Pilots Apply for Sick Leave : ଡରାଉଛି ଏୟାର ଇଣ୍ଡିଆ ଦୁର୍ଘଟଣା, ଛୁଟିରେ ୧୧୨ ପାଇଲଟ୍

ଦୁର୍ଘଟଣା ପରେ ଏୟାର ଇଣ୍ଡିଆରେ ଟେନସନ୍। ଏୟାର ଇଣ୍ଡିଆର ଅନେକ ପାଇଲଟଙ୍କ ମାନସିକ ଅବସ୍ଥା ଭଲ ନାହିଁ। ୧୧୨ ଜଣ ପାଇଲଟ୍ ସିକ୍ ଲିଭ୍ ଆବେଦନ କରିଥିଲେ। ଏହାର ମୁଖ୍ୟ କାରଣ ହେଉଛି ଗତ ଜୁନ୍ ୧୨ ତାରିଖରେ ଅହମଦାବାଦରେ ଘଟିଥିବା ଏୟାର ଇଣ୍ଡିଆ ଫ୍ଲାଇଟ୍ AI-171ର ଭୟଙ୍କର ବିମାନ ଦୁର୍ଘଟଣା । ସେଥିରେ ୨୬୦ ଜଣ ଲୋକଙ୍କର ମୃତ୍ୟୁ ଘଟିଥିଲା। ଏହି ଦୁର୍ଘଟଣାର ୪ ଦିନ ପରେ ୧୧୨ ଜଣ ପାଇଲଟ୍ ସିକ୍ ଲିଭ୍ ପାଇଁ ଆବେଦନ କରିଥିଲେ। ଏହା ଏୟାର ଇଣ୍ଡିଆର ସମସ୍ତ ଫ୍ଲିଟ୍‌ରେ ସିକ୍ ଲିଭ୍‌ରେ ଏକ "ସାମାନ୍ୟ ବୃଦ୍ଧି" ବୋଲି ସରକାରଙ୍କ ପକ୍ଷରୁ କୁହାଯାଇଛି।

ଅହମଦାବାଦ ଘଟଣା ପରେ ଏୟାର ଇଣ୍ଡିଆର ପାଇଲଟ୍‌ମାନଙ୍କ ମଧ୍ୟରେ ମାନସିକ ଚାପ ସୃଷ୍ଟି ହୋଇଥିଲା। କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁ ଏବଂ ରାଷ୍ଟ୍ରମନ୍ତ୍ରୀ ମୁରଲୀଧର ମୋହଲ ଲୋକସଭାରେ କହିଛନ୍ତି ଯେ ଏହି ଦୁର୍ଘଟଣା ପରେ ପାଇଲଟ୍‌ମାନେ ମାନସିକ ସ୍ୱାସ୍ଥ୍ୟ ସମସ୍ୟାର ସମ୍ମୁଖୀନ ହୋଇଥିଲେ। ସେଇଥିପାଇଁ ସିକ୍ ଲିଭ୍ ଆବେଦନ କରିଥିଲେ। ପ୍ରାଥମିକ ତଦନ୍ତ ରିପୋର୍ଟ ଅନୁସାର ବିମାନର ଇନ୍ଧନ ନିୟନ୍ତ୍ରଣ ସ୍ୱିଚ୍ ଟେକ୍‌ଅଫ୍ ପରେ କିଛି ସେକେଣ୍ଡ ମଧ୍ୟରେ କଟ୍‌ଅଫ୍ ସ୍ଥିତିକୁ ଚାଲିଯାଇଥିଲା। ଯାହା ଦ୍ୱାରା ଇଞ୍ଜିନ୍‌ଗୁଡ଼ିକ ବନ୍ଦ ହୋଇଯାଇଥିଲା। କକ୍‌ପିଟ୍ ଭଏସ୍ ରେକର୍ଡରରେ ଜଣେ ପାଇଲଟ୍ ଅନ୍ୟ ଜଣଙ୍କୁ ପଚାରୁଛନ୍ତି, “ତୁମେ ଇନ୍ଧନ କାହିଁକି ବନ୍ଦ କଲ?” ଏବଂ ଅନ୍ୟ ଜଣେ ଉତ୍ତର ଦେଉଛନ୍ତି, “ମୁଁ ତାହା କରିନାହିଁ।” ଏହି ଅସ୍ପଷ୍ଟତା ଏବଂ ପାଇଲଟ୍‌ଙ୍କ ଉପରେ ମନୁଷ୍ୟକୃତ ଭୁଲ ବା ଇଚ୍ଛାକୃତ କାର୍ଯ୍ୟର ଅନୁମାନ ପାଇଲଟଙ୍କ ମଧ୍ୟରେ ଭୟ ଏବଂ ଅନିଶ୍ଚିତତା ସୃଷ୍ଟି କରିଥିଲା। ଏହା ମଧ୍ୟ ସେମାନଙ୍କୁ ମାନସିକ ଚାପରେ ପକାଇଥାଇପାରେ।

ଭାରତୀୟ ବିମାନ ଚଳାଚଳ ଶିଳ୍ପରେ ପାଇଲଟ୍‌ଙ୍କ ମାନସିକ ସ୍ୱାସ୍ଥ୍ୟ ପାଇଁ ପର୍ଯ୍ୟାପ୍ତ ବ୍ୟବସ୍ଥାର ଅଭାବ ରହିଛି। ବିମାନ ଚଳାଚଳ ବିଶେଷଜ୍ଞଙ୍କ ମତରେ ଭାରତୀୟ ଏୟାରଲାଇନ୍‌ଗୁଡ଼ିକ ପାଇଲଟ୍‌ଙ୍କ ମାନସିକ ସ୍ୱାସ୍ଥ୍ୟର ନିୟମିତ ମୂଲ୍ୟାଙ୍କନ କରନ୍ତି ନାହିଁ। ପାଇଲଟ୍‌ମାନେ ଯଦି ମାନସିକ ସ୍ୱାସ୍ଥ୍ୟ ସମସ୍ୟା ରିପୋର୍ଟ କରନ୍ତି, ତେବେ ସେମାନଙ୍କୁ ଗ୍ରାଉଣ୍ଡେଡ୍ କରାଯାଇପାରେ, ଯାହା ସେମାନଙ୍କ ଜୀବିକାକୁ ପ୍ରଭାବିତ କରେ। ଏହା ପାଇଲଟ୍‌ମାନଙ୍କୁ ସମସ୍ୟା ରିପୋର୍ଟ କରିବାରୁ ନିବୃତ୍ତ କରେ ଏବଂ ଏହି ଦୁର୍ଘଟଣା ପରେ ସେମାନେ ସିକ୍ ଲିଭ୍ ନେଇ ମାନସିକ ଚାପରୁ ମୁକ୍ତି ପାଇବାକୁ ଚେଷ୍ଟା କରିଥାଇପାରନ୍ତି।

ଡାଇରେକ୍ଟୋରେଟ୍ ଜେନେରାଲ ଅଫ୍ ସିଭିଲ ଏଭିଏସନ୍ (DGCA) ୨୦୨୩ ଫେବୃଆରୀରେ ଏକ ସର୍କୁଲାର ଜାରି କରି ଏୟାରଲାଇନ୍‌ଗୁଡ଼ିକୁ ପାଇଲଟ୍‌ଙ୍କ ମାନସିକ ସ୍ୱାସ୍ଥ୍ୟ ମୂଲ୍ୟାଙ୍କନ ଏବଂ ପିୟର ସପୋର୍ଟ ପ୍ରୋଗ୍ରାମ (PSP) କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଥିଲା। ଏହି ଦୁର୍ଘଟଣା ପରେ DGCA ଏୟାର ଇଣ୍ଡିଆକୁ କ୍ରୁ ଥକ୍କାପଣ ନିୟନ୍ତ୍ରଣ ଏବଂ ତାଲିମ ସମ୍ବନ୍ଧୀୟ ସୁରକ୍ଷା ମାନଦଣ୍ଡ ଉଲ୍ଲଙ୍ଘନ ପାଇଁ ସକର୍କତା ଜାରି କରିଛି।

(ବ୍ୟୁରୋ ରିପୋର୍ଟ, ଓଟିଭି)