି ।

ଗୋଏଲ ଉଲ୍ଲେଖ କରିଛନ୍ତି ଯେ ହୋଡଫୋନର ଭଲ୍ୟୁମ୍ ୫୦ ଡେସିବଲରୁ ଅଧିକ ହେବା ଉଚିତ୍ ନୁହେଁ । ଏପରିକି ଶୁଣିବାର ସମୟ ମଧ୍ୟ କିପରି ୨ ଘଣ୍ଟାରୁ ଅଧିକ ହେବ ନାହିଁ, ସେଥିପ୍ରତି ଧ୍ୟାନ ଦିଆଯିବ। କମ୍ ଭଲ୍ୟୁମର ଅଡିଓ କିମ୍ବା ପ୍ରଦୂଷଣ ମୁକ୍ତ ହେଡଫୋନ୍ ବ୍ୟବହାର କରିବାକୁ ପରାମର୍ଶ ଦେଇଛନ୍ତି ।

ଅଧିକ ପଢ଼ନ୍ତୁ: ମାର୍ଚ୍ଚ ପହିଲାରୁ ହୋଇଛି ଏହି ସବୁ ପରିବର୍ତ୍ତନ, ପକେଟ୍ ଉପରେ ଏମିତି ପକାଇବ ପ୍ରଭାବ

ସେହିପରି ପିଲାମାନେ ଅଧିକ ଅନଲାଇନ ଗେମିଂରେ ସମୟ ବିତାଉଥିବାରୁ ଏଥିପ୍ରତି ସତର୍କତା ଜାରି କରିବାକୁ ରାଜ୍ୟଗୁଡ଼ିକୁ ନିର୍ଦ୍ଦେଶ ଦେଇଛନ୍ତି । ଅନଲାଇନ ଗେମିଂରେ ବ୍ୟବହାର ହେଉଥିବା ଉଚ୍ଚ ଶବ୍ଦ ଏବଂ ପିଲାମାନଙ୍କର ସୋଶାଲ ମିଡିଆ ବ୍ୟବହାର ସମୟ ହ୍ରାସ କରିବାକୁ ସଚେତନତା ସୃଷ୍ଟି କରିବା ପାଇଁ ରାଜ୍ୟମାନଙ୍କୁ ପରାମର୍ଶ ଦେଇଛନ୍ତି ଗୋଏଲ ।

ଏହା ବ୍ୟତୀତ ଶବ୍ଦ ପ୍ରଦୂଷଣକୁ ଏଡ଼ାଇବା ସହ ପ୍ରତିଟି ସ୍ଥାନରେ ଆଭେରଜ୍ ସାଉଣ୍ଡ ଯେପରି ୧୦୦ ଡେସିବଲ ମଧ୍ୟରେ ରହେ ଏବଂ ଲୋକମାନେ ଯେପରି ଶାନ୍ତ ପରିବେଶରେ ରହିବେ, ସେଥିପ୍ରତି ସତର୍କତା ଅବଲମ୍ବନ କରିବାକୁ କହିଛନ୍ତି ଗୋଏଲ । ପିଲାମାନଙ୍କ ସ୍କ୍ରିନ୍ ସମୟ ସୀମିତ ଉପରେ ମଧ୍ୟ ମନ୍ତ୍ରଣାଳୟ ଗୁରୁତ୍ୱାରୋପ କରିଛି ।

ଆଖିର ସୁସ୍ଥତା ପାଇଁ ଯେପରି ପିଲାମାନେ ଗ୍ରୀନ୍ ଲାଇଟରେ କମ୍ ସମୟ ବିତାଇବେ, ସେଥିପ୍ରତି ସଚେତନତା ସୃଷ୍ଟି କରିବାକୁ ପରାମର୍ଶ ଦିଆଯାଇଛି । କାରଣ ଏସବୁ ଟେକ୍ନୋଲୋଜିର ବହୁଳ ବ୍ୟବହାର ଫଳରେ ପିଲାମାନଙ୍କର ଶାରୀରିକ ଓ ବୌଧିକ ବିକାଶ ପ୍ରଭାବିତ ହେଉଛି ।

ଅପରପକ୍ଷେ ପିଲାମାନେ ମଧ୍ୟ ଅତ୍ୟଧିକ ମୋବାଇଲ୍ ଓ ଇଅର୍ ଫୋନ୍ ବ୍ୟବହାର ଫଳରେ କୁପ୍ରଭାବକୁ ଅନୁଭବ କରିପାରୁଛନ୍ତି । ମାତ୍ର ଏଥିରୁ ନିଜକୁ ଦୂରେଇ ରଖିପାରୁ ନାହାନ୍ତି । ଏହାର ମୁଖ୍ୟ କାରଣ ହେଉଛି ପିଲାଟି ଦିନରୁ ଏସବୁ କୁଅଭ୍ୟାସକୁ ଅଭ୍ୟାସରେ ପରିଣତ କରିଦେବା । ଏନେଇ ମାଆମାନଙ୍କୁ ପଚାରିଲେ ମାଆମାନେ କହୁଛନ୍ତି, ପିଲାମାନେ ଏବେ ସହରରେ ଏକୁଟିଆ ରହୁଛନ୍ତି । ପୂର୍ବ ପରି ଯୌଥ ପରିବାର ନାହିଁ । ତେଣୁ ଆମେ ନ ଚାହିଁଲେ ବି ମୋବାଇଲ ଧରାଇ ଅନ୍ୟ କାମ କରିବାକୁ ବାଧ୍ୟ ହେଉଛୁ ।

ଅଧିକ ପଢ଼ନ୍ତୁ: ଅବସର ନେଇଥିବା ବ୍ୟକ୍ତିଙ୍କ ପାଇଁ ଜରୁରୀ ସୂଚନା, ବଦଳିବ ପେନସନ ଢାଞ୍ଚା