Otv Khabar Bureau

ଆଇସକ୍ରିମ କାଠିରେ ଅଯୋଧ୍ୟାରେ ପ୍ରଭୁ ଶ୍ରୀରାମଚନ୍ଦ୍ରଙ୍କ ଭବ୍ୟ ରାମ ମନ୍ଦିର , ମହମରେ ବିଶ୍ୱ ପ୍ରସିଦ୍ଧ ଯୋରନ୍ଦା ମହିମା ଗାଦୀ । ମନ୍ଦିର ଓ କାଠରେ ମାତ୍ର ସାଢେ ଚାରି ଇଞ୍ଚର ନନ୍ଦିଘୋଷ ରଥ । ଏଭଳି କିଛି ଦୃଶ୍ୟ ଦେଖିଲେ ସମସ୍ତଙ୍କ ଆଖି ଲାଖି ହୋଇ ରହିଯିବ। ସମସ୍ତଙ୍କ ମୁହଁରୁ ପ୍ରଶଂସାର ସୁଅ ଛୁଟିବ ।

ଆଇସକ୍ରିମ ଖାଇ ସାରିବା ପରେ ସମସ୍ତେ କାଠିକୁ ଫିଙ୍ଗି ଦେଇଥାଉ । କିନ୍ତୁ ସେହି ଅଦରକାରୀ କାଠିକୁ ନେଇ ଅଯୋଧ୍ୟାର ପ୍ରଭୁ ଶ୍ରୀରାମଚନ୍ଦ୍ରଙ୍କ ଭବ୍ୟ ଶ୍ରୀରାମ ମନ୍ଦିର ତିଆରି କରି ଏବେ ଚର୍ଚ୍ଚାରେ ଢେଙ୍କାନାଳର ଯୁବକ ସୁବ୍ରତ ମହାରଣା । କାଠିରେ ରାମ ମନ୍ଦିର ନିର୍ମାଣ କରିବାକୁ ତାଙ୍କୁ ୧୭ ଦିନ ଲାଗିଛି । କେବଳ ଏତିକି ନୁହେଁ ମହମରେ ତିଆରି ଏହି ବିଶ୍ୱ ପ୍ରସିଦ୍ଧ ଯୋରନ୍ଦା ମହିମାଗାଦୀ ମନ୍ଦିର ମଧ୍ୟ ଅତ ସୁନ୍ଦର ଦିଶୁଛି । ସୁକ୍ଷ୍ମ ଓ ନିଖୁଣ ଭାବରେ ଏହାକୁ ତିଆରି କରିବାରେ ସଫଳ ହୋଇଛନ୍ତି ସୁବ୍ରତ।

ସୁବ୍ରତଙ୍କର କୁନି ରଥ ମାତ୍ର ସାଢେ ଚାରି ଇଞ୍ଚରେ ସାଧାରଣ କାଠ ଓ ଅଠାରେ ତିଆରି ହୋଇଛି ଏହି ପ୍ରଭୁ ଜଗନ୍ନାଥଙ୍କ ନନ୍ଦିଘୋଷ ରଥ। ଏହି ସବୁ ନିଆରା କାମ ପାଇଁ ସୁବ୍ରତ ଗତବର୍ଷ ଇଣ୍ଡିଆ ବୁକ ଅଫ ରେକର୍ଡରେ ସ୍ଥାନ ମଧ୍ୟ ପାଇଛନ୍ତି । ଆଗକୁ ଏହି ସବୁ କଳା କୃତି ମାଧ୍ୟମରେ ବିଶ୍ୱ ରେକର୍ଡ ସ୍ଥାପନ କରି ଜିଲ୍ଲା ତଥା ରାଜ୍ୟ ପାଇଁ ଗୌରବ ଆଣିବେ ବୋଲି ଲକ୍ଷ୍ୟ ରଖିଛନ୍ତି ସୁବ୍ରତ ।

 

ପିଲାଦିନରୁ ସୁବ୍ରତଙ୍କର କଳାକୃତି କାମ ପାଇଁ ରହିଥିଲା ଢେର ଆଗ୍ରହ। ସେଥିପାଇଁ ମାତ୍ର ପାଞ୍ଚ ବର୍ଷ ବୟସରୁ ବିଭିନ୍ନ ଛୋଟମୋଟ ବାଲୁକା ଶିଳ୍ପୀ ଓ ପଥରରେ ଛୋଟମୋଟ ମୂର୍ତ୍ତି ତିଆରି କାମ କରିବା ଆରମ୍ଭ କରି ଦେଇଥିଲେ । ପରିବାରର ଆର୍ଥିକ ପରିସ୍ଥିତି ସେତେଟା ଭଲ ନଥିବାରୁ ଅଧିକ ପାଠ ପଢି ପାରିଲେନି । କିନ୍ତୁ ଏହି ସବୁ କଳାରେ ନିଜ ମନ ନିବେଶ କରିଛନ୍ତି ।

କେବଳ ଓଡ଼ିଶା ନୁହେଁ ବିଦେଶରେ ମଧ୍ୟ ସେ ନିଜର କଳା ଦେଖାଇଛନ୍ତି । ମୁଗୁନି ପଥରରେ ସେ ମହାପୁରୁଷଙ୍କର ମୂର୍ତ୍ତି ମଧ୍ୟ ତିଆରି କରିଛନ୍ତି। ସୁବ୍ରତଙ୍କ କଳା ପୂରା ବିଶ୍ୱରେ ପହଞ୍ଚୁ ବୋଲି ଅଂଚଳବାସୀ କହିଛନ୍ତି।

Other Stories