ବିଲରେ ଚାଷୀକୁ ଖେଦିଲା ଦନ୍ତା, ପଡ଼ିଉଠି ଦୌଡ଼ିଲେ ଚାଷୀ

ଜଙ୍ଗଲ ପାଖ ବିଲରେ ଜଣେ ଚାଷୀଙ୍କୁ ଦୌଡଉଛି ବଣୁଆ ହାତୀ । ଆଉ ହାତୀ ଆକ୍ରମଣରୁ ବଞ୍ଚିବା ପାଇଁ ପଡ଼ିଉଠି ଦୌଡୁଛନ୍ତି ଚାଷୀ । ଟିକିଏ ଟିକିଏରେ ବଞ୍ଚିଗଲା ଚାଷୀର ଜୀବନ ।

ଚାଷୀଙ୍କୁ ଖେଦି ଆଣୁଛି ଦନ୍ତାହାତୀ । ହେଲେ ଭାଗ୍ୟ ସାଥ୍‌ ଦେବାରୁ ବୁଦ୍ଧି କରି ଖାଲୁଆ ବିଲକୁ ଦୌଡ଼ି ପଳାଇଲେ ଚାଷୀ ଜଣକ। ସେଥି ପାଇଁ ବଞ୍ଚିଗଲା ତାଙ୍କର ଜୀବନ। ଅନୁଗୋଳ ଜିଲ୍ଲା ହଣ୍ଡପା ବନାଞ୍ଚଳ ପ୍ରତାପପୁର ଜଙ୍ଗଲରେ ଏଭଳି କିଛି ଦୃଶ୍ୟ ଦେଖିବାକୁ ମିଳିଛି । କିଛି ଦିନ ହେବ ସେହି ଅଞ୍ଚଳରେ ହାତୀଙ୍କ ଉପଦ୍ରବ ପ୍ରବଳ ମାତ୍ରାରେ ବଢିଛି । ବନକର୍ମଚାରୀ ଓ ଗ୍ରାମବାସୀ ମିଳିତ ଭାବରେ ହାତୀ ଘଉଡ଼ାଉ ଥିଲେ। ହେଲେ ସେହି ସମୟରେ ଜଣେ ଚାଷୀ ନିଜର ଚାଷ ଜମିକୁ ହାତୀ ଦାଉରୁ ବଞ୍ଚାଇବାକୁ ଚେଷ୍ଟା କରୁଥିବା ବେଳେ ଦନ୍ତାର ଅତି ନିକଟତର ହୋଇଯାଇଥିଲେ ।

ପରେ ଦନ୍ତାଟି ଚାଷୀଙ୍କୁ ଗୋଡ଼ାଇଥିବାବେଳେ ବ୍ୟକ୍ତି ଜଣକ ତଳେ ପଡିଯାଇଥିଲେ । ମରଣ ମୁହଁରୁ ଅଳ୍ପକେ ଚାଷୀଜଣକ ବର୍ତ୍ତି ଯାଇଥିଲେ । ଯାହାର ଦୃଶ୍ୟ ମୋବାଇଲ କ୍ୟାମେରାରେ କଏଦ ହୋଇଛି । ତେବେ ବନ୍ୟଜନ୍ତୁଙ୍କ ନିକଟତର କେବେ ହେଲେ ବି ହୁଅନ୍ତୁ ନାହିଁ। କାରଣ ଏହା ଆପଣଙ୍କ ଜୀବନ ପ୍ରତି ବିପଦ ଆଣିପାରେ ।

ରିପୋର୍ଟର- ବିରଜା ଦାସ