ନାଳ ଉପରେ ପୋଲଟିଏ ନାହିଁ : ପଡିଆ ପଡ଼ିଛି ୨ହଜାର ଏକର ଜମି, ମୁଣ୍ଡରେ ହାତ ଦେଇ ବସିଛନ୍ତି ଚାଷୀ

ଚାଷ ଓ ଚାଷୀର ଉନ୍ନତି ପାଇଁ ସରକାର ଯୋଜନା ପରେ ଯୋଜନା ପ୍ରସ୍ତୁତ କରୁଛନ୍ତି । ଆଉ ଚାଷୀର ବିକାଶ ସାଧନ ପାଇଁ କେଉଁଠି ଚାଷୀଙ୍କୁ ସବସିଡ୍ ମିଳୁଛି ତ ଆଉ କେଉଁଠି ଚାଷୀଙ୍କୁ ସୁଲଭ ମୂଲ୍ୟରେ କୃଷି ସାମଗ୍ରୀ ଯୋଗାଇ ଦିଆଯାଇଛି । ହେଲେ କେନ୍ଦ୍ରାପଡା ଜିଲ୍ଲା ରାଜକନିକାର ବଳିଭଣ୍ଡା ଠାରେ ଚାଷୀଙ୍କ ହିତ ପାଇଁ ଖୋଳା ଯାଇଥିବା ନାଳଟି ଏବେ କାଳ ସାଜିଛି । ଦୀର୍ଘ ଦିନ ହେବ ନାଳ ଉପରେ ପାଦଚଲା ପୋଲ ନିର୍ମାଣ ହୋଇ ନଥିବାରୁ ପାଖାପାଖି ୨ହଜାର ଏକର ଚାଷ ଜମି ପଡିଆ ପଡିଛି । ଯାହାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିବା ଥିବା ବେଳେ ଖୁବ ଶୀଘ୍ର ନାଳ ଉପରେ ପାଦଚଲା ପୋଲଟିଏ ନିର୍ମାଣ ପାଇଁ ଦାବି ହୋଇଛି ।

କେନ୍ଦ୍ରାପଡା ଜିଲ୍ଲା ରାଜକନିକା ବ୍ଲକ ବଳିଭଣ୍ଡା ଗାଁ ନିକଟସ୍ଥ ଚଡ଼େଇଖିଆ ନାଳ । ଦୀର୍ଘ ଦିନ ହେବେ ନାଳ ଉପରେ ପାଦଚଲା ପୋଲଟିଏ ନିର୍ମାଣ ହୋଇନ ଥିବାରୁ ଏଠାକାର ୫ଟି ପଂଚାୟତର ଚାଷୀ ମାନେ ନାନା ହଇରାଣ ହରକତ ହେଉଛନ୍ତି । ସବୁଠୁବଡ଼ କଥା ହେଉଛି ଏହି ଚଢ଼େଇଖିଆ ନାଳ ଆରପଟେ ୨ହଜାର ଏକାର ଚାଷ ଜମି ରହିଥିବା ବେଳେ ତାହା ଏବେ ଚାଷ ନହୋଇ ପଡିଆ ପଡୁଛି । କାରଣ ଚାଷ ଜମିକୁ ହଳ ଓ ଜଳ ସେଚନ କରିବା ପାଇଁ କୌଣସି କୃଷି ଉପକରଣ ନେବା ସମ୍ଭବ ହୋଇପାରୁନାହିଁ । ଫଳରେ ଜମି ସବୁ ପଡିଆ ପଡୁଛି ।

ଚଢ଼େଇଖିଆ ନାଳ ଉପରେ ଏକ ପଦଚଲା ପୋଲଟିଏ ନିର୍ମାଣ ପାଇଁ ଏଠାକାର ଚାଷୀ ମାନେ ବାରମ୍ବାର ଲୋକ ପ୍ରତିନିଧି ଓ ବିଭାଗୀୟ ଅଧିକାରୀଙ୍କୁ ଗୁହାରି କରି ଆସୁଥିଲେ ମଧ୍ୟ କିଛି ସୁଫଳ ମିଳୁନଥିବା ଚାଷୀ ଅଭିଯୋଗ କରିଛନ୍ତି ।

ରାଜକନିକାର ଓଳାଭର,ପେଗଡ଼ପଡା, ନହୁଣୀ ଓ ବରୁଣା ଆଦି ପଂଚାୟତର ଚାଷୀ ମାନଙ୍କର ସହ ସହ ଏକର ଚାଷ ଜମି ରହିଛି । ଚାଷଜମିକୁ ଯାଆ ଆସ କରିବା ପାଇଁ ପାଦଚଲା ପୋଲଟିଏ ନଥିବାରୁ ଦିନକୁ ଦିନ ଚାଷୀଙ୍କ ସମସ୍ୟା ବଢ଼ିବାରେ ଲାଗିଛି । କୃଷି ବିଭାଗ ପକ୍ଷରୁ ମହିଳା ଚାଷୀମାନଙ୍କୁ ବିଭିନ୍ନ ଯନ୍ତ୍ରାଂଶ ମିଳିଥିଲେ ମଧ୍ୟ ତାହା କାମରେ ନଲାଗି ନଷ୍ଟ ହେବାକୁ ବସିଲାଣି । ଅନ୍ୟପକ୍ଷରେ ଏହି ସମସ୍ୟା ନେଇ ବିଭାଗ ଅବଗତ ଅଛି ଓ ପ୍ରୋଜେକ୍ଟର ଡ୍ରଇଂଙ୍ଗ ଓ ଡ଼ିଜାଇନିଂ ସରିଯାଇଛି ଓସିସି ଖୁବଶୀଘ୍ର କାମ ଆରମ୍ଭ କରିବ ବୋଲି ରାଜକନିକା ଜଳସମ୍ପଦ ବିଭାଗର ଏସଡିଓ କହିଛନ୍ତି ।

କେବେ ଚଢେଇଖିଆ ନାଳ ଉପରେ ପାଦଚଲା ପୋଲ ନିର୍ମାଣ ହେବ ଆଉ ଚାଷୀ ମାନେ ତାର ସୁଫଳ ପାଇବେ ସେ ସମୟକୁ ହିଁ ଚାହିଁ ବସିଛନ୍ତି ।