କାର୍ଗିଲ ଯୁଦ୍ଧ: ୨୫ ବର୍ଷ ପରେ ସତ ମାନିଲା ପାକିସ୍ତାନ, ନିଜ ଦେଶ ସୈନିକଙ୍କ ମୃତ୍ୟୁର କଲା ସ୍ବୀକାର

୨୫ ବର୍ଷ ପରେ ସତ ମାନିଲା ପାକିସ୍ତାନ । ୧୯୯୯ କାର୍ଗିଲ ଯୁଦ୍ଧରେ ନିଜ ଦେଶର ସୈନିକ ନିହତ ହୋଇଥିଲେ । ପ୍ରଥମ ଥର ଏକଥା କବୁଲ କରିଛି ପାକିସ୍ତାନ । କାର୍ଗିଲ ଯୁଦ୍ଧରେ ଭୂମିକା ଓ ସୈନିକଙ୍କ ମୃତ୍ୟୁ କଥାକୁ ମାନିଛି ପାକିସ୍ତାନ । ପାକିସ୍ତାନ ସେନା ମୁଖ୍ୟ ଜେନେରାଲ୍ ଅସୀମ ମୁନିର ପ୍ରତିରକ୍ଷା ଦିବସ ପାଳନ ଅବସରରେ କାର୍ଗିଲ ଯୁଦ୍ଧରେ ସୈନିକଙ୍କ ମୃତ୍ୟୁ ହୋଇଥିବା ମାନିଛନ୍ତି ।

ସେ କହିଥିଲେ, ଭାରତ ବିପକ୍ଷ କାର୍ଗିଲ ଯୁଦ୍ଧରେ ପାକିସ୍ତାନର ବହୁ ସୈନ୍ୟ ନିହତ ହୋଇଥିଲେ । କେବଳ କାର୍ଗିଲ ନୁହେଁ ୧୯୪୮, ୧୯୬୫ ଓ ୧୯୭୧ ଯୁଦ୍ଧରେ ବି ପାକିସ୍ତାନର ହଜାର ହଜାର ସୈନ୍ୟ ଦେଶ ପାଇଁ ବଳିଦାନ ଦେଇଛନ୍ତି । ସେମାନଙ୍କୁ ସମ୍ମାନ ଦେବା ଅବସରରେ ଏକଥା କହିଥିଲେ ପାକିସ୍ତାନ ସେନା ମୁଖ୍ୟ । ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି ।

ପୂର୍ବରୁ ଇସଲାମାବାଦ କାର୍ଗିଲ ଯୁଦ୍ଧରେ ପ୍ରତ୍ୟକ୍ଷ ଭୂମିକାକୁ କେବେ ବି ମାନି ନଥିଲା । ଅନୁପ୍ରବେଶକାରୀଙ୍କୁ କାଶ୍ମୀର ସ୍ୱାଧୀନତା ସଂଗ୍ରାମୀ କିମ୍ବା ମୁଜାହିଦ୍ଦିନ ବୋଲି କହି ଆସୁଥିଲା । ଏବେ ସାର୍ବଜନୀକ ଭାବରେ ସତ ମାନିଛି ପାକିସ୍ତାନ । କାର୍ଗିଲ ଯୁଦ୍ଧରେ ପାକିସ୍ତାନକୁ ମୁହଁତୋଡ ଜବାବ ଦେଇଥିଲା ଭାରତୀୟ ସେନା । ତିନି ମାସର ଲମ୍ବା ଲଢ଼େଇ ପରେ ଟାଇଗର ହିଲ ସମେତ କାର୍ଗିଲ ସେକ୍ଟରରେ ଏଲଓସିରେ ଅନୁପ୍ରବେଶକାରୀ କବଜା କରିଥିବା ସ୍ଥାନକୁ ନିଜ ଦଖଲକୁ ଆଣିଥିଲା ଭାରତ ।