ସ୍କୁଲ୍‌ରେ ମିଳୁଛି ମଧ୍ୟାନ୍ନ ଭୋଜନ; ହେଲେ ପିଲା ଘରୁ ଟିଫିନ୍‌ ନେଇ ଆସୁଛନ୍ତି

ସ୍କୁଲ୍‌ରେ ପିଲାଙ୍କ ମଧ୍ୟାନ୍ନ ଭୋଜନ ପାଇଁ ରଖାଯାଇଥିବା ଚାଉଳରେ ପୋକ ସାଲୁବାଲୁ । ଯେଉଁ ବସ୍ତାରେ ହାତ ମାରିବେ ସେଇ ବସ୍ତାରେ ସାଲୁବାଲୁ ହେଉଛନ୍ତି ପୋକ । ଆଉ ସେହି ଚାଉଳକୁ ରୋଷେଇ କରି ପିଲାଙ୍କୁ ଦିଆଯିବ ମଧ୍ୟାହ୍ନ ଭୋଜନ । ଥରେ ଚିନ୍ତା କରନ୍ତୁ ଏ ପ୍ରକାର ଚାଉଳରେ ପିଲାମାନେ ଭାତ ଖାଇଲେ ସେମାନଙ୍କ ଅବସ୍ଥା ହେବ କଣ ?

ଗୋଟିଏ ନୁହେଁ କି ଦୁଇଟି ନୁହେଁ ବରଂ ଯୋଉ ବସ୍ତା ଖୋଲିବ ସେଇ ବସ୍ତାରୁ ପୋକ ବାହାରିବ । ଚାଉଳରେ ଏମିକି ପୋକ ହୋଇଛନ୍ତି ଯେ, ଧରିଲା ବେଳକୁ ମୁଣ୍ଡା ହୋଇଯାଉଛି ଚାଉଳ । ପିଲାଙ୍କୁ ଉନ୍ନତମାନର ଖାଦ୍ୟ ଦେବା ପାଇଁ ସ୍କୁଲ କର୍ତ୍ତୃପକ୍ଷ ଓ ସ୍ୱୟଂ ସହାୟକ ଗୋଷ୍ଠୀମାନଙ୍କୁ ନିର୍ଦ୍ଦେଶ ଥିବା ପରେ ବି ଖୁଲମଖୁଲା ସରକାରୀ ନିର୍ଦ୍ଦେଶକୁ ଫୁ କରିଦିଆଯାଉଛି । ଯାହାର ଜ୍ୱଳନ୍ତ ଉଦାହଣରଣ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଉମରକୋଟ ମୁର୍ତ୍ତୁମା ନୋଡାଲ୍ ସରକାରୀ ଉଚ୍ଚ ବିଦ୍ୟାଳୟରେ ।

ଗାଁ ଲୋକଙ୍କ ଅଭିଯୋଗ ଅନୁସାରେ, ପିଲାମାନଙ୍କୁ ପୋକରା ଚାଉଳର ଭାତ ଦିଆଯାଉଥିବା ନେଇ ବାରମ୍ବାର ଅଭିଯୋଗ ହୋଇଛି । ହେଲେ ସ୍କୁଲ କର୍ତ୍ତୃପକ୍ଷ ଏ କଥାକୁ ଧ୍ୟାନ ନଦେଇ ସେଇ ପୋକରା ଚାଉଳରେ ରୋଷେଇ କରି ପିଲାଙ୍କୁ ଦେଉଛନ୍ତି ଭାତ । ଯାହାକୁ ନେଇ ଅସନ୍ତୋଷ ତେଜିବା ପରେ ରୋଷେଇ ବନ୍ଦ କରିବା ସହ ସ୍କୁଲକୁ ଘେରିଥିଲେ ସ୍ଥାନୀୟ ଲୋକ ।

ସରକାରଙ୍କ ନିୟମ ଅନୁସାରେ ପ୍ରତିଦିନ ପୃଷ୍ଟିକର ଖାଦ୍ୟ ପିଲାଙ୍କୁ ଦିଆଯିବ । ହେଲେ ଏମିତି ପୃଷ୍ଟିକର ଖାଦ୍ୟ ଦେଲେ, ପିଲାଙ୍କ ସ୍ୱାସ୍ଥ୍ୟ ଭଲ ରହିବ କି ସେମାନେ ମେଡିକାଲରେ ଆଡମିଶନ ହେବେ ତାହା ଆପଣ ଜାଣିପାରିବେ । ସ୍କୁଲରେ ଏମିତି ସ୍ଥିତି ଦେଖି ଅଧିକାଂଶ ପିଲା ଘରୁ ଟିଫିନ ନେଇ ଆସୁଛନ୍ତି କିନ୍ତୁ ସ୍କୁଲର ଖାଇବା ଖାଉନାହାନ୍ତି । ତେଣୁ ମଧ୍ୟାହ୍ନ ଭୋଜନ ପୂରା ବନ୍ଦ କରିଦେବାକୁ କହିଛନ୍ତି ଗାଁ ଲୋକେ ।

ଅନ୍ୟପଟେ ବହୁ ଦିନ ଧରି ପୋକରା ଚାଉଳକୁ ମେସିନ୍ ଦ୍ୱାରା ପଲିସ କରାଯାଇ ରନ୍ଧା ହେଉଥିବା କଥା ମାଆ ଲକ୍ଷ୍ମୀ ସ୍ୱୟଂ ସହାୟକ ଗୋଷ୍ଠୀ ସଦସ୍ୟ ସ୍ୱୀକାର କରୁଥିବାବେଳେ ଏ ସମ୍ପର୍କରେ କିନ୍ତୁ ମୁଁହ ଖୋଲି ନାହାନ୍ତି ବିଦ୍ୟାଳୟ କର୍ତ୍ତୃପକ୍ଷ । ସେପଟେ ଘଟଣାର ଖବର ପାଇ ଉମରକୋଟ ଅତିରିକ୍ତ ବ୍ଲକ ଶିକ୍ଷା ଅଧିକାରୀ ସ୍କୁଲରେ ପହଞ୍ଚି ପୋକରା ଚାଉଳ ପିଲାଙ୍କୁ ଦିଆଯିବା ଜାଣିବାକୁ ପାଇଥିଲେ ଏବଂ ଏନେଇ ବ୍ଲକ୍‌ ଶିକ୍ଷାଧିକାରୀଙ୍କୁ ରିପୋର୍ଟ ମାଗିଥିବା କହିଛନ୍ତି ।

ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା, ପୋକରା ଚାଉଳକୁ ପିଲାଙ୍କୁ କେଉଁ ପରିସ୍ଥିତିରେ ଦିଆଗଲା? ଏଥିପାଇଁ କେଉଁମାନେ ଦାୟୀ ଏବଂ ଯଦି ପିଲାଙ୍କର ସ୍ୱାସ୍ଥ୍ୟରେ କୌଣସି ସମସ୍ୟା ଦେଖାଦେଇଥାଆନ୍ତା, ତେବେ ଦାୟୀ କିଏ ରହିଥାଆନ୍ତା ବୋଲି ଉଠିଲାଣି ପ୍ରଶ୍ନ ।

(ରିପୋର୍ଟ- କାର୍ତ୍ତିକ ମଲ୍ଲିକ, ଉମରକୋଟ)