‘ପିଲା ମୋର ଛାଟିପିଟି ହେଉଥିଲା, ନର୍ସଙ୍କୁ ଡାକିଲି . . ’

ଚିକିତ୍ସା ଅବହେଳାରୁ ଶିଶୁ ମୃତ୍ୟୁକୁ ନେଇ ପାରଳାଖେମୁଣ୍ଡି ଜିଲ୍ଲା ମୁଖ୍ୟ ଚିକିତ୍ସାଳୟରେ ଉତ୍ତେଜନା । ଶିଶୁ ଗୁରୁତର ଥିବାବେଳେ ଡାକ୍ତର ନଆସି ନର୍ସଙ୍କ ଦ୍ୱାରା ଚିକିତ୍ସା କରାଯିବାରୁ ପିଲାର ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ ଆଣିଛନ୍ତି । ଏଭଳି ଅଭାବନୀୟ ଘଟଣା ଘଟିଛି ଗଜପତି ଜିଲ୍ଲା ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟରେ ।

ଗଜପତି ଜିଲ୍ଲା ଗୋଷାଣୀ ବ୍ଲକ ଅନ୍ତର୍ଗତ ଗୁରାଣ୍ଡି ଗାଁର ଅନିଲ୍ କୁମାର ବିଷୋୟୀଙ୍କ ପୁଅ ଆୟୁଷଙ୍କୁ ଜ୍ୱର ହୋଇଥିଲା । ଗତକାଲି ରାତିରେ ପରିବାର ଲୋକେ ତାଙ୍କୁ ପ୍ରଥମେ ଗୁରାଣ୍ଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ହେଲେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଡାକ୍ତର ନ ଥିବାରୁ ପରିବାର ଲୋକେ ପିଲାଟିକୁ ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ହେଲେ ସେଠାରେ ମଧ୍ୟ ସମାନ ଅବସ୍ଥା ଦେଖିବାକୁ ମିଳିଥିଲା । ଡାକ୍ତର ନଥିବା ବେଳେ ନର୍ସ ଶିଶୁଟିର ଚିକିତ୍ସା କରିଥିଲେ । ପରେ ଶିଶୁଟିର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା ।

ମୃତକ ଶିଶୁର ବାପା କହିଛନ୍ତି, ପିଲାକୁ ଡାକ୍ତରଖାନା ନେବା ପରେ ତାକୁ ଅକ୍ସିଜେନ୍‌ ଲଗାଇ ଦେଇଥିଲେ ନର୍ସ ଦିଦି । ଆଉ ତା’ପରେ ଚାଲିଯାଇଥିଲା । ଅକ୍ସିଜେନ୍‌ ଲାଗିଲା ପରେ ପୁଅ ମୋର ଛାଟିପିଟି ହୋଇଥିଲା । ପୁଅର କଷ୍ଟ ଦେଖି ମୁଁ ତୁରନ୍ତ ଅକ୍ସିଜେନ୍‌ କାଢ଼ି ଦିଦିଙ୍କ ପାଖକୁ ଦୌଡ଼ିଥିଲି । ହେଲେ ସେ କହିଲେ ସେପରି କିଛି ହୋଇନି, ଏମିତି ହେବା ସାଧାରଣ ଘଟଣା ଡାକ୍ତର ଆସିଲେ ଦେଖିବେ । ହେଲେ ଡାକ୍ତର ଆସୁ ଆସୁ ବିଳମ୍ବ ହୋଇଗଲା । ମୋର ଗୋଟିଏ ମାତ୍ର ପୁଅ ଚାଲିଗଲା ବୋଲି ସେ କହିଛନ୍ତି ।

ଚିକିତ୍ସା ଅବହେଳାରୁ ଶିଶୁର ମୃତ୍ୟୁ ଘଟିଥିବା ପରିବାର ଲୋକେ ଅଭିଯୋଗ କରିଛନ୍ତି। ଏନେଇ ଡାକ୍ତରଖାନାରେ ଉତ୍ତେଜନା ପ୍ରକାଶ ପାଇଛି। ଶିଶୁଟିର ମୃତଦେହ ଡାକ୍ତରଖାନାରେ ରଖି ପରିବାର ଲୋକେ ହୋହାଲ୍ଲା କରିଛନ୍ତି। ଅଭିଯୋଗର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ସିଡିଏମ୍ଓ କହିଛନ୍ତି ।