ଦୟନୀୟ ସ୍ଥିତିରେ ଗାଁର ମୁଖ୍ୟ ରାସ୍ତା, ଆମ୍ବୁଲାନ୍ସ ପସିପାରୁନି କି ବାହାଘରଟେ ହୋଇପାରୁନି

ଗାଁର ମୁଖ୍ୟ ରାତ୍ସ୍ତାର ଅବସ୍ଥା ଦେଖିଲେ ଆପଣ ବି କେବେ ବିଶ୍ୱାସ କରିପାରିବେନି ଯେ, ତାହା ଗୋଟିଏ ଗାଁର ମୁଖ୍ୟ ରାସ୍ତା ବୋଲି । ରାସ୍ତାରେ ଦୋହଲି ଦୋହଲି ଗାଡ଼ି ନେଇ ଯାଆସ କରୁଛନ୍ତି ଗାଁ ଲୋକମାନେ । ସ୍ଥିତି ଏମିତି ହେଲାଣି ଯେ, ଟିକିଏ ଅସାବଧାନ ହେଲେ ସିଧା ବିଲ ଭିତରେ ।

ଏଭଳି ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡ଼ା ପଟ୍ଟାମୁଣ୍ଡାଇର ରାଉଳଡିଆ ଗାଁରେ । ଏହି ଗାଁରେ ୪୦୦ ରୁ ଅଧିକ ଲୋକ ରହୁଛନ୍ତି । ହେଲେ ରାସ୍ତାର ଅବସ୍ଥା କଣ ତାହା ଦେଖିଲେ ଜାଣିପାରିବେ । ଗାଁର ରାସ୍ତାର ଅବସ୍ଥା ପାଇଁ ଗାଁ ଭିତରକୁ ଆମ୍ବୁଲାନ୍ସ ବି ଆସିପାରୁନି । ସେଥିପାଇଁ ତ କେହି ରୋଗରେ ପଡ଼ିଲେ ଟେକି ଟେକି ତାକୁ ମେଡିକାଲ ନିଅନ୍ତି ଗାଁ ଲୋକେ ।

ଏହା ଏମିତି ଗାଁ ଯେଉଁ ଗାଁକୁ ଚାରିପଟୁ ଘେରି ରହିଛି କାଣୀ ନଦୀ । ଏମିତି ଅବସ୍ଥା ପାଇଁ ପ୍ରଶାସନ ପାଖରେ ପୋଲ ଖଣ୍ଡିଏ ପାଇଁ ଗୁହାରି କରି କରି ଥକି ପଡ଼ିଲେଣି ଗାଁ ଲୋକେ । ହେଲେ ସ୍ଥିତି ଯଥା ପୂର୍ବଂ ତଥା ପରଂ । ଖରାଦିନେ ତ ଯାହା ଯେମିତି ଚଳିଯାଉଥିଲା କିନ୍ତୁ ଏବେ ବର୍ଷାଦିନରେ ଅବସ୍ଥା ଭାରି ସାଙ୍ଘାତିକ ।

ସ୍ଥିତି ଏମିତି ଯେ, ଗାଁକୁ ରାସ୍ତା ନଥିବାରୁ ପୁଅ-ଝିଅଙ୍କ ବାହାଘର ହୋଇପାରୁନଥିବା ଅଭିଯୋଗ କଲେଣି ଗାଁ ଲୋକେ । ଏମିତିକି ୨୦ ବର୍ଷ ପୂର୍ବେ ଗାଁ ଯେମିତି ଥିଲା ଏବେ ବି ସେମିତି ରହିଛି ବୋଲି ଅନେକ କୁହନ୍ତି । ସେପଟେ ଏନେଇ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ ପରେ ସେ କହିଛନ୍ତି ଯେ, ଗାଁର ସମସ୍ୟା ସମ୍ପର୍କରେ ପ୍ରଶାସନ ଅବଗତ ଅଛି । ଗାଁ ପଂଚାୟତ ପଇସାରେ ତୁରନ୍ତ ରାସ୍ତା ନିର୍ମାଣ କରାଯିବ ।

ଗୋଟିଏ ପଟେ ଗାଁର ବିକାଶ ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି ରାଜ୍ୟ ସରକାର । ହେଲେ ପ୍ରକୃତରେ ଗାଁର ବିକାଶ କେମିତି ହୋଇଛି ତାହାର ଦୃଶ୍ୟ ଆପଣଙ୍କ ସାମ୍ନାରେ ।

ରିପୋର୍ଟର- ପ୍ରବୀର କୁମାର ନାୟକ