ମୋଦିଙ୍କ ବିରୋଧରେ ମନ୍ତବ୍ୟ ପାଇଁ ମାଲଡିଭ୍ସ ହାଇକମିଶନରଙ୍କୁ ସମନ

ଲାକ୍ଷାଦ୍ୱୀପକୁ ନେଇ ଜୋର ଧରିଲା ମାଲଡିଭ୍ସ ଝଡ଼ । ବିବାଦ ମଧ୍ୟରେ ମାଲଡିଭ୍ସ ହାଇକମିଶନରଙ୍କୁ ସମନ କଲା ବୈଦେଶିକ ମନ୍ତ୍ରଣାଳୟ । ଏହାପରେ ମାଲଡିଭସ୍ ହାଇକମିଶନର ବୈଦେଶିକ ମନ୍ତ୍ରଣାଳୟରେ ହାଜର ହୋଇଥିଲେ ।

ମୋଦିଙ୍କ ବିରୋଧରେ ମାଲଡିଭ୍ସର ୩ ମନ୍ତ୍ରୀ ମନ୍ତବ୍ୟ ଦେବା ପ୍ରସଙ୍ଗରେ ସମନ ହୋଇଥିବା ସୂଚନା ମିଳିଛି । ପ୍ରଧାନମନ୍ତ୍ରୀ ମୋଦିଙ୍କୁ ଅପମାନ ସୂଚକ ମନ୍ତବ୍ୟ ଦେଇ ସସପେଣ୍ଡ ହୋଇଛନ୍ତି ମାଲଡିଭସର ୩ ମନ୍ତ୍ରୀ । ସେପଟେ ସୋସିଆଲ ମିଡିଆରେ ଟ୍ରେଣ୍ଡ ହେଉଛି ବୟକଟ୍ ମାଲଡିଭ୍ସ । ଏହାରି ଭିତରେ ଭାରତରୁ ମାଲଡିଭ୍ସ ପାଇଁ ହୋଇଥିବା ଫ୍ଲାଇଟ୍ ବୁକିଂକୁ ରଦ୍ଦ କରିଛି ଇଜ୍ ମାଇ ଟ୍ରିପ୍ ।

ଏହା ସହ ସମସ୍ତ ବୁକିଂ ବନ୍ଦ କରିଦେଇଛି । ଫଳରେ ମାଲଡିଭ୍ସରେ ସମସ୍ତ ହୋଟେଲ ବୁକିଂ ମଧ୍ୟ ରଦ୍ଦ ହୋଇଯାଇଛି । ପ୍ରତିବର୍ଷ ଭାରତରୁ ଲକ୍ଷାଧିକ ପର୍ଯ୍ୟଟକ ମାଲଡିଭ୍ସ ଯାଆନ୍ତି । ମାଲଡିଭ୍ସ ଯାଉଥିବା ଟୁରିଷ୍ଟ ତାଲିକାରେ ସବୁଠୁ ଅଧିକ ଅଛନ୍ତି ଭାରତୀୟ । ଭାରତରୁ ୨ ଲକ୍ଷରୁ ଅଧିକ ପର୍ଯ୍ୟଟକ ମାଲଡିଭସ୍ ଯାଉଥିବା ବେଳେ ଏହା ପଛକୁ ରୁଷ ଓ ଚୀନ ରହିଛନ୍ତି ।

ଭାରତୀୟ ଯଦି ମାଲଡିଭ୍ସକୁ ବୟକଟ କରନ୍ତି ତେବେ ପର୍ଯ୍ୟଟନ ଉପରେ ନିର୍ଭର କରୁଥିବା ଏହି ଦେଶର ଆର୍ଥିକ ସ୍ଥିତି ଉପରେ ଗଭୀର ପ୍ରଭାବ ପଡ଼ିବ । ସେପଟେ ଭାରତର ଏଭଳି ପଦକ୍ଷେପ ପରେ ଆଜି ଚୀନ ଗସ୍ତ କରିଛନ୍ତି ମାଲଡିଭ୍ସ ରାଷ୍ଟ୍ରପତି । ତେଣୁ ଆଗକୁ ଭାରତ ଓ ମାଲଡିଭ୍ସ ମଧ୍ୟ କୁଟନୈତିକ ସ୍ତରରେ ମଧ୍ୟ ପ୍ରଭାବ ପଡ଼ିବ ବୋଲି ଆଶଙ୍କା କରାଯାଉଛି ।