ପୋଲିସ ହେପାଜତରେ ମୃତ୍ୟୁ ! ହତ୍ୟା ଅଭିଯୋଗ ଆଣିଲେ ପତ୍ନୀ

ପୋଲିସ ହେପାଜତରେ ମୃତ୍ୟୁ । ଭୁବନେଶ୍ୱର ବଡ଼ଗଡ ଥାନା ପୋଲିସ ହେପାଜତରେ ଥିବା ବ୍ୟକ୍ତିଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ମୃତକ ଜଣକ ହେଲେ ବଡ଼ଗଡ଼ ଥାନା କପିଳପ୍ରସାଦ ଅଞ୍ଚଳର ପ୍ରଦୀପ ସାହୁ । ତାଙ୍କୁ ମାରିଦିଆଯାଇଥିବା ଅଭିଯୋଗ କରିଛନ୍ତି ପ୍ରଦୀପଙ୍କ ପତ୍ନୀ ।

ପ୍ରଦୀପଙ୍କ ପତ୍ନୀଙ୍କ ଅଭିଯୋଗ ଅନୁଯାୟୀ, ଗତକାଲି ରାତିରେ ପ୍ରଦୀପ ରସୁଲଗଡ ଘରକୁ ଆସୁଥିଲେ । ଏହାପରଠାରୁ ପ୍ରଦୀପଙ୍କ ମୋବାଇଲ୍ ସ୍ୱିଚ୍ ଅଫ୍ ହୋଇଯାଇଥିଲା । ତେବେ ରାତି ପ୍ରାୟ ଗୋଟାଏରେ ପୋଲିସ ଆସି ତାଙ୍କୁ କ୍ୟାପିଟାଲ ହସପିଟାଲ ଯିବାକୁ କହିଥିଲା । ସେଠାରେ ଯାଇ ପଚାରିବା ବେଳେ ପ୍ରଦୀପଙ୍କ ମୃତ୍ୟୁ ଘଟିଥିବା ସେ ଜାଣିବାକୁ ପାଇଥିଲେ । ଯାହାକୁ ନେଇ ପୋଲିସ ପ୍ରଦୀପଙ୍କୁ ହତ୍ୟା କରିଥିବା ତାଙ୍କ ପତ୍ନୀ ଅଭିଯୋଗ କରିଛନ୍ତି ।

ଏନେଇ ପ୍ରଦୀପଙ୍କ ପତ୍ନୀ କହିଛନ୍ତି ଯେ, ମୋ ଭାଇମାନେ ଆଣିକି ତାଙ୍କୁ ରସୁଲଗଡ଼ରେ ଛାଡିଦେଲେ । ‘ଗତକାଲି ରାତି ସାଢ଼େ ଗୋଟେରେ ପୋଲିସ ଆସି କବାଟ ବାଡେଇଲେ । ମୋତେ ନାଁ ଗାଁ ଠିକଣା ପଚାରିଲେ । ତାପରେ କହିଲେ କି କ୍ୟାପିଟାଲ୍‌ ହସ୍ପିଟାଲ୍‌ ଆସନ୍ତୁ । ସେଠାକୁ ଗଲାବେଳେ ଜାଣିବାକୁ ପାଇଲି ଯେ ତାଙ୍କର ମୃତ୍ୟୁ ହୋଇଯାଇଛି’ ।

ଅନ୍ୟପକ୍ଷେ, ଏନେଇ ପୋଲିସ ପକ୍ଷରୁ କୁହାଯାଇଛି ଯେ, ମୃତ ପ୍ରଦୀପ ସାହୁ ନାମରେ ଏକାଧିକ ଚୋରି ମାମଲା ରହିଛି । ଗତକାଲି ବ୍ରହ୍ମେଶ୍ୱର ପାଟଣାରେ ରାତି ୮ଟାରେ ପ୍ରଦୀପ ସାହୁକୁ ଧରିବାକୁ ଚେଷ୍ଟା ବେଳେ ସେ ପଡିଯାଇଥିଲା । ଯାହା କରଣରୁ ପୋଲିସ ତାକୁ ଥାନାକୁ ନେଇଥିଲା ଓ ସେଠାରେ ତା ଦେହ ଅସୁସ୍ଥ ହୋଇଥିଲା । ଫଳରେ ତାଙ୍କୁ କ୍ୟାପିଟାଲ ହସ୍ପିଟାଲ ନେଇଥିଲେ ସେଠାରେ ତାର ମୃତ୍ୟୁ ହୋଇଥିଲା ବୋଲି କହିଛି ପୋଲିସ ।