LIVE TV
ଆପଣ ଜାଣିଥିବେ ବୟସର ଅପରାହ୍ନରେ ଥିବା ବାପାମାଆଙ୍କ ଆଶାକୁ ପୂରଣ କରିଥାଏ ପୁଅ । କିନ୍ତୁ ଆଜି ଆମେ ଆପଣଙ୍କୁ ଏମିତି ଏକ ଘଟଣା କହିବୁ ଯାହା ଆପଣଙ୍କୁ ବି ଆଶ୍ଚର୍ଯ୍ୟ କରିଦେବ । ଜଣେ ମାଆ ତାର ପୁଅ ଆଶାକୁ ପୂରଣ କରିଛି । ମାତ୍ର ୨୩ ବର୍ଷ ବୟସରେ ପୁଅ ଆରପାରିକୁ ଚାଲିଯିବା ପରେ ଶ୍ରାଦ୍ଧ ବାର୍ଷିକୀରେ ପୁଅର ଆଶା ପୂରଣ କରି ଏହି ମାଆ ଆଜି ଚର୍ଚ୍ଚାରେ l ପୁଅ ମୃତ୍ୟୁର ୨ ବର୍ଷ ପରେ ତାର ଇଚ୍ଛା ପୂରଣ କରିବା ପାଇଁ ମାଆ ତାର ନିଜ ଶରୀର ସହିତ ସମସ୍ତ ଧନସମ୍ପତ୍ତିକୁ ଟ୍ରଷ୍ଟକୁ ଦାନ କରି ଦେଇଛି । ଏମିତି ଏକ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ଅଇଁରୀ ଗାଁରେ ।
Also Read
ସୋର ବ୍ଲକ ଅଇଁରୀ ଗାଁର ସୁଷମା ପାଢ଼ୀ । ଗତ ୨ ବର୍ଷ ପୂର୍ବରୁ ଏକ ଦୁର୍ଘଟଣାରେ ପୁଅ ଦୀପ୍ତିକାନ୍ତ ପାଢ଼ୀଙ୍କ ଜୀବନ ଚାଲି ଯାଇଛି l ସବୁବେଳେ ସମାଜସେବାରେ ନିଜକୁ ନିୟୋଜିତ କରି ଦେଇଥିଲେ ଦୀପ୍ତିକାନ୍ତ l ପୁଅ ଆରପାରିକୁ ଚାଲିଯିବା ପରେ ସୁଷମାଙ୍କ ଏବେ ଏକୁଟିଆ ହୋଇ ଯାଇଛନ୍ତି । କିନ୍ତୁ କେବେ ଭାଙ୍ଗି ପଡ଼ି ନାହାନ୍ତି l ଦୁନିଆ ଆଗରେ ପୁଅକୁ ଜୀବିତ କରି ରଖିବା ପାଇଁ ନିଜର ସମସ୍ତ ଧନ, ସମ୍ପତ୍ତି ସହିତ ନିଜ ଶରୀରକୁ ପୁଅର ଦ୍ୱିତୀୟ ଶ୍ରାଦ୍ଧ ବାର୍ଷିକୀରେ ଦିପ୍ତୀବନ୍ଧୁ ସ୍ୱେଚ୍ଛାସେବୀ ସଂଗଠନ ନାମକ ଏକ ଟ୍ରଷ୍ଟକୁ ଦାନ କରି ଦେଇଛନ୍ତି ।
ବୟସର ଅପରାହ୍ନରେ ପ୍ରତ୍ୟେକ ବୃଦ୍ଧ, ବୃଦ୍ଧା ପୁଅ ଉପରେ ନିର୍ଭର କରିଥାନ୍ତି । ହେଲେ ମୃତ ଦୀପ୍ତିକାନ୍ତଙ୍କ ୫୬ ବର୍ଷୀୟ ମାଆ ସୁଷମା ପାଢ଼ୀ ଏବେ ସମାଜ ପାଇଁ ଉଦାହରଣ ପାଲଟି ଯାଇଛନ୍ତି । ଏପରିକି ମହତ କାମକୁ ଦୀପ୍ତିକାନ୍ତଙ୍କ ମାମୁଁ ପ୍ରଶଂସା କରିବା ସହ ଭଣଜାର ଶେଷ ଇଛା ପାଇଁ ଏହି ଟ୍ରଷ୍ଟରେ ନିଜେ କାମ କରି ବୃଦ୍ଧ ବୃଦ୍ଧାମାନଙ୍କର ସେବା କରିବା ପାଇଁ ଇଛା ରଖିଛନ୍ତି । ସେହି ଉଦ୍ଦେଶ୍ୟରେ କଟକର ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜକୁ ଶରୀର ଦାନ କରିବା ପାଇଁ ଟ୍ରଷ୍ଟ ସହିତ ଚୁକ୍ତି ମଧ୍ୟ କରିଛନ୍ତି ।
ସୁଷମାଙ୍କ ପରି ଜଣେ ମହାନ ମଣିଷ, ମାଆ ହିସାବରେ ସମାଜକୁ ଯେଉଁ ଦିଗ୍ଦର୍ଶନ ଦେଇଛନ୍ତି ତାହା ବୋଧ ହୁଏ ଏକ ବିରାଟ ଉଦାହରଣ ହୋଇ ରହିବ । ଏପରି ମାଆକୁ ଓଟିଭିର ଶତ ପ୍ରଣାମ ।
