ଶାଢ଼ୀ ବାଣ୍ଟୁଥିଲେ ବିଧାୟକ; ଧରିଲେ ଗ୍ରାମବାସୀ ଓ ପୂର୍ବତନ ବିଧାୟକ

ବିଧାୟକଙ୍କ ନାଁରେ ଶାଢ଼ୀ ବାଣ୍ଟିବା ଅଭିଯୋଗ । ଡାବୁଗାଁ ବିଧାୟକ ମନୋହର ରନ୍ଧାରୀଙ୍କ ଗାଡ଼ିରୁ ଶାଢ଼ୀ, ଟାଓ୍ୱଲ ଓ ଉତ୍ତରୀୟ ମିଳିବା ଘଟଣା । ବ୍ଲକ୍ ନିର୍ବାଚନ ଅଧିକାରୀ ଘଟଣାସ୍ଥଳରୁ ଗାଡ଼ିକୁ ଜବତ କରି ପାପଡ଼ାହାଣ୍ଡି ଥାନାକୁ ଆଣିଛନ୍ତି। ବ୍ଲକ୍ ନିର୍ବାଚନ ଅଧିକାରୀ ତଥା ପାପଡ଼ାହାଣ୍ଡି ତହସିଲଦାର ଯୋଗେଶ୍ୱର ଭୋଇଙ୍କ ଉପସ୍ଥିତିରେ ଗାଡ଼ିରୁ ୨୮୪ଟି ଶାଢ଼ୀ, ୫୦୦ଟି ଟାଓ୍ୱଲ୍, ୧୫୮ଟି ଟର୍କିସ୍ ଟାଓ୍ୱଲ୍ ଓ ୧୬୨ଟି ଉତ୍ତରୀୟ ମିଳିଛି ।

ପାପଡ଼ାହାଣ୍ଡି ଜିଲ୍ଲା ପରିଷଦ ଜୋନ୍ -୨ର କଂଗ୍ରେସ ଜିଲ୍ଲା ପରିଷଦ ପ୍ରାର୍ଥିନୀ ଲିପିକା ମାଝୀ ଏନେଇ ଥାନାରେ ଅଭିଯୋଗ ମଧ୍ୟ କରିଛନ୍ତି ।

ସୂଚନା ଅନୁସାରେ, ନବରଙ୍ଗପୁର ରଣ୍ଡାଗୁଡ଼ାରେ ଡାବୁଗାଁ ବିଧାୟକ ମନୋହର ରନ୍ଧାରୀ ତାଙ୍କ ଗାଡ଼ିରେ ଶାଢୀ ଓ ଟାୱେଲ ଭର୍ତ୍ତି କରି ଲୋକଙ୍କୁ ବାଣ୍ଟୁଥିବା ଅଭିଯୋଗ ହୋଇଥିଲା । ସ୍ଥାନୀୟ ଲୋକେ ଗାଡ଼ିକୁ ଅଟକ ରଖିଥିଲେ। ଶାଢୀ ବାଣ୍ଟିବା ବେଳେ ମନୋହରଙ୍କ ସହ ପୂର୍ବତନ ବିଧାୟକ ଭୁଜବଳ ମାଝୀଙ୍କ ବଚସା ହୋଇଥିଲା । ଅନ୍ୟପକ୍ଷରେ ଏହି ଘଟଣାକୁ ରାଜନୈତିକ ଚକ୍ରାନ୍ତ ବୋଲି କହିଛନ୍ତି ବିଧାୟକ ମନୋହର ରନ୍ଧାରୀ ।