LIVE TV
ନାନା କଟକଣା, ନିଷେଧାଦେଶ ଏବଂ କଡ଼ା ସୁରକ୍ଷା ସତ୍ତ୍ୱେ ପୁଣି ଭାଇରାଲ୍ ହେଲା ଶ୍ରୀମନ୍ଦିର ପରିସର ଭିଜୁଆଲ୍ । ରାଜ୍ୟ ବାହାରୁ ଆସିଥିବା ଜଣେ ଯୁବକ ଶ୍ରୀମନ୍ଦିର ପରିସରକୁ ଯାଇ ଭିଡିଓ ରେକର୍ଡିଂ କରିବା ସହ ନିଜ ଇନଷ୍ଟାଗ୍ରାମରେ ଅପଲୋଡ୍ କରିଥିବା ଦେଖିବାକୁ ମିଳିଛି ।
ବର୍ତ୍ତମାନ ନବ ଦିନାତ୍ମକ ଘୋଷଯାତ୍ରା ଚାଲିଥିବାବେଳେ ଖାଲି ଥିବା ଶ୍ରୀମନ୍ଦିର ପରିସରକୁଯାଇ ଭିଡିଓ ସୁଟ୍ କରିଥିବା ଅନୁମାନ କରାଯାଉଛି । ଆଉ ସେହି ଭିଡିଓକୁ ନିଜ ଇନଷ୍ଟା ଆକାଉଣ୍ଟରେ ଅପଲୋଡ୍ କରିଛନ୍ତି ବାରାଣସୀରୁ ଆସିଥିବା ରୋହିତ ଜୟସ୍ୱାଲ ନାମକ ଯୁବକ । ଏକାଧିକ ଭିଡିଓକୁ ସେ ଅପଲୋଡ୍ କରିଛନ୍ତି । ନିରାପତ୍ତା ଏବଂ କଟକଣା ଦୃଷ୍ଟିରୁ ଆଉ କିଛି ଭିଡିଓକୁ ଆମେ ଏଠି ଦେଖାଇପାରୁନୁ ।
Also Read
ତେବେ ବାରଣ ସତ୍ତ୍ୱେ ସଂପୃକ୍ତ ଯୁବକ କେଉଁ ସ୍ଥିତିରେ ଭିଡିଓ ସୁଟ୍ କଲେ ? ଶ୍ରୀମନ୍ଦିର ଭିତରେ ମହାପ୍ରଭୁଙ୍କ ଅନୁପସ୍ଥିତି ଯୋଗୁ ଢିଲା ସୁରକ୍ଷା ଦେଖି କ୍ୟାମେରା ଧରି ପଶିଗଲେ ନା ଏହା ପଛରେ କାହା ହାତ ରହିଛି ? ସେନେଇ କିଛି ସ୍ପଷ୍ଟ ହୋଇନାହିଁ । ଏହି ଘଟଣା ପରେ ଶ୍ରୀମନ୍ଦିରରେ ସୁରକ୍ଷା ବ୍ୟବସ୍ଥାକୁ ନେଇ ପୁଣି ପ୍ରଶ୍ନ ଉଠିଥିବାବେଳେ ଏ ସଂପର୍କରେ ଶ୍ରୀମନ୍ଦିର ପ୍ରଶାସନ କିମ୍ବା ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନି ।
