ଘରେ ସାଇତି ରଖିଛନ୍ତି ମିନି ସଂଗ୍ରହାଳୟ; ବିଭିନ୍ନ ଅନୁଷ୍ଠାନ ପକ୍ଷରୁ ପାଇଛନ୍ତି ଅନେକ ପୁରସ୍କାର

ଶ୍ୟାମ ପ୍ରକାଶଙ୍କ ଅନନ୍ୟ ପ୍ରତିଭା ମିନି ସଂଗ୍ରହାଳୟକୁ ନେଇ ଏବେ ଚର୍ଚ୍ଚା ଜୋର୍‌ ଧରିଛି । ପୁରୀ ବଳଗଣ୍ଡିସ୍ଥିତ ଶ୍ୟାମପ୍ରକାଶ ସେନାପତି ନିଜ ବାସ ଭବନରେ ମିନି ମ୍ୟୁଜିୟମ ତିଆରି କରିଛନ୍ତି । ଯେଉଁଥିରେ ତାଙ୍କର ୩୦ବର୍ଷର ସ୍ମୃତି ଓ ଅନୁଭୂତି ଅମିତାବ୍ ବଚନଙ୍କ ଠାରୁ ଆରମ୍ଭ କରି ହେମାମାଳିନୀ, ଧର୍ମେନ୍ଦ୍ର,ରାଜେଶ ଖାନା, ମିଥୁନ ଚକ୍ରବର୍ତ୍ତୀ, ଅକ୍ଷୟ କୁମାର, ଗୋବିନ୍ଦାଙ୍କ ଫଟୋ ରହିଛି । ଏମିତିକି ରାଷ୍ଟ୍ରପତି ପ୍ରତିଭା ପାଟିଲ ଓ ପ୍ରଣବ ମୁଖାର୍ଜୀଙ୍କ ସହିତ ଉଠାଇଥିବା ଫଟୋକୁ ମଧ୍ୟ ସେ ସାଇତି ରଖିଛନ୍ତି । କେବଳ ସେତିକି ନୁହେଁ , ବିଭିନ୍ନ ଅନୁଷ୍ଠାନର କାର୍ଯ୍ୟକ୍ରମରେ ଅତିଥି ଭାବରେ ହେଉ ବା ଉଦଘୋଷକ ଭାବେ ମିଳିଥିବା ୩ ହଜାର ୫୦୦ବ୍ୟାଚ ଏବଂ ବିଭିନ୍ନ ଦେଶର ମୁଦ୍ରାକୁ ବି ସେ ସଂଗ୍ରହ କରି ରଖିଛନ୍ତି ।

ବିଗ୍ ବି ଅମିତାଭ ବଚନ, ଡ୍ରିମ୍ ଗାର୍ଲ ହେମାମାଳିନୀଙ୍କ ଠାରୁ ଆରମ୍ଭ କରି ରାଷ୍ଟ୍ରପତି ପ୍ରତିଭା ପାଟିଲ ଓ ପ୍ରଣବ ମୁଖାର୍ଜୀଙ୍କ ଭଳି ଅନେକ ଖ୍ୟାତି ସମ୍ପନ୍ନ ପ୍ରତିଭାଙ୍କ ସହ ଫଟୋ, ତଥା ୟୁରୋପ, ଆମେରିକା, ଜର୍ମାନୀ ଆଦି ଅନେକ ଦେଶର ବିଭିନ୍ନ ପ୍ରକାର ମୁଦ୍ରାକୁ ସାଇତି ରଖି ଏବେ ଖୁବ୍‌ ଚର୍ଚ୍ଚାରେ ରହିଛନ୍ତି ଶ୍ୟାମପ୍ରକାଶ । ଏହାସହ ବିଭିନ୍ନ ଅନୁଷ୍ଠାନ ତରଫରୁ ତାଙ୍କୁ ମିଳିଥିବା ବ୍ୟାଚ୍, ପୁରସ୍କାର ଆଦିକୁ ସାଇତି ରଖି ନିଜ ଘରକୁ ସେ ମିନି ମ୍ୟୁଜିୟମରେ ପରିଣତ କରିଛନ୍ତି ।

ସୂଚନା ଅନୁସାରେ, ଶ୍ୟାମପ୍ରକାଶ ହେଉଛନ୍ତି ଏକାଧାରରେ ସାହିତ୍ୟକ, କବି, ପ୍ରାବନ୍ଧିକ, ସଂସ୍କୃତି ସଂଗଠକ ଓ ସାଂସ୍କୃତିକ ମଞ୍ଚର ଉଦଘୋଷକ । ସେ ବିଭିନ୍ନ ଅନୁଷ୍ଠାନ ପକ୍ଷରୁ ସମ୍ମାନିତ ହୋଇଛନ୍ତି ତାଙ୍କର ଏହି ନିଆରା ପ୍ରତିଭା ପାଇଁ ଅନେକ ଅନୁଷ୍ଠାନ ଦେଇଥିବା ଯଶ,ସମ୍ମାନର ପେପର କଟିଂ ସହ ପ୍ରମାଣପତ୍ରକୁ ଏବେ ପର୍ଯ୍ୟନ୍ତ ସାଇତି ରଖିଛନ୍ତି । ଭାରତବର୍ଷର ଅନେକ ବିଶିଷ୍ଠ ବ୍ୟକ୍ତିଙ୍କ ଫୋନ ନମ୍ବର ଶ୍ୟାମପ୍ରକାଶଙ୍କ ନିକଟରେ ରହିଛି । ତାଙ୍କର ଏହି ପ୍ରତିଭା ଦ୍ୱାରା ଆଗାମୀ ଦିନରେ ସେ ଲିମ୍କା ବୁକ୍ ଅଫ ରେକର୍ଡ, ଗିନିଜ ବୁକ୍ ଅଫ୍ ରେକର୍ଡରେ ସ୍ଥାନ ପାଇବେ ବୋଲି ଆଶା ରଖିଛନ୍ତି ।