LIVE TV
ସୌଭାଗ୍ୟବଶତଃ ଅଳ୍ପକେ ବର୍ତ୍ତିଗଲେ ସିନା, ହେଲେ କଟିଗଲା ହାତ। ଟ୍ରେନ୍ ଆଗକୁ ଡେଇଁ ଆତ୍ମହତ୍ୟା ଉଦ୍ୟମ କରି ଜଣେ ଯୁବକଙ୍କ ଡାହାଣ ହାତ କଟି ଯାଇଛି। ବଲାଙ୍ଗିର-ସମ୍ୱଲପୁର ରେଲୱେ ଲାଇନର ବୁର୍ଡା ଫାଟକ ନିକଟରେ ଏଭଳି ଅଭାବନୀୟ ଘଟଣା ଘଟିଛି। ଆହତ ଯୁବକ ହେଲେ ସୋନପୁର ଜିଲ୍ଲା କୁଡାଡେରା ଗାଁର ଚନ୍ଦ୍ରଭାନୁ ଭୋଇ। ସେ ତାମିଲନାଡୁରେ ଦାଦନ ଶ୍ରମିକ ଭାବେ କାମ କରୁଥିଲେ।
ସୂଚନା ଅନୁସାରେ, ଗତକାଲି ରାତିରେ ଚନ୍ଦ୍ରଭାନୁ ତାମିଲନାଡୁରୁ ଫେରି ବଲାଙ୍ଗିର ରେଲୱେ ଷ୍ଟେସନରେ ପହଞ୍ଚିଥିଲେ। ଏହାପରେ ୨ଜଣ ସମ୍ପର୍କୀୟ ବାଇକ୍ରେ ତାଙ୍କୁ ବୁର୍ଡା ଫାଟକ ଦେଇ ଗାଁକୁ ନେଉଥିଲେ। ରାତି ୧୦ଟାରେ ବୁର୍ଡା ଠାରେ ଫାଟକ ପଡ଼ିଥିବାରୁ ୩ ଜଣ ଅଟକିଥିଲେ। ଏହି ସମୟରେ ବଲାଙ୍ଗିର ପଟୁ ଏକ ଏକ୍ସପ୍ରେସ୍ ଟ୍ରେନ ଆସିଥିଲା। ହଠାତ୍ ଚଳନ୍ତା ଟ୍ରେନ୍ ସାମ୍ନାକୁ ଡେଇଁ ଚନ୍ଦ୍ରଭାନୁ ଆତ୍ମହତ୍ୟା ଉଦ୍ୟମ କରିଥିଲେ। ଫଳରେ ଟ୍ରେନ୍ରେ ପିଟି ହୋଇ ଛିଟିକି ହୋଇ ପଡ଼ିଥିଲେ।
ଅଳ୍ପକେ ଜୀବନ ବର୍ତ୍ତିଗଲା ସିନା, ହେଲେ ତାଙ୍କ ମୁଣ୍ଡରେ ଗଭୀର ଆଘାତ ଲାଗିବା ସହ ଡାହାଣ ହାତ ସମ୍ପୂର୍ଣ୍ଣ କଟି ଯାଇଛି। ଖବର ପାଇ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ଆମ୍ବୁଲାନ୍ସରେ ଚନ୍ଦ୍ରଭାନୁଙ୍କୁ ଗୁରୁତର ଅବସ୍ଥାରେ ବଲାଙ୍ଗିର ଭୀମଭୋଇ ମେଡିକାଲ କଲେଜ ମେଡିକାଲ୍ରେ ଭର୍ତ୍ତି କରିଥିଲା। ତେବେ ଅବସ୍ଥା ସଙ୍କଟାପନ୍ନ ହେବାରୁ କଟା ହାତ ସହ ତାଙ୍କୁ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଛି।
କାହିଁକି ଚନ୍ଦ୍ରଭାନୁ ଟ୍ରେନ୍ ସାମ୍ନାକୁ ଡେଇଁଲେ, ଏହାର କାରଣ ଅସ୍ପଷ୍ଟ ରହିଛି। ତାମିଲନାଡୁକୁ ଦାଦନ ଖଟିବାକୁ ଯାଇ ସେ ମାନସିକ ଅବସାଦରେ ଥିଲେ ବୋଲି ଚର୍ଚ୍ଚା ହେଉଛି। ବଲାଙ୍ଗିର ରେଲ୍ୱେ ପୋଲିସ ମାମଲାର ତଦନ୍ତ କରୁଛି।
