• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Prangyan Parimita

ରୋଗ ପାଇଁ ପର ହୋଇଗଲା ସିନ୍ଥିର ସିନ୍ଦୂର । ହୋମ ନିଆଁ ସାମ୍ନାରେ ବସି ନେଇଥିବା ଶପଥ ଭୁଲିଗଲା ସ୍ତ୍ରୀ । ସ୍ୱାମୀର ରୋଗ ଶୁଣି ଅଧାବାଟରେ ହାତ ଛାଡି ଚାଲିଗଲା । ସ୍ୱାମୀ ଏଚଆଇଭି ସଂକ୍ରମିତ ଚିହ୍ନଟ ହେବା ପରେ ବାପଘର ଚାଲିଗଲା ଅର୍ଦ୍ଧାଙ୍ଗିନୀ । ସ୍ତ୍ରୀ ସିନା ସ୍ୱାମୀଙ୍କୁ ଛାଡି ଚାଲିଗଲା, ହେଲେ ଅସହାୟ ଅବସ୍ଥାରେ ଗାଁ ଲୋକ ଓ ପଡୋଶୀ ଯୁବକ ତାଙ୍କ ପାଇଁ ସାହା ପାଲଟିଛନ୍ତି । ଏଭଳି ସ୍ଥିତିରେ ସ୍ୱାମୀ ଅସହାୟ ଅବସ୍ଥାରେ ନିଜ ସ୍ତ୍ରୀ ଆଉ ପିଲାକୁ ଝୁରି ହେଉଥିବା ବେଳେ ଗାଁ ଲୋକ ଯୁବକଙ୍କର ମନୋବଳ ବଢ଼ାଇଛନ୍ତି । ସେପଟେ ପୂର୍ବ ଭଳି ପୁଅ, ବୋହୂ ଓ ନାତୁଣୀଙ୍କୁ ଏକାଠି ଦେଖିବା ପାଇଁ ପରିବାର ଲୋକ ବ୍ୟାକୁଳ ହୋଇଛନ୍ତି। ଭଦ୍ରକ ଜିଲ୍ଲାରେ ଦେଖିବାକୁ ମିଳିଛି ଏଭଳି କରୁଣ ଦୃଶ୍ୟ ।

ଭଦ୍ରକ ଜିଲ୍ଲା ବନ୍ତ ବ୍ଲକର ଜଣେ ଯୁବକ ୩ ବର୍ଷ ତଳେ ବିବାହ କରିଥିଲେ । ବେଶ୍ ହସଖୁସିରେ ଚାଲିଥିଲା ପରିବାର । ବିବାହ ପରେ ଗୋଟିଏ ଝିଅ ମଧ୍ୟ ହୋଇଥିଲା । ନିଜ ବାପାମାଆ, ସ୍ତ୍ରୀ ଓ ପିଲାଙ୍କ ସହ ଦିନ ଗୁଡ଼ିକ ଆରାମରେ କଟିଯାଉଥିଲା । ଯୁବକ ଜଣକ ବାହାରେ କାମ କରି ନିଜ ପରିବାର ପୋଷୁଥିଲେ । ହେଲେ ହଠାତ୍‌ ତାଙ୍କ ଜୀବନ ଉପରେ ଘୋଟିଗଲା କଳାବାଦଲ ।

କିଛି ଦିନ ପୂର୍ବରୁ ରକ୍ତ ଦାନ କରିଥିଲେ ଯୁବକ ଜଣକ । ରକ୍ତ ଦାନ କରିବା ପରେ ସେ ଏଚଆଇଭି ସଂକ୍ରମିତ ବୋଲି ଜଣାପଡ଼ିଥିଲା । ତେବେ ଏ ନେଇ ସ୍ତ୍ରୀଙ୍କୁ ଜଣାଇବା ପରେ ଆରମ୍ଭ ହେଇଥିଲା ପାରିବାରିକ ଜୀବନରେ ଝଡ଼ । ସବୁ ଭଲପାଇବା , ସ୍ନେହ ପ୍ରେମ କ୍ଷଣିକରେ ପାଣିରେ ମିଳାଇ ଯାଇଥିଲା । ସ୍ୱାମୀଙ୍କ ନିକଟରେ ରହିବେ ନାହିଁ ବୋଲି ସ୍ତ୍ରୀ ଅଡ଼ି ବସିଥିଲେ। ଶାଶୂ, ଶ୍ୱଶୁର ଓ ସ୍ୱାମୀ ଯେତେ ବୁଝାଇଲେ ମଧ୍ୟ ସେ ବୁଝିବାକୁ ନାରାଜ ଥିଲେ।

ଶେଷରେ ପୋଲିସ, ଗାଁ ଲୋକଙ୍କ ଉପସ୍ଥିତିରେ ବୁଝାମଣା ପରେ ମହିଳା ଜଣକ ନିଜ ଝିଅ ସହ ବାହାଘର ସମୟରେ ଆଣିଥିବା ଯାନିଯୌତୁକ ସମସ୍ତ ଜିନିଷ ନେଇ ବାପ ଘରକୁ ପଳାଇଛନ୍ତି । ତିନି ବର୍ଷ ଧରି ସୁନାର ସଂସାର ଗଢ଼ିଥିବା ଯୁବକ ଏବେ ସ୍ତ୍ରୀପିଲାକୁ ଝୁରି ହେଉଛନ୍ତି କେବଳ । ସାହାରା ଦେବା ପରିବର୍ତ୍ତେ ସବୁ ଦିନ ପାଇଁ ହାତ ଛାଡ଼ି ଚାଲିଯାଇଛି ସ୍ତ୍ରୀ । ପୁଅର ଏଭଳି ଅବସ୍ଥା ଦେଖି ଅସହାୟ ବାପା ମାଆ ମଧ୍ୟ ଭାଙ୍ଗି ପଡ଼ିଛନ୍ତି ।

ସ୍ତ୍ରୀ ସିନା ଚାଲିଗଲା, ଗାଁ ପଡୋଶୀ ସେମାନଙ୍କ ସହ ହାତ ମିଳାଇବା ପାଇଁ ସହଯୋଗର ହାତ ବଢ଼ାଇଛନ୍ତି। ଅନ୍ୟପଟେ ଭିନ୍ନ କଥା କହୁଛନ୍ତି ଏଚଆଇଭି ସଂକ୍ରମିତଙ୍କ ସ୍ତ୍ରୀ । ତାଙ୍କ ପାଖରୁ ରୋଗ ଡେଇଁଥିବା କଥା କହି ଶାଶୂଘର ମାର ପିଟ୍ କରୁଥିବା ଅଭିଯୋଗ କରିଛନ୍ତି ସେ ।

Other Stories